મોંઘવારી / ગુજરાતના શિક્ષકો ફરી સરકાર સામે ચડાવશે બાંયો? જુઓ હવે શું કરી માગણી

• મોંઘવારીના ખપ્પરમાં શિક્ષકો પણ 
• મોંઘવારી ભથ્થું વધારવા થઇ માંગણી 
• રાષ્ટ્રીય શૈક્ષિક મહાસંઘે લખ્યો CMને પત્ર 

દેશમાં રાજાની કૂવરીની જેમ દિવસે ન વધે તેટલી રાત્રે વધતી  મોંઘવારીના પરિણામે રાજ્યના  3 લાખથી વધુ શિક્ષકો અને અન્ય  કર્મચારીઓ મુશ્કેલીમાં મુકાઈ ગયા છે.રાષ્ટ્રીય શૈક્ષિક મહાસંઘે રાજ્યના મુખ્યમંત્રીને એક પત્ર લખી આ શિક્ષકો અને અન્ય કર્મીઓ માટે  મોંધવારી ભથ્થું વધારવા માંગણી કરી છે. ઉપરાંત જે મોંઘવારી ભથ્થું વધારવામાં આવે તે કેન્દ્રના ધારા- ધોરણ પ્રમાણેનું  મોંઘવારી ભથ્થુ હોય તેવી માંગ કરી છે.

ત્રણ લાખથી વધુ છે શિક્ષકો 

દેશમાં કાળ-ઝાળ બનેલી મોંઘવારીના કારણે સામાન્ય અને ગરીબીની રેખા હેઠળ જીવતા નાગરિકોનું જીવન દોહ્લ્યું બની ગયું છે.પેટ્રોલ-ડીઝલ,દાળ-શાકભાજી ઉપરાંત ગેસ, સહિતની જીવન જરૂરિયાતની ચીજ-વસ્તુઓ મોંઘી થઇ ગઈ છે. આવા સંજોગોમાં ગુજરાતના 3 લાખથી વધુ શિક્ષકો અને સંલગ્ન કર્મચારીઓ પણ મોંઘવારીના ખપ્પરમાં હોમાઈ રહ્યા છે.ત્યારે રાષ્ટ્રીય શૈક્ષિક મહાસંઘે રાજ્યના મુખ્યમંત્રીને એક પત્ર લખી આ શિક્ષકો અને અન્ય કર્મીઓ માટે  મોંધવારી ભથ્થું વધારવા માંગણી કરી છે. કેન્દ્રની જેમ રાજ્ય સરકાર પણ દિવાળી સમયે  મોઘવારી ભથ્થુ વધારી આપે તેવી માંગ કરાઈ છે. કેન્દ્ર દ્વારા 3 ટકા મોંઘવારી ભથ્થામાં વધારો કરવામાં આવ્યો છે.

મોંઘવારી ભથ્થું વધારી, આપો ન્યાય 

વધતી મોંઘવારીથી જીવન જરૂરી તમામ ચીજ વસ્તુઓ મોંઘી થઇ ગઈ છે. ફળ-ફ્રુટ -દૂધ,શાકભાજી સહીત વાહનવ્યવહાર ભાડા મોંઘા થતા તમામ વસ્તુઓ પર મોંઘવારીની અસર વર્તાઈ રહી છે.આવા સમયે શિક્ષકો અને અન્ય કર્મીઓ સાથે મોંઘવારી ભથ્થા રૂપી ન્યાય થાય તેવી માંગણી કરવામાં આવી છે