અટકળો / હાર્દિક પટેલના ભાજપમાં જોડાવવાને લઈ સૌથી મોટા સમાચાર, ગુજરાત ભાજપે વાતને આપ્યો રદિયો, જુઓ મહામંત્રીએ શું કહ્યું?

• હાર્દિક પટેલ મુદ્દે ભાજપ મહામંત્રી પ્રદીપસિંહ વાઘેલાનું નિવેદન
• હાર્દિક અમારો સંપર્ક કર્યો નથીઃ પ્રદીપસિંહ વાઘેલા

હાર્દિક પટેલના કોંગ્રેસમાંથી રાજીનામાં બાદ હાર્દિક પટેલ ભાજપમાં જાય છે તેવી શક્યતાઓ વર્તાઇ રહી છે. જો હાર્દિક ભાજપમાં જાય અને નરેશ પટેલ કોગ્રેસમા જોડાય તો ગુજરાતની રાજનીતિમાં નવા સમિકરણો રચાય શકે તેમ છે. જેમાં આગામી ચુંટણીમાં લઉવા અને કડવા પટેલના મત વેચાઈ શકે છે. પણ હજુ ન તો હાર્દિકે બંધ બાજી ખોલી છે ન નરેશ પટેલે બંને આગામી સપ્તાહ સુધીમાં કઈ વિચારધારા સાથે જોડાશે તેનો ફોડ પાડશે. હાલનો સૌથી વધુ હાર્દિક પટેલ ભાજપમાં જોડાય છે તેવી વાતા દરેક ગામના ચોરે થઈ રહી છે.

હાર્દિક અમારો સંપર્ક કર્યો નથીઃ પ્રદીપસિંહ વાઘેલા
ત્યારે ગુજરાત ભાજપના મહામંત્રી હાર્દિક પટેલ મુદ્દે મહત્વનું નિવેદન આપ્યું છે. તેઓએ સ્પષ્ટ રીતે કહ્યું હતું કે હાર્દિક પટેલે ભાજપનો સંપર્ક કર્યો નથી. એટલે હાલમાં હાર્દિક પટેલના ભાજપમાં જોડાવાનો પ્રશ્ન નથી. અમે પણ હાર્દિક પટેલનો સંપર્ક કર્યો નથી. મહત્વનું છે કે ચૂંટણી પહેલાની આ રાજનીતિ છે પડ્યા બોલ ઝીલવાએ અશક્ય વસ્તુ છે. અંદરખાને થતાં સેટિંગને કોઈ પણ પાર્ટી સપૂર્ણ રીતે ઉજાગર કરતી નથી. એક તરફ ખાસ સૂત્રો કહી રહ્યા છે કે હાર્દિક ભાજપમાં જોડાય તેવી શક્યતા 70% છે જ્યારે આપમાં જોડાય તેવી સંભાવના 30% છે ત્યારે અંદરખાને શું ખિચડી રંધાય છે એતો આવનાર સમયમાં ખબર પડશે.

કઈ પાર્ટીમાં હાર્દિકે જોડાવું તેનો વ્યક્તિગત નિર્ણય: પ્રદીપસિંહ વાઘેલા
હાર્દિકે ભાજપમાં સામેલ થવુ કે નહી તે હાર્દિકનો વ્યક્તિગત નિર્ણય છે. ભાજપના આ પ્રકારના નિવેદનથી એ સ્પષ્ટ થયુ છે કે, હાર્દિક માટે ભાજપના દ્વાર ખુલ્લા જ છે. તે ગમે ત્યારે ભાજપમાં સામેલ થાય તો પાર્ટીના કોઈ પણ નેતાને વાંધો નથી. અત્રે ઉલ્લેખનીય છે કે, લાંબા સમયથી હાર્દિક કોંગ્રેસ છોડી ભાજપમાં સામેલ થશે તેવી અટકળો લાગી રહી હતી. અંતે હાર્દિકે કોંગ્રેસ છોડી દીધી છે. એવામાં VTV.COM દ્વારા લેવામાં આવેલા ઈન્ટરવ્યૂમાં પણ હાર્દિકે સંકેત આપ્યા હતા કે, તે ભાજપમાં સામેલ થઈ શકે છે.

એક સપ્તાહમાં હાર્દિક પટેલ કરશે મોટું એલાન 
VTVGujarati.com સાથે ખાસ વાતચીતમાં હાર્દિક પટેલે વારંવાર કહ્યું કે તેઓ કઈ પાર્ટીમાં જોડાવવાના છે તે નક્કી થઈ જ ગયું છે અને તેમનો આગળનો આખો પ્લાન પણ તૈયાર જ છે, બસ યોગ્ય સમય આવે  એટલે સંપૂર્ણ માહિતી સાથે કઈ પાર્ટીમાં શા માટે જોડાઈ રહ્યો છું તેની સંપૂર્ણ માહિતી સાથે જે તે પાર્ટીમાં જોડાઈશ. તેમણે વધુમાં કહ્યું હતું કે જનતાના કામમાં મોડું કરવાનું જ ન હોય, આ જ મહિનામાં હું તમામ એલાન કરી દઈશ. 

હાર્દિકે આડકતરી રીતે ભાજપમાં જોડાવાના આપ્યા સંકેત
હાર્દિક પટેલે ઈન્ટરવ્યૂમાં જેટલી પણ વાતો કરી તેમાં ખાસ કરીને ભાજપના મુદ્દાઓ પર નરમ વલણ દર્શાવ્યું હતું. રામ મંદિર અને કલમ 370નો ઉલ્લેખ કરીને કહ્યું હતું કે જનતા આ મુદ્દાઓને પસંદ કરે છે અને ભાજપને જીતાડે છે એમાં સ્વીકાર કરવો રહ્યો. જનતાનો મૂડ આ જ છે અને જનતાનો મૂડ જે હશે તે તરફ જ હું નક્કી કરવાનો છું. હાર્દિકના આ નિવેદનથી સંકેત એ જ દેખાઈ રહ્યો છે કે આગામી સપ્તાહ સુધીમાં પાટીદાર નેતા કેસરિયો ધારણ કરી શકે છે.

શું નરેશ પટેલના નિર્ણય બાદ હાર્દિક લેશે નિર્ણય?
હાર્દિક પટેલ કડવા પાટીદાર સમાજમાંથી આવે છે. જ્યારે નરેશ પટેલ લેઉવા પાટીદાર સમાજમાંથી આવે છે. અને ઉત્તર ગુજરાતમાં સૌથી વધુ કડવા પટેલની વસ્તી છે. જ્યારે સૌરાષ્ટ્ર અને સુરતમાં લઉવા પટેલની વસ્તી વધારે છે. હાર્દિક ભાજપમાં જોડાય તો ઉત્તર ગુજરાતમાં ભાજપને ફાયદો થઈ શકે. પરંતુ જો નરેશ પટેલ કોગ્રેસમાં જોડાય તો સૌરાષ્ટ્રમાં કોગ્રેસને ફાયદો થાય તેવી શક્યતાઓ રહેલી છે  જેની પાછળ કારણ એ છે કે, હાર્દિકનું વર્ચસ્વ ઘટી જવાના અણસાર રહે છે. આમ જો હાર્દિક અને નરેશ પટેલ એકબીજાની વિરુદ્ધમાં જાય તો સ્વાભાવિક રીતે પાટીદાર મતોમાં પણ ભાગલા પડી શકે તેમ છે.  આથી હાર્દિક હાલ વેઇટ એન્ડ વોચ મોડમાં થોડા દિવસનો સમય લઈ રહ્યો છે. જેથી કઈ પાર્ટીમાં પોતાનું ચોગઠું બેસાડવું તેની ખબર પડે.