રાજનીતિ / વિધાનસભા ચૂંટણી પહેલાં AIMIMને મોટો ઝટકો, અસદુદ્દીન ઓવૈસીની અમદાવાદ મુલાકાત બાદ ઉપપ્રમુખનું રાજીનામું

• ગુજરાત AIMIMના ઉપપ્રમુખ શમશાદખાન પઠાણે પાર્ટી છોડી
• કહ્યું 'પઠાણના રાજીનામા બાદ AIMIM ગુજરાતમાં રાજીનામાનો સિલસિલો શરૂ'
• ગુજરાતના વડા સાબિર કાબલીવાલા પર આરોપ લગાવ્યો

ઓલ ઈન્ડિયા મજલિસ-એ-ઈત્તેહાદુલ મુસ્લિમીન (AIMIM) ના ઉપપ્રમુખ શમશાદ પઠાણે રવિવારે જાહેરાત કરી હતી કે, તેઓએ પાર્ટી છોડી દીધી છે. પઠાણે કહ્યું કે, તેમણે AIMIM ગુજરાતના પ્રમુખ સાબિર કાબલીવાલાના કારણે આ નિર્ણય લીધો હતો. જેમણે એવો દાવો કર્યો હતો કે, તેમને ગુજરાતમાં પાર્ટીને મજબૂત કરવામાં રસ નથી. પઠાણે કહ્યું કે, "મે પાર્ટીના પ્રાથમિક સભ્યપદેથી રાજીનામું આપી દીધું છે. હું ઈદ પછી મારા રાજકીય ભવિષ્ય વિશે નિર્ણય લઈશ.'

આ છે નારાજગીનું કારણ

નારાજગીના કારણો વિશે પૂછવામાં આવતા પઠાણે આક્ષેપ કર્યો હતો કે, “હાં, મે રાજીનામું આપી દીધું છે. તેઓએ AIMIM ના ગુજરાતના વડા સાબિર કાબલીવાલા પર આરોપ લગાવ્યો કે તેમને પાર્ટી ચલાવવામાં રસ નથી, કોઈ રોડ મેપ નથી, કોઈ વ્યૂહરચના નથી. તેઓ માત્ર ભાજપને મદદ કરી રહ્યાં છે, આવી પાર્ટી માટે મહેનત કરવાનો કોઈ અર્થ નથી.'

તેઓએ ફેસબુક પોસ્ટ કરીને જણાવ્યું હતું કે, 'AIMIM ગુજરાત ઉપપ્રમુખ એડવોકેટ શમશાદ પઠાણના રાજીનામા બાદ AIMIM ગુજરાતમાં રાજીનામાનો સિલસિલો શરૂ છે.'

વિધાનસભા ચૂંટણી પહેલાં AIMIMને આંચકો

પઠાણને અગાઉ AIMIM ના અમદાવાદ શહેર પ્રમુખ તરીકે નિયુક્ત કરવામાં આવ્યા હતાં અને બાદમાં તેમને પાર્ટીના રાજ્ય ઉપાધ્યક્ષ બનાવવામાં આવ્યા હતાં. તેઓનું રાજીનામું AIMIM પ્રમુખ અસદુદ્દીન ઓવૈસીની ગુજરાતમાં આગામી વિધાનસભાની ચૂંટણી માટે પાર્ટીની તૈયારીઓની દેખરેખ રાખવા માટે અમદાવાદની મુલાકાત લીધાના થોડાં દિવસો બાદ આવ્યું છે.