Good News / MLA-કોર્પોરેટરને લઇ ગુજરાત HCનો મહત્વનો નિર્ણય, શહેરીજનો માટે સારા સમાચાર

સામાન્ય માણસને AMC હોલ કે પાર્ટી પ્લોટમાં સુવિધા ન મળવા મામલે હાઈકોર્ટમાં જાહેર હિતની અરજી થઈ હતી. આ મામલે સુનાવણી દરમિયાન ગુજરાત હાઈકોર્ટે પ્રતિક્રિયા આપી છે કે, AMCના કોમ્યુનિટી હોલ કે પાર્ટી પ્લોટમાં ધારાસભ્ય કે કોર્પોરેટરને હવે પ્રાથમિકતા નહીં આપવામાં આવે. ઓપન એર થિયેટરમાં કાઉન્સિલર કે ધારાસભ્યોને પ્રાથમિકતા નહીં આપી શકાય. હાઈકોર્ટમાં થયેલી જાહેર હિતની અરજીના પગલે હાઇકોર્ટ દ્વારા આ નિર્ણય લેવામાં આવ્યો છે.

મહત્વનું છે કે સામાજીક કામને લઇને જે પાર્ટી પ્લોટ કે કોમ્યુનિટી હોલ ધારાસભ્યો કે કોર્પોરેટરોને આપી દેવામાં આવતા હતાં તેને લઇને સામાન્ય માણસોએ બુકિંગ કરવામાં વેઇટીંગની રાહ જોવી પડતી હતી. ત્યારે તેને લઇને અગાઉ ગુજરાત હાઇકોર્ટમાં જાહેર હિતની અરજી કરવામાં આવી હતી. જેથી હાઇકોર્ટે આજનાં દિવસે બુધવારનાં રોજ આ અરજીને લઇ મહત્વનો નિર્ણય આપ્યો છે. જેમાં હવે ધારાસભ્યો કે કોર્પોરેટરોને પ્રાથમિકતા નહીં આપવામાં આવે પરંતુ હવે સામાન્ય નાગરિકને પ્રાથમિકતા આપવામાં આવશે. એટલે કે આ નિર્ણય ધારાસભ્યો અને કોર્પોરેટર માટે એક ફટકાર સમાન ગણાવી શકાય.

અરજદાર કે સામાન્ય માણસોને પહેલા જે સમયે પાર્ટી પ્લોટની જરૂરિયાત રહેતી હતી તેવા સમયે તેમને પાર્ટી પ્લોટની ફાળવણી કરવાને બદલે ધારાસભ્યોને કે કોર્પોરેટરોને પાર્ટી પ્લોટ ફાળવી દેવામાં આવતા હતા જેથી તેને લઇને અગાઉ વિવાદ પણ સર્જાયો હતો અને તેઓએ ગુજરાત હાઇકોર્ટનાં દ્વાર ખખડાવ્યા હતાં. જેને લઇને ગુજરાત હાઇકોર્ટ દ્વારા નાગરિકોની સુવિધાને લઇને આજે મહત્વનો નિર્ણય લેવામાં આવ્યો છે.