ભાગમભાગ / VIDEO : ગાંધીનગરમાં નેતાઓને પોલીસે દોડાવ્યા, હાંફતા હાંફતા ધારાસભ્ય બોલ્યાં, શરમ કરો શરમ

• ગુજરાત વિધાનસભાની બહાર ચોર-પોલીસ જેવા ફિલ્મી દ્રશ્યો 
• ધારાસભ્યોને દોડાવી દોડાવીને પોલીસે પકડ્યા 
• વાવાઝોડામાં વળતર મુદ્દે થઈ રહ્યો હતો વિરોધ 

ગુજરાત વિધાનસભાની બહાર કોંગ્રેસ દ્વારા અનેકવાર વિરોધ કરવામાં આવે અને તે બાદ તે વિરોધ કરનારાઓને પોલીસ અટકાયત કરીને લઈ જાય, દર વખતનો ઘટનાક્રમ છે પરંતુ આજે વિધાનસભાની બહાર આશ્ચર્યજનક દ્રશ્યો જોવા મળ્યા હતા. બોલિવૂડ ફિલ્મોની જેમ પોલીસે કોંગ્રેસના ધારાસભ્યોને દોડાવી દોડાવીને પકડ્યા. 

થોડા દિવસ પહેલા ગુજરાત પર આફત બનીને આવેલા તૌકતે વાવાઝોડા બાદ જે સહાય આપવામાં આવી તેમાં રિસર્વે કરવા માટે કોંગ્રેસ દ્વારા વિરોધ કરવામાં આવી રહ્યો હતો. માછીમારો અને ખેડૂતોને પૂરતું વળતર મળી રહે તે માટે સ્વર્ણિમ સંકુલ-1 પાસે અમરીશ ડેર અને પૂંજા વંશ વિરોધ કરી રહ્યા હતા જેમાં અમિત ચાવડા,પરેશ ધાનાણી સહિતના નેતાઓ પણ સામેલ થયા હતા. જે બાદ પોલીસ અટકાયત કરવામાં આવી અને સર્જાયા ફિલ્મી દ્રશ્યો. અટકાયત બાદ પરેશ ધાનાણીએ એમ પણ કહ્યું કે પોલીસે અમારા પર હુમલો કર્યો છે. 

ભાગમભાગ મચી ગઈ
પોલીસ કોંગ્રેસ નેતાઓની અટકાયત કરવા પહોંચી કે મીડિયાનાં કેમેરાની સામે જ ધારાસભ્યો અને પોલીસની વચ્ચે દોડાદોડી થઈ. અમરીશ ડેર અટકાયતથી બચવા માટે સંકૂલમાં દોડ્યા અને પાછળ પાછળ પોલીસ પણ ગઈ. ભાગમભાગમાં પોલીસે એક એક કરીને ધારાસભ્યોને પકડ્યા. અમરીશ ડેર દોડતા દોડતા પડી ગયા અને પોલીસનાં હાથમાં આવી ગયા. 

આગળ આગળ અમરીશ ડેર, પાછળ પાછળ પોલીસ 
પોલીસે અટકાયત કરતાં અમરીશ ડેરે હાંફતા હાંફતા કહ્યું કે અમે અસરગ્રસ્તો માટે લડીએ છે, પોલીસ સરકારનો હાથો બનવાનું બંધ કરે. 

અમિત ચાવડાની અટકાયત થતાં તેમણે કહ્યું કે કયા કાયદા હેઠળ અમારી અટકાયત કરી રહ્યા છો? અમે કયા કાયદાનો ભંગ કર્યો છે એ તો કહો. અમિત ચાવડાએ કહ્યું કે ગાંધીનાં જ ગુજરાતમાં ગાંધીજીનાં સ્ટેચ્યૂનાં દર્શન પણ નથી કરવા દેતા. 

વિપક્ષનાં નેતા પરેશ ધાનાણીએ કહ્યું કે ખાખી વરદી લાજે એ રીતે સત્તામાં બેઠેલા લોકો પોલીસને પટાવાળા સમજે છે. હવે બસ બહુ થયું, આપણે બીજી આઝાદીની લડાઈનો પ્રયાસ કરી રહ્યા છે. 

પરેશ ધાનાણી SP કચેરીએ વિરોધ કરવા બેઠા, કહ્યું માથાનાં ભાગમાં ઈજા પહોંચી