કોઇ ગુનેગાર ઉંચી આંખ ન કરી શકે એ પ્રકારની કાર્યવાહી સુરત પોલીસે ચિખલીગર ગેંગને પકડતી વખતે કરી: ગૃહરાજ્યમંત્રી હર્ષ સંઘવી
ચિખલીગર ગેંગની ધરપકડ કેસ
સુરત ક્રાઇમ બ્રાંચની ટીમને અભિનંદન: હર્ષ સંઘવી
28 જૂને સુરત ક્રાઇમ બ્રાંચે કરેલું એક લાઇવ ઓપરેશન ખૂબ ચર્ચાનો વિષય બની ગયું છે. જેમાં શહેર ક્રાઇમ બ્રાંચે ફિલ્મી ઢબે ચીખલીગર ગેંગના સભ્યોને ઝડપી પાડ્યા છે. બારડોલી નજીકથી ચીખલીગર ગેંગના 3 સભ્યોની સુરત ક્રાઇમ બ્રાંચે ફિલ્મી ઢબે ધરપકડ કરી હતી. ચીખલીગર ગેંગના સભ્યોની ધરપકડ કરવા ક્રાઇમ બ્રાંચે JCB વચ્ચે મૂકીને તેઓની ગાડી પર ડંડાવાળી શરૂ કરી દીધી હતી. જે બાદ ક્રાઇમ બ્રાંચના આ ઓપરેશનના લાઇવ વીડિયો પણ સામે આવ્યા હતા.
ચિખલીગર ગેંગની ધરપકડ મુદ્દે 1 લાખના ઇનામની જાહેરાત
ત્યારે સુરતમાં ચિખલીગર ગેંગની ધરપકડ મુદ્દે હર્ષ સંઘવીએ આજે નિવેદન આપ્યું છે અને પોલીસની કામગીરીના ભરપેટ વખાણ કરતાં કહ્યું છે કે ચિખલીગર ગેંગની અનેક ગુનાઓમાં સંડોવણી છે. પોલીસે ગેંગને પકડવા 500થી 600 CCTV કેમેરા ચેક કર્યા હતા. પ્રવીણ રાઉતને પકડવા સુરત પોલીસે ખૂબ મહેનત કરી છે.કોઇ ગુનેગાર ઉંચી આંખ ન કરી શકે એ પ્રકારની કાર્યવાહી થતાં ગૃહરાજ્ય મંત્રીએ સુરત ક્રાઇમ બ્રાંચ ટીમને 1 લાખના ઇનામની જાહેરાત કરી અભિનંદન આપ્યા હતા.અને કહ્યું હતું કે કોમ્બિંગ અને નાઇટ પેટ્રોલિંગના કારણે ગુના બનતા અટક્યા છે. ગુજરાતમાં શાંતિપ્રિય રાજ્ય પોલીસની મહેનત અને કામગીરીનું પરિણામ છે.
ક્રાઇમ બ્રાંચની ટીમ અને ચીખલીગર ગેંગ વચ્ચે સર્જાયા હતા ઝપાઝપીના દ્રશ્યો
આ ઘટનામાં ક્રાઇમ બ્રાંચની ટીમ અને ચીખલીગર ગેંગ વચ્ચેના ઝપાઝપીના દ્રશ્યો પણ સામે આવ્યા હતા . છેલ્લાં ઘણા સમયથી આ ચીખલીગર ગેંગનો આતંક હતો ત્યારે ક્રાઇમ બ્રાંચને આ એક મોટી સફળતા હાથ લાગી છે. મહત્વનું છે કે, શહેરના બારડોલીના દસ્તાન ફાટક પાસેથી ચીખલીગર ગેંગના સભ્યો ઇકો લઇને જઇ રહ્યાં હતા એ દરમ્યાન ફિલ્મી ઢબે ક્રાઇમ બ્રાંચની ટીમે કારને રોકી હતી. કાર પર ડંડા અને ધોકાવાળી કરીને તેમજ ચીખલીગર ગેંગના સભ્યો ફરાર ના થઇ જાય એ માટે કારને રોકવા વચ્ચોવચ બુલડોઝર પણ મૂકવામાં આવ્યું હતું.
ચીખલીગર ગેંગના સભ્યો દસ્તાન ફાટક પાસેથી પસાર થશે એવી પોલીસને બાતમી મળી હતી
જો કે, પોલીસને જોતાની સાથે જ ગેંગના સભ્યોએ કારને રિવર્સ લઇને ઘટનાસ્થળેથી ભાગવાનો પ્રયાસ કર્યો હતો. પરંતુ ક્રાઇમ બ્રાંચની ટીમે પણ સતર્કતા દાખવી કાર પર લાકડીઓ અને ડંડાવાળી કરી ચીખલીગર ગેંગના 3 સભ્યોને દબોચી લીધા હતાં. છેલ્લાં કેટલાંય સમયથી ચીખલીગર ગેંગના સભ્યોને પોલીસ શોધી રહી હતી. આથી, જ્યારે ક્રાઇમ બ્રાંચને એવી બાતમી મળી કે, બારડોલીના દસ્તાન ફાટક નજીક ચીખલીગર ગેંગના સભ્યો દસ્તાન ફાટક પાસેથી પસાર થવાના છે. આથી, વહેલી સવારમાં જ ક્રાઇમ બ્રાંચની ટીમ દ્વારા આ આખેઆખું ઓપરેશન પાર પાડવામાં આવ્યું હતું. ક્રાઇમ બ્રાંચની ટીમે અગાઉથી જ રોડની વચ્ચોવચ્ચ વાહનો અને બુલડોઝર મુકી દીધા હતા. જેના લીધે તેઓ હાથમાંથી નાસી ના છૂટે.
અગાઉ પણ આ લોકોને પોલીસે પકડવાના પ્રયાસ કર્યા હતા
જો કે તેમ છતાં ક્રાઇમ બ્રાંચની આખી ટીમ હોવા છતાં શરૂઆતમાં આ ગેંગના સભ્યોએ ક્રાઇમ બ્રાંચની ટીમ સાથે ઝપાઝપી કરી ઇકો કારમાં ભાગવાનો પ્રયાસ કર્યો હતો. પરંતુ અંતે ક્રાઇમ બ્રાંચે બુલડોઝર દ્વારા તેઓની કારને અટકાવી તેઓની ધરપકડ કરી લીધી હતી. હાલમાં ક્રાઇમ બ્રાંચ દ્વારા આ શખ્સોને સુરત ક્રાઇમ બ્રાંચે લઇ જઇને પૂછપરછ હાથ ધરવામાં આવી રહી છે. અંદાજિત 20થી વધુ ગુનાઓને તેઓ અંજામ આપી ચૂક્યાં છે. અગાઉ પણ પોલીસે આ ગેંગના સભ્યોને પકડવાનો પ્રયાસ કર્યો હતો પરંતુ પોલીસના અગાઉના પ્રયાસ નિષ્ફળ નિવડ્યા હતાં.