ગુજરાત વિધાનસભાની ચૂંટણીમાં વિરમગામ બેઠક સરખા નામના સહારે તરી જવાની રાજનીતિના દર્શન થઇ રહ્યા છે. જેમાં ભાજપના હાર્દિક પટેલ સહીત ત્રણ-ત્રણ હાર્દિક પટેલ જંગમાં હોવાથી આ બેઠક ચર્ચાના ચકડોળે ચડી છે.
ગુજરાત વિધાનસભાની ચૂંટણીમાં વિરમગામ બેઠક ચર્ચાનું કેન્દ્ર બની છે. જેનું મુખ્ય કારણ છે આ બેઠક પર ભાજપના યુવા નેતા હાર્દિક પટેલ ચુંટણી જંગમાં ઉતર્યા છે. બીજી બાજુ કોંગ્રેસમાંથી લાખાભાઈ ભરવાડ મેદાને છે. વધુમાં અપક્ષમાથી પણ અન્ય એક હાર્દિકએ ઉમેદવારી નોંધાવી છે. જેને લઇને આ સીટ પર આખા રાજ્યની મીટ મંડાયેલી છે. ત્યારે એક જ બેઠક પરથી 3- 3 હાર્દિક પટેલ લડતા હોવાથી કોણ બાજી મારશે ? અને સમાન નામનો કેટલો લાભ મળશે તે જોવું રહ્યું !
34 ઉમેદવારોએ ચૂંટણીના જંગમાં ઝંપલાવ્યું
ચુંટણીને લઇને હાલ ગુજરાતની આબોહવામાં રાજકારણમાં પ્રસર્યુ છે. મતના જંગની ગરમી વચ્ચે વિરમગામ બેઠકની ચર્ચા જોરશોરથી ચાલી રહી છે પાટીદારોના પાવરના આ ગઢમાં 34 ઉમેદવારોએ ચૂંટણીના જંગમાં ઝંપલાવ્યું છે. 34 ઉમેદવારોમાંથી કુલ 9 ઉમેદવારો પાટીદાર છે. આ બેઠક પર ભાજપ દ્વારા હાર્દિક પટેલને મેદાને ઉતારાયા છે, મહત્વની વાત એ પણ છે કે આ બેઠક પર હાર્દિક નામના અન્ય બે યુવાનોએ પણ અપક્ષ ઉમેદવારી કરી છે. એક અપક્ષ ઉમેદવાર હાર્દિકકુમાર કિરિટભાઈ પટેલ છે જ્યારે બીજા હાર્દિકકુમાર જગદીશચંદ્ર પટેલ છે. આમ સરખા નામને લઇને હાર્દિકને જીતની આશા છે.
ભાજપના ઉમેદવાર હાર્દિક પટેલ દ્વારા જોરશોરથી પ્રચાર
હાર્દિક પહેલા આમ આદમી પાર્ટીમાંથી ફોર્મ ભર્યું હતું, પરંતુ અન્ય ઉમેદવારને મેન્ડેટ મળતા તે અપક્ષમાં કન્વર્ટ થઈ ગયો છે. હાર્દિકનું માનવું છે કે, તે જમીનથી જોડાયેલો હોવાથી લોકો તેને મતોની વૃષ્ટિથી આશીર્વાદિત કરશે. પરંતુ હાર્દિક નંબર 2(ટુ)ની વાત હાર્દિક નંબર 1(વન) સ્વીકારવા તૈયાર નથી. પાટીદાર આંદોલનનો મુખ્ય ચહેરો અને હાલમાં ભાજપના વિરમગામના ઉમેદવાર એવા હાર્દિક પટેલ પણ જોરશોરથી પ્રચારસભાઓ કરી રહ્યા છે. તે ભાજપના ઉમેદવાર હોવાના કારણે તેમની સભાઓનો ઝાકમઝોળ આંખે ઊડીને વળગે તેવા છે. રાજનીતિના અનેક દાવપેચ અનુભવી ચૂકેલા હાર્દિક પટેલને અમે હાર્દિક નામેરી ઉમેદવારો તરફથી પડકાર વિશે હાર્દિક પટેલને લઇ ફર્ક ન પડતો હોવાનું કહ્યું હતું.
વિરમગામ બેઠક પર ઠાકોર, પટેલ જેવા મતદારોનો દબદબો
બેઠક પરના જ્ઞાતિ-જાતિના સમીકરણોમાં વિરમગામ બેઠક પર ઠાકોર, પટેલ, દલિત, મુસ્લિમ, કોળી પટેલ, દરબારો જેવા મતદારોનો દબદબો છે. અહી મતદારોમાં ઠાકોર, કોળી પટેલ બન્ને સમાન જ્ઞાતિ ગણાય છે. આ જ્ઞાતિના મતદારો સૌથી વધુ છે. જ્યારે પાટીદાર જ્ઞાતિના મતદાર બીજા નંબરે છે. જ્યારે આ બેઠક પર આ ઉપરાંત ઓબીસી મતદારો અને મુસ્લિમ મતદારોનું પણ વર્ચસ્વ વધારે છે.