અરજી / અમદાવાદના તૂટેલા રોડ-રસ્તા મામલે HCની ટકોર, 'ચોમાસુ જતું રહેશે તો સત્તાધીશો ફરી ઊંઘી જશે, યોગ્ય સમયે કેસ ચાલે તો...'

• અમદાવાદ શહેરના રોડ-રસ્તાઓ મુદ્દે હાઇકોર્ટની ટકોર
• ચોમાસુ જતુ રહેશે તો સત્તાધીશો ફરી ઊંઘી જશે: HC
• સુનાવણીમાં વિલંબ કરીશુ તો રોડની સ્થિતિ નહીં ખબર પડે: HC

અમદાવાદના તૂટેલા રોડ-રસ્તાઓ અને રખડતા ઢોર મામલે કરવામાં આવેલી કન્ટેમ્પટની અરજીની સુનાવણીમાં સરકાર પક્ષે મુખ્ય સરકારી વકીલ હાજર ન રહેતા મુદ્દતની માંગણી કરાતા હાઇકોર્ટે નારાજગી વ્યકત કરી હતી. હાઇકોર્ટે ટકોર કરતા કહ્યું કે, 'ચોમાસું જતુ રહેશે સત્તાધીશો ફરી ઊંઘી જશે. સુનાવણીમાં વિલંબ કરીશું તો રોડની સ્થિતિ ખબર નહીં પડે. યોગ્ય સમયે કેસ ચાલે તો કોર્ટ નિર્દેશોનું પાલન કરાવી શકે.''

હાઇકોર્ટે વધુ સુનાવણી 25 જુલાઇ પર મુલતવી રાખી

હાઇકોર્ટે વધુ સુનાવણી 25 જુલાઇ પર મુલતવી રાખી છે. તમને જણાવી દઇએ કે, બિસ્માર રોડ-રસ્તા અને રખડતા ઢોર મામલે હાઇકોર્ટે કરેલા અનેક નિર્દેશોનું પાલન નહીં થતા કન્ટેમ્પટ પિટિશન કરાઇ. અરજદાર તરફથી એવી દલીલ કરાઇ હતી કે, લીગલ સર્વિસ ઓથોરિટીએ 500 પાનાનો રિપોર્ટ ચીફ જસ્ટિસની ખંડપીઠ સમક્ષ રજૂ કર્યો છે. જેની પર યોગ્ય સમયે સુનાવણી નહીં યોજાય તો તેનો મતલબ નહીં રહે. અત્યારે ચોમાસામાં જ રસ્તાની સાચી સ્થિતિનો ખ્યાલ આવશે. ચોમાસા બાદ તો સત્તાધીશો ફરી ઉંઘી જશે. મહત્વનું છે કે, થોડા દિવસ પહેલા અરજદાર તરફથી સુનાવણી ઝડપથી ચલાવવા અરજી કરાઇ હતી.

કન્ટેમ્પ્ટ અરજીમાં પણ વિલંબની દલીલ

અરજદાર તરફથી એવી દલીલ પણ કરાઇ હતી કે, ઘણા વર્ષથી પૂર્વ જજીસે તેના પર કેટલાંક સ્પષ્ટ નિર્દેશો આપ્યા છે.પરંતુ તેનું પાલન નહીં થતા કન્ટેમ્પ્ટ અરજી કરવી પડી. પરંતુ હવે કન્ટેમ્પ્ટની અરજીમાં પણ વિલંબ થઇ રહ્યો છે.