ક્રિકેટ / મેદાન પર હાર્દિક પંડયાએ વિરાટ કોહલીને કર્યો ઇગ્નોર, કેપ્ટનશિપ મળતા દેખાડવા લાગ્યો ટશન! જુઓ VIDEO

• ભારતે સીરિઝમાં 1-0ની લીડ મેળવી લીધી છે
• વિરાટ કોહલીની વાતને હાર્દિક પંડયાએ અવગણી 
• સોશિયલ મીડિયા પર વીડિયો થયો વાયરલ 

ભારત અને ઓસ્ટ્રેલિયા વચ્ચે ત્રણ મેચની વનડે સીરિઝની પહેલી મેચ મુંબઈના વાનખેડે ખાતે રમાઈ હતી અને ભારતીય ટીમે ઓસ્ટ્રેલિયા સામેની પ્રથમ વનડેમાં શાનદાર દેખાવ કરતાં 5 વિકેટે જીત મેળવી હતી. ભારતની જીતમાં કેએલ રાહુલ અને રવીન્દ્ર જાડેજાએ મહત્વની ભૂમિકા ભજવી હતી. આ મેચમાં આ બંને ખેલાડીઓએ પોતાના શાનદાર પ્રદર્શને ઓસ્ટ્રેલિયા પાસેથી આ મેચ છીનવી લીધી હતી. ટીમનો નિયમિત કેપ્ટન રોહિત શર્મા આ મેચમાં રમ્યો ન હતો, તેના સ્થાને હાર્દિક પંડ્યાએ કેપ્ટનશિપની જવાબદારી સંભાળી હતી. ભારતીય ટીમે વર્ષ 2023માં 7 વન-ડે રમી છે, જેમાંથી તેણે તમામ મેચ જીતી છે.

ઓસ્ટ્રેલિયાને પહેલી ODIમાં 5 વિકેટે હરાવ્યાની સાથે ભારતે સીરિઝમાં 1-0ની લીડ મેળવી લીધી છે પણ સોશિયલ મીડિયા પર એક વીડિયો વાયરલ થઈ રહ્યો છે જેમાં હાર્દિક પંડયા પૂર્વ કેપ્ટન વિરાટ કોહલીની વાતને અવગણતો જોવા મળી રહ્યો છે. આ વિડીયો જોઈને સોશિયલ મીડિયા પર લોકો ઘણા ગુસ્સામાં જોવા મળ્યા હતા. 

હાર્દિક પંડ્યાએ વિરાટ કોહલીને નકારી કાઢ્યો 
ઓસ્ટ્રેલિયાની ટીમ જ્યારે બેટિંગ કરી રહી હતી ત્યારે 20મી ઓવરમાં કુલદીપ યાદવ બોલિંગ કરી રહ્યો હતો. એ સમયે વિરાટ કોહલી, કેપ્ટન હાર્દિક પંડ્યા અને કુલદીપ એકબીજાની વચ્ચે વાત કરી રહ્યા હતા. ત્યારબાદ વિરાટ કંઈક ઈશારો કરતો જોવા મળે છે પણ હાર્દિક તેની વાત સાંભળતો નથી અને આગળ વધે છે, જેના પછી વિરાટ કોહલી ઘણો ગુસ્સે જોવા મળે છે. આ પછી કોહલી કંઈક કહીને બીજી તરફ જાય છે. હાલ આ ઘટનાનો વીડિયો સોશિયલ મીડિયા પર વાયરલ થઈ રહ્યો છે. 

pic.twitter.com/SH6qjx889V

— CricAddaa (@cricadda) March 17, 2023

પ્રથમ વખત કરી વનડેમાં કેપ્ટનશીપ 
હાર્દિક પંડ્યા એ પહેલી વખત વનડેમાં કેપ્ટન તરીકે ઉતર્યો છે. જણાવી દઈએ કે વનડેમાં ભારતની કેપ્ટનશીપ કરનારો 27મો ખેલાડી બન્યો છે. ભારતના પ્રથમ કેપ્ટન અજીત વાડેકર હતા. ટીમ ઈન્ડિયાનો નિયમિત કેપ્ટન રોહિત શર્મા પારિવારિક કારણોસર ઓસ્ટ્રેલિયા સામેની પ્રથમ વનડેમાં રમી શક્યો ન હતો. આ કારણે હાર્દિકે કેપ્ટનશિપની જવાબદારી સંભાળી હતી. 

ટીમ ઈન્ડિયાએ મેચ જીતી
પહેલા બેટિંગ કરતા ઓસ્ટ્રેલિયાએ ભારતીય ટીમને 189 રનનો ટાર્ગેટ આપ્યો હતો જેને ભારતીય ટીમે 5 વિકેટ ગુમાવીને હાંસલ કરી લીધો હતો. ઓસ્ટ્રેલિયાએ 7.5 ઓવરમાં 19 રનમાં છેલ્લી છ વિકેટ ગુમાવી હતી. ભારત તરફથી મોહમ્મદ શમી અને મોહમ્મદ સિરાજે  3-3 વિકેટ લીધી હતી. બેટિંગમાં ભારતની શરૂઆત સારી રહી ન હતી પણ મિડલ ઓવરમાં કેએલ રાહુલે 75 રન અને રવિન્દ્ર જાડેજાએ 45 રન બનાવી ભારતીય ટીમને જીત અપાવી હતી.