રાજકારણની રેસ / હવે ગુજરાત કોંગ્રેસ કોના હાથમાં? નવા પ્રમુખ અને વિપક્ષ નેતા માટે આ નામો મોખરે

• કોંગ્રેસમાં પ્રદેશ અધ્યક્ષ અને વિપક્ષ નેતાની ચર્ચા તેજ 
• પ્રદેશ અધ્યક્ષના સંભવિતોમાં અર્જુન મોઢવાડિયા આગળ 
• ભરતસિંહ સોલંકી પણ પ્રદેશ પ્રમુખની રેસમાં 

ગુજરાત સ્થાનિક સ્વરાજ્યની ચૂંટણી હાર્યા બાદ કોંગ્રેસના પ્રમુખ અમિત ચાવડા અને વિપક્ષના નેતા પરેશ ધાનાણીએ પોતાના પદ પરથી રાજીનામું આપી દીધું છે ત્યારે હવે કોંગ્રેસમાં નવા અધ્યક્ષ અને પ્રદેશ પ્રમુખની વરણીને લઈને જાત ભાતની ચર્ચાઓ થઈ રહી છે. 

આ નામો પર થઈ રહી છે વિચારણા

કોંગ્રેસમાં પ્રદેશ અધ્યક્ષ અને વિપક્ષ નેતાની ચર્ચાઓ તેજ થઇ ગઇ છે. પ્રદેશ અધ્યક્ષના સંભવિતોમાં અર્જુન મોઢવાડિયા આગળ છે.. ભરતસિંહ સોલંકી પણ પ્રદેશ પ્રમુખની રેસમાં છે. તો ઠાકોર નેતા જગદીશ ઠાકોરનું નામ પણ રેસમાં છે.

કોણ કોણ છે રેસમાં?

જોકે હાઇકમાન્ડનો આદેશ થાય તો શક્તિસિંહ ગોહિલ અધ્યક્ષ બની શકે છે. તેમજ યુવા ચહેરા તરીકે ઇન્દ્રવિજયસિંહ ગોહિલનું પણ નામ ચર્ચામાં છે. જ્યારે નેતા વિપક્ષ માટે શૈલેષ પરમારના નામની ચર્ચા ચાલી રહી છે. OBC નેતા તરીકે પુંજાભાઈ વંશ, આદિવાસી નેતા તરીકે અશ્વિન કોટવાલ અને પાટીદાર તરીકે વિરજી ઠુમ્મરના નામની પણ ચર્ચા થઇ રહી છે.

જોકે જે વિસ્તારના પ્રદેશ અધ્યક્ષ બને ત્યાંના નેતા વિપક્ષ બનશે નહીં. જ્ઞાતિ સમીકરણોને ધ્યાને લઇ બંને નેતાની પસંદગી થશે. માર્ચના અંત સુધીમાં પ્રદેશ અધ્યક્ષ, નેતા વિપક્ષની પસંદગી થશે.

2021માં કોંગ્રેસની કારમી હાર

ગુજરાતની 6 મહાનગરપાલિકાઓની ચૂંટણીઓમાં ભાજપની ભવ્ય જીત બાદ હવે ફરી નગરપાલિકાઓ, તાલુકા પંચાયતો અને જિલ્લા પંચાયતોમાં ભાજપને બહુમતિ મળી છે. 28 ફેબ્રુઆરીએ 81 નગરપાલિકા, 31 જિલ્લા પંચાયત અને 231 તાલુકા પંચાયતો માટે ચૂંટણી યોજાઇ હતી. જેની આજે(2 માર્ચ) મતગણતરી કરવામાં આવી છે. જેમાં ભાજપે 31 માંથી 31 જિલ્લા પંચાયતો પર કબજો કરી લીધો છે. જ્યારે તાલુકા પંચાયતની 231  બેઠકોમાંથી 196 બેઠકો પર ભાજપની જીત થઇ છે. તો નગરપાલિકાની 81 બેઠકોમાંથી 79 બેઠકો પર ભાજપનો વિજય થયો છે

ગત ચૂંટણીમાં કોંગ્રેસે જિલ્લા અને તાલુકામાં પંચાયતમાં વધુ બેઠકો જીતી હતી

મહત્વનું છે કે 2015ની ચૂંટણીમાં 31માંથી 23 જિલ્લા પંચાયત કોંગ્રેસે કબજે કરી હતી. 31માંથી માત્ર 8 જિલ્લા પંચાયત જ ભાજપના ફાળે આવી હતી. 231 તાલુકા પંચાયતમાંથી 146 કોંગ્રેસ અને 85માં ભાજપને જીત મળી હતી. 51 નગરપાલિકામાંથી ભાજપને 37 અને કોંગ્રેસનો 14માં વિજય થયો હતો.