સ્થાનિક સ્વરાજની ચૂંટણીમાં કોંગ્રેસને આજે ગુજરાતમાંથી સ્પષ્ટ જાકારાનો જનાદેશ મળ્યો છે, ગુજરાતની 6 મહાનગરપાલિકામાં ભાજપે ક્લીનસ્વીપ મારીને કોંગ્રેસનો વ્હાઇટવોશ કર્યો હતો.
અમિત ચાવડાના ભાઈ પ્રશાંત ચાવડા ભાજપમાં જોડાયા
પૂર્વ સાંસદ લાલસિંહ વાદોડીયાની હાજરીમાં ભાજપનો ખેસ પહેર્યો
બોરસદ પાલિકાના વોર્ડ 9ના ચૂંટણી પ્રચાર દરમિયાન જોડાયા ભાજપમાં
આજના પરિણામ પછી કોંગ્રેસમાં ધડાધડ રાજીનામાં પડવાના શરૂ થઈ ગયા હતા અને જેના પછી ગુજરાત કોંગ્રેસ પ્રમુખ અમિત ચાવડાનું નિવેદન પણ આવ્યું હતું, જો કે હવે એક મોટી ઘટનામાં આજે કોંગ્રેસ પ્રમુખ અમિત ચાવડાના કૌટુંબિક ભાઈ પ્રશાંત ચાવડાએ ભાજપનો ખેસ ધારણ કર્યો હતો, જેમાં આણંદમાં બોરસદ પાલિકાના પ્રચાર વખતે ભાજપના રાજ્યસભાના પૂર્વ સાંસદ લાલસિંહ વડોદિયાએ ખેસ પહેરાવીને તેમનું સ્વાગત કર્યું હતું.
અમિત ચાવડાના કૌટુંબિક ભાઇ છે પ્રશાંત ચાવડા
નોંધનીય છે કે હજુ પણ સ્થાનિક સ્વરાજની ચૂંટણીઓ ગુજરાતમાંપૂરી થઈ નથી અને આગામી 28 ફેબ્રુઆરીના રોજ ગુજરાતમાં સ્થાનિક સ્વરાજની ચૂંટણીને લઈને બીજા તબક્કાનું મતદાન 28 તારીખે થવા જઈ રહ્યું છે, જેમાં ગુજરાતની નગરપાલિકાઓ, તાલુકા અને જિલ્લા પંચાયતોની ચૂંટણી યોજાશે.
મહત્વનું છે કે આજના પરિણામ પછી પ્રદેશ કોંગ્રેસ અધ્યક્ષ અમિત ચાવડાએ ચૂંટણીમાં હાર સ્વીકારી છે. 6 મનપાના પરિણામ મુદ્દે કોંગ્રેસ પ્રદેશ અમિત ચાવડાએ કહ્યું કે જનતાના જનાદેશનો સ્વીકાર કરીએ છીએ.સાથે જ તેમણે એ વાત પણ કબૂલી કે અપેક્ષા કરતા વિપરીત પરિણામ આવ્યા એટલે શહેરી વિસ્તારમાં સંગઠન મજબૂત કરવા પ્રયાસ કરીશું, અને શહેરી વિસ્તારના પ્રશ્નો ઉજાગર કરવા મહેનત કરીશું, અમિત ચાવડાએ તમામ મતદારોનો આભાર માન્યો હતો. નોંધનિય છે કે રાજકોટ અને સુરતમાં કોંગ્રેસે સૌથી ખરાબ પ્રદર્શન કર્યું છે. અમદાવાદ, વડોદરામાં પણ કોંગ્રેસની બેઠકોમાં મોટો ઘટાડો જોવા મળે છે.