CRIME News / અમદાવાદમાં વ્યાજખોરોના આતંક : લાખોની રકમ અને કરોડોની ઉઘરાણી છતાં પરિવાર ભયના ઓથારમાં

• યુવાન કંટાળીને ગૂમ થયો
• વ્યાજખોરોના આતંક
• ૩૯ લાખ ચૂકવી દીધા હોવા છતાંય વ્યાજખોર ત્રિપૂટીએ બીજા ૨૦ લાખની માગણી કરી

ગઇ કાલે ચાંદલોડિયા અને ઘાટલોડિયામાં રહેતા વ્યાજખોરોના ત્રાસ અને ધાકધમકીની બે અલગ અલગ ફરિયાદો સોલા પોલીસ સ્ટેશનમાં નોંધાતા ચકચાર મચી ગઇ છે. 

એક કિસ્સામાં મિત્રને ૧૭ લાખ બહારથી વ્યાજે લેવા માટે યુવક અને સાળાએ બ્લેન્ક ચેક વ્યાજખોરોને આપ્યો હતો. મિત્રએ ૧૭ લાખ લીધા બાદ તેને દેવું થઇ જતાં વ્યાજખોરો યુવક અને તેના સાળા પાસેથી ૧૭ લાખ સામે અઢી કરોડની ઉધરાણી કરી હતી અને ઘરમાં ઘૂસીને કાપી નાખવાની ધમકી આપી હતી. 

૩૯ લાખ ચૂકવી દીધા હોવા છતાંય વ્યાજખોર ત્રિપૂટીએ બીજા ૨૦ લાખની માગણી કરી

બીજા કિસ્સામાં ચાર વર્ષ અગાઉ રૂ.૨૦ લાખની રકમ ૧૦ ટકા વ્યાજે લેનાર યુવકે મૂડી અને વ્યાજ થઈ ૩૯ લાખ ચૂકવી દીધા હોવા છતાંય વ્યાજખોર ત્રિપૂટીએ બીજા ૨૦ લાખની માગણી કરી યુવકના ઘરે જઈ તોડફોડ કરી ધમકી આપી હતી.

યુવાન કંટાળીને ગૂમ થયો

થલતેજના ગુલાબ ટાવર પાસે નંદેશ્વર ટેનામેન્ટમાં રહેતા પલક હર્ષદ પટેલે સોલા પોલીસ સ્ટેશનમાં મૂકેશ દેસાઇ (રહે ઘાટલોડિયા) નામના વ્યાજખોર વિરુદ્ધ ફરિયાદ કરી છે. પલક સાથે તેનો સાળો દીપલ અશ્વિન પટેલ રહે છે. પલક અને દીપલનો મિત્ર મંથન શાહ છેલ્લા કેટલાક સમયથી ધંધામાં નુકસાન જવાથી કયાંક જતો રહ્યો છે.

પલક અને દીપલ પાસે ૧૭ લાખની સામે અઢી કરોડની ઉઘરાણી શરૂ કરી

મંથને ધંધામાં વધુ પૈસાની જરૂર પડતાં તેણે પલકને કહ્યું હતું. જેથી તેણે મૂકેશ દેસાઈ નામના વ્યાજખોર પાસેથી રૂપિયા વ્યાજ પર અપાવવાનું કહ્યું હતું. પલક અને દીપલે મંથનની મદદ કરવા માટે પોતાના ચેક સહી કરીને તારીખ વગરના આપ્યા હતા. જે ચેક પર મૂકેશ દેસાઈએ મંથનને ૧૭ લાખ રૂપિયા આપ્યા હતા. ઓક્ટોબર ૨૦૧૯ સુધી મંથને મૂકેશને બરોબર વ્યાજ ચૂકવ્યું હતુ બાદમાં ધંધામાં નુકસાન જતાં તે ક્યાંક ચાલ્યો ગયો હતો. આથી મૂકેશ દેસાઈએ પલક અને દીપલ પાસે ૧૭ લાખની સામે અઢી કરોડની ઉઘરાણી શરૂ કરી હતી.

પલકની પત્ની અને માતાને અપશબ્દો બોલી ધમકી આપી હતી

મંથન ક્યાંક જતો રહ્યો હોવાના કારણે સિક્યોરિટી પેટે ચેક આપનાર પલક અને દીપલને છેલ્લા એક વર્ષથી અપશબ્દો બોલી ધાકધમકી આપીને મૂકેશ અઢી કરોડની ઉધરાણી કરતો હતો. મંગળવારના રોજ મૂકેશ તેના બે મિત્રોને લઈ પલકના ઘરે પહોંચ્યો હતો અને પલકની પત્ની અને માતાને અપશબ્દો બોલી ધમકી આપી હતી કે પલક અને દીપલને કહી દેજો રૂપિયા ચૂકવી દે નહીં તો કાપી નાખીશું. બીજા દિવસે પણ મૂકેશે ફોન કરી પલકને અપશબ્દો બોલી રૂપિયાની ઉઘરાણી કરતાં સોલા પોલીસ સ્ટેશનમાં ફરિયાદ નોંધાઇ હતી. પોલીસે મૂકેશ દેસાઈ વિરુદ્ધ ગુનો દાખલ કરીને તપાસ શરૂ કરી છે. 

વ્યાજના રૂ.૧૯ લાખ થઈ કુલ ૩૯ લાખની રકમ મૂકેશે ચૂકવી દીધી

તો બીજી ફરિયાદમાં ચાણક્યપુરીમાં રહેતા અને ખાનગી કંપનીમાં એક્ઝિક્યુટિવ તરીકે ફરજ બજાવતા મૂકેશભાઈ તેજભાઈ દેસાઈએ સોલા પોલીસ સ્ટેશનમાં ચાંદલોડિયા ખાતે રહેતા સંજય મફા દેસાઈ, તેના ભાઈઓ કિરણ અને વિપુલ વિરુદ્ધ વ્યાજખોરીની ફરિયાદ કરી છે. ચાર વર્ષ અગાઉ મૂકેશ દેસાઈએ સંજય અને તેના ભાઈઓ પાસેથી ૨૦ લાખ ૧૦ ટકા વ્યાજે લીધા હતા. આ અંગે મૂડી અને વ્યાજના રૂ.૧૯ લાખ થઈ કુલ ૩૯ લાખની રકમ મૂકેશે ચૂકવી દીધી હતી.

પોલીસે ગુનો દાખલ કરીને તપાસ શરૂ કરી

તેમ છતાં સંજય અને તેના ભાઈઓ બુધવારે મૂકેશના ઘરે જઈ વધુ ૨૦ લાખની ઉઘરાણી કરતા હતા. મૂકેશે રૂપિયા આપવાની ના પાડતાે ત્રણેય જણાએ ઘરની બારીઓના કાચ તોડી નાખ્યા અને એક્ટિવા પાડી દીધું હતું. આરોપીઓએ જેમ ફાવે તેમ બોલી આજે તો મૂકેશને જાનથી મારી નાંખવો છે, ઘરની બહાર કાઢો તેમ કહ્યું હતું. મૂકેશે આ મામલે ત્રણેય વિરુદ્ધ સોલા પોલીસ સ્ટેશનમાં ફરિયાદ કરી હતી. જેમાં પોલીસે ગુનો દાખલ કરીને તપાસ શરૂ કરી છે.