અમદાવાદ / સરદારનગરની બેન્કમાં ગાર્ડે કર્યું ફાયરિંગ, મહિલા કર્મચારી ઇજાગ્રસ્ત, જાણો સમગ્ર મામલો

• સરદારનગરમાં SBI બેંકના સિક્યુરિટી ગાર્ડે કર્યું ફાયરિંગ
• ખુરશી પર બેસવા બાબતે સિકયુરીટી ગાર્ડે ફાયરીંગ કર્યું
• ફાયરીંગમાં એક મહિલા થઈ ઈજાગ્રસ્ત, ગાર્ડની અટકાયત

અમદાવાદમાં દિવસે દિવસે ફાયરિંગ અને લૂંટની ઘટના વધી રહી છે ત્યારે વધુ એક ફાયરિંગની ઘટના સામે આવી છે. જેમાં સરદારનગરમાં SBI બેંકના સિક્યુરિટી ગાર્ડે ફાયરિંગ કર્યું હોવાનું સામે આવ્યું છે. શહેરના સરદારનગરમાં મહારથી સોસાયટી નજીક આવેલી SBI બેન્કમા સિકયુરીટી ગાર્ડે રાયફલથી એક રાઉન્ડ ફાયરીંગ કરતા બેન્કમા ફરજ બજાવતી યુવતી સુમન કોળીને ગોળી વાગતા ગંભીર રીતે ઈજાગ્રસ્ત થઈ છે.

શું હતી સમગ્ર ઘટના ? 

સરદારનગરમાં મહારથી સોસાયટી નજીક આવેલી એસ.બી.આઇ બેંકમાં એરપોર્ટ પોલીસ મથકમાં કર્મચારી તરીકે કામ કરતા રાજેન્દ્રસિંહ તેની બાળકી સાથે બેંકમાં કામ માટે ગયા હતા. જ્યાં તેમની બાળકી સિક્યુરિટીની ખુરશી પર બેઠી હતી જે બાબતે સિક્યુરિટી અને રાજેન્દ્રસિંહ વચ્ચે ઉગ્ર બોલાચાલી થઈ હતી. જે બાદમાં સિક્યુરિટી દ્વારા એક રાઉન્ડ ફાયરિંગ કરવામાં આવ્યું હતું. જેમાં બેંકમાં કામ કરતી સુમન નામની યુવતીને ઇજા પહોંચી હતી.

પોલીસે સિક્યુરિટી ગાર્ડની અટકાયત કરી 

આ ઘટનાની જાણ થતાં જ સરદારનગર પોલીસ સ્ટેશનનો કાફલો ઘટના સ્થળે દોડી આવ્યો હતો. એરપોર્ટ પોલીસે બેન્કનાં અન્ય કર્મચારીઓ તેમજ અધિકારીની પણ પૂછપરછ હાથ ધરાઇ છે. પોલીસે બેન્કના સીટીવીટી ફુટેજ મેળવી સિક્યુરિટી ગાર્ડની અટકાયત કરી તેના વિરૂદ્ધ ગુનો નોંધી વધુ તપાસ હાથ ધરી છે. 

આવેશમાં આવી ફાયરિંગ કર્યું 

અમદાવાદ શહેરમાં સરદારનગરમાં આવેલી SBI બેન્કના સિક્યુરિટી ગાર્ડે ફાયરિંગ કર્યું છે. સિક્યુરીટી ગાર્ડ સાથે સામાન્ય બોલાચાલી થઈ હતી. આ દરમ્યાન સિક્યુરિટી ગાર્ડે આવેશમાં આવીને ફાયરિંગ કર્યું હતું. હાલમાં ઇજાગ્રસ્ત મહિલાને સિવિલ હોસ્પિટલમાં સારવાર અર્થે ખસેડવામાં આવી છે.