- 20 લાખની ચીલ ઝડપ મામલે હર્ષ સંઘવીના પ્રહાર
- નામ લીધા વિના રાજેન્દ્ર સોલંકી પર કર્યા પ્રહાર
- આ રૂપિયા ક્યાંથી આવ્યા અને કેમ આવ્યા?: હર્ષ સંઘવી
હર્ષ સંઘવીએ આડકતરી રીતે નામ લીધા વિના રાજેન્દ્ર સોલંકી પર પ્રહાર કરતા કહ્યું કે, 'રોકડા ક્યાંથી આવ્યા એ સવાલ મને નહીં એમને પૂછો. આ રૂપિયા ક્યાંથી આવ્યા અને કેમ આવ્યા? ટેક્સ ભરતા નથી એમને રૂપિયા દિલ્હીથી કેમ આવ્યા? શું ગુજરાતમાં અશાંતિ ફેલાવવા માટે રૂપિયા મોકલ્યા હતા?'
મહત્વનું છે કે, ગુજરાતમાં વિધાનસભા ચૂંટણી જેમ-જેમ નજીક આવી રહી છે તેમ-તેમ એકબાદ એક નવા રાજકીય વળાંકો સામે આવી રહ્યાં છે. એક તરફ આમ આદમી પાર્ટીએ ચૂંટણી માટે ઉમેદવારો મેદાનમાં ઉતારી દીધા છે ત્યારે બીજી તરફ AAPના ઉમેદવારો વિવિધ મુદ્દે ફસાઈ રહ્યાં છે. કારણ કે તાજેતરમાં જ બારડોલી બેઠકના ઉમેદવાર રાજેન્દ્ર સોલંકી એક વિવાદમાં ફસાયા છે.
ગાડીમાંથી 20 લાખ મળી આવતા રાજેન્દ્ર સોલંકી સવાલોના ઘેરામાં
ગાડીમાંથી 20 લાખ રૂપિયા મળી આવતા રાજેન્દ્ર સોલંકી સવાલોના ઘેરામાં આવી ગયા છે. ત્યારે આ મામલે ગૃહ રાજ્યમંત્રી હર્ષ સંઘવીએ પ્રતિક્રિયા આપતા કહ્યું કે, 'આ રૂપિયા ક્યાંથી આવ્યા અને કંઈ રીતે આવ્યા?'
મહત્વનું છે કે, આ 20 લાખ રૂપિયાની ચિલઝડપ મામલે પોલીસ મથકમાં ફરિયાદ પણ કરવામાં આવી હતી. ત્યાર બાદ બારડોલી પોલીસ દ્વારા સમગ્ર મામલે તપાસ શરૂ કરવામાં આવી હતી. 20 લાખની રકમની લૂંટની તપાસ કરી રહેલી પોલીસે આ અંગે ઈન્કમટેક્ષ વિભાગને (IT) પણ જાણ કરી હતી.
ઈન્કમટેક્ષ વિભાગે શરૂ કરી છે તપાસ
બારડોલી ખાતે ઇન્કમટેક્સ વિભાગે ધામાં નાખી રાજેન્દ્ર સોલંકી અને તેમના ડ્રાઈવરની સઘન પૂછપરછ શરૂ કરી છે. હાલ આ મામલે ઈન્કમટેક્ષ વિભાગ સહિત પોલીસ તપાસ ચાલી રહી છે. સૂત્રો દ્વારા મળતી માહિતી મુજબ કારમાં રાજેન્દ્ર સોલંકી સાથેનો ડ્રાઇવર AAPનો કાર્યકર છે.
જાણો શું હતી સમગ્ર ઘટના?
ઉલ્લેખનીય છે કે, ગત રોજ બારડોલી પોલીસ મથકના ગેટ પાસે પાર્ક કરેલી કારમાંથી ધોળા દહાડે ચીલ ઝડપની ઘટના બની હતી. કારનો કાચ તોડીને લાખોની મત્તાની ચિલઝડપ કરી બે યુવાનો બાઈક પર ફરાર થઈ ગયા હતા. જોકે એક જાગૃત યુવાને ચીલ ઝડપ કરનારા બંન્ને યુવાનની બાઈકનો પીછો કરતા RTO નજીક તેઓ પૈસા ભરેલી બેગ ફેંકી ફરાર થઈ ગયા હતા. બાદમાં જાગૃત યુવાન પૈસા ભરેલી બેગ લઈને બારડોલી પોલીસ મથકે પહોંચ્યો હતો. જેમાં ખુલાસો થયો હતો કે આ રૂપિયા AAP નેતાના છે. આથી AAP નેતાના રૂપિયા હોવાનું સામે આવતા IT વિભાગે આ મામલે તપાસ આરંભી હતી. જે મામલે આજે ગૃહ મંત્રીએ નામ લીધા વિના રાજેન્દ્ર સોલંકી પર પ્રહાર કર્યા હતા.
