હાર્મી તને શું થયું? / VIDEO: ગુજરાતની આ 14 વર્ષની દીકરીને અજીબ બીમારી, મોટા મોટા ડૉક્ટરો નથી શોધી શક્યા કે તકલીફ ક્યાં

• રૂપિયા છે પણ ઈલાજ નથી14 વર્ષની દીકરીને અજીબ બીમારી 
• કઈ બીમારી છે તેનું નથી થતું ચોક્કસ નિદાન 
• SSPE અથવા GBS નામની હોય શકે છે બીમારી 
   

બીમારી કોઈપણ વ્યક્તિ માટે સારી નથી. અને તેમાં પણ બદલાતા સમય સાથે એવી નવી-નવી અને ગંભીર બીમારીઓના કેસ સામે આવી રહ્યા છે જેની સારવાર શોધવી પણ મુશ્કેલ છે. આવી જ એક અજીબ બીમારીથી ગીરસોમનાથ જિલ્લાની એક 14 વર્ષીય બાળકી પીડાઈ રહી છે. આ બાળકીને કઈ બીમારી છે તેનું કોઈ ચોક્કસ નિદાન નથી. અને ડોક્ટરો જે બીમારીની શંકા વ્યક્ત કરી રહ્યા છે તેની સારવાર મોંઘી છે. તેવામાં વધુ એક મા-બાપે મદદ માટે ગુહાર લગાવી છે.

હાર્મી અચાનક જ પથારીવશ થઈ
એક હસતી-રમતી અને ખિલખિલાટ કરતી દીકરી અચાનક પથારીવશ થઈ જાય તો..? આવું જ કાંઈક ગીર સોમનાથના વેલણ ગામની હાર્મી પ્રજાપતિ સાથે થયું છે. 14 વર્ષીય હાર્મી છેલ્લા 4 વર્ષથી અજીબ બીમારીથી પીડાઈ રહી છે. અને તે કાંઈપણ કરી શક્તિ નથી. કારણ કે તેના સ્નાયુઓ નબળા પડી ગયા છે. કોઈ તેને ઉચકે તો તે ઉભી થઈ શકે છે. પરંતુ તે જાતે પોતાની પથારીમાંથી પણ નથી ઉભી થઈ શક્તિ. કારણ કે, હજૂ સુધી કોઈ નિષ્ણાત તેની બીમારીનો પત્તો લગાવી શક્યા નથી. હાર્મીની આ હાલત વિશે વાત કરીએ તો. 4 વર્ષ પહેલા હાર્મીને તાવ અને ઓરી નિકળ્યા હતા. અને ત્યારથી જ તેના સ્નાયુઓ નબળા પડવા માંડ્યા હતા. તેના હાથ-પગ શિથિલ પડવા લાગ્યા છે. અને તે સતત ગુમસુમ પડી રહે છે. પરિવાર તેની સારવાર માટે જિલ્લા સહિત રાજ્યની તમામ હોસ્પિટલોમાં પણ ફર્યો. પરંતુ કોઈ ચોક્કસ નિદાન નથી મળતું. અમદાવાદ સિવિલ હોસ્પિટલના ડોક્ટરોનું કહેવું છે, બાળકી SSPE નામની બીમારીથી પીડિત છે. જ્યારે બીજા નિષ્ણાત ડોક્ટરોનું કહેવું છે કે, બાળકીને GBS એટલે કે, ગિલાઈન બેર સિન્ડ્રોમ નામની બીમારી છે. 

SSPE કે GBS હાઈ શકે
અહીં એવું નથી કે, બાળકીનો પરિવાર પૈસા બાબતે મદદ માગી રહ્યો છે. આ પરિવાર પોતાની બાળકીને ક્યો રોગ છે તેનું ચોક્કસ નીદાન થાય તે માટે મદદની ગુહાર લગાવી રહ્યો છે. કારણ કે, GBS અને SSPE બીમારીનો આજ સુધી કોઈ ચોક્કસ ઈલાજ ઉપલબ્ધ નથી. આ રોગ 10 હજાર બાળકોમાંથી 1 માં ઓરીના કારણે થાય છે. તેવામાં જો પરિવારને જાણવા મળે કે, તેમની બાળકી ક્યા પ્રકારની બીમારીથી પીડિત છે તો તેઓ તેનું ચોક્કસ નિદાન કરાવી શકે. SSPE અને GBS બીમારી શું છે તેના અંગે વાત કરવામાં આવે તો. SSPEએ બાળકો અને યુવાન વયસ્કોનો એક પ્રગતિશીલ ન્યુરોલોજીકલ ડિસઓર્ડર છે. જે સેન્ટ્રલ નર્વસ સિસ્ટમને અસર કરે છે.  ખામીયુક્ત ઓરીના વાયરસને કારણે તે ધીમી ગતિએ ફેલાય છે. જ્યારે GBSએ ન્યુરોન્સને અસર કરતા રોગ છે. આ રોગ મગજના સ્નાયુઓને ધીમે ધીમે શિથિલ અને નિષ્ક્રિય કરતો જાય છે. પરંતુ હાલ હાર્મી નામની આ બાળકી કઈ બીમારીથી પીડિત છે તે જાણવું સૌથી મોટો પડકાર છે. 

આર્થિક મદદ નથી જોઈતી ફક્ત બીમારી કઈ તેની ભાળ જોઈએ છે
પરિવાર આર્થિક રીતે મદદની માગ નથી કરી રહ્યો. પરંતુ પોતાની બાળકીને ક્યા પ્રકારની બીમારી છે તેનું ચોક્કસ નિદાન થાય તેવી માગ કરી રહ્યો છે. ત્યારે સવાલ એ થાય છે કે, શું આપણી પાસે એવી કોઈ તકનીક નથી જેના દ્વારા આ બાળકીની બીમારીને ઓળખી શકાય.? આશા રાખીએ કે, આપણા નિષ્ણાત તબીબો આ દીશામાં પણ પોતાનું ધ્યાન કેન્દ્રિત કરશે અને આ બીમારી અંગે સંશોધન કરી હાર્મી જેવા હજારો બાળકોનો જીવ બચાવી લેશે.