આદેશ / GTUએ પરિપત્ર જાહેર કરીને વિદ્યાર્થીઓને આપ્યા ત્રણ વિકલ્પ, આ કારણે વિદ્યાર્થીઓ મૂંઝવણમાં મુકાયા

• GTUએ પરિપત્ર કરીને વિદ્યાર્થીઓને પરીક્ષા માટે ત્રણ વિકલ્પ આપ્યા
• જુલાઈ-ઓગસ્ટમાં ઓનલાઈન પરીક્ષા માટે GTUનો પરિપત્ર 
• ઓનલાઈનનો વિકલ્પ પસંદ ન કરે તો સપ્ટેમ્બરમાં ફરજિયાત ઓફલાઈન પરીક્ષા

જુલાઈ-ઓગસ્ટમાં યોજાનારી ઓનલાઈન પરીક્ષા માટે GTUએ પરિપત્ર બહાર પાડીને ત્રણ વિકલ્પ આપ્યા છે. ઓનલાઈનનો વિકલ્પ પસંદ ન કરે તો સપ્ટેમ્બરમાં ફરજિયાત ઓફલાઈન પરીક્ષા આપવાની રહેશે. હાલ કોરોનાની મહામારીના કારણે તમામ પરીક્ષાઓ રદ્દ કરાયેલી છે. પરીક્ષા માટે વિદ્યાર્થીઓને ગેજેટમાં 512 KBPSની સ્પીડ ફરજિયાત જોઈશે તેવો આદેશ અપાયો છે. ઈન્ટરનેટ ન હોય તેવા વિદ્યાર્થીઓ માટે કોલેજને વાઈફાઈની વ્યવસ્થા કરવા ખાસ આદેશ કરવામાં આવ્યો છે.

GTU હેલ્પ ડેસ્ક પર મદદ મળે?

ઓનલાઈન પરીક્ષાની વિગતવાર ગાઈડલાઈન ન બહાર પાડતા વિદ્યાર્થીઓ મુંઝવણમાં મુકાયા છે. પરીક્ષા વખતે ઈન્ટરનેટ કનેક્ટિવીટીના પ્રશ્નો થાય તો રી-લોગીન થશે કે કેમ? આ ઉપરાંત અનેક પ્રકારના પ્રશ્નો ઉભા થયા છે તે મામલે કોઈ સ્પષ્ટતા કરવામાં આવી નથી.

GTU હેલ્પડેસ્ક પર વિદ્યાર્થીઓ ફોન કરી રહ્યાં છે પણ કોઈ જવાબ નથી મળતો. પરીક્ષાને ગણતરીના દિવસો બાકી છે ત્યારે અધૂરી માહિતીથી GTUના વિદ્યાર્થીઓ મૂશ્કેલીમાં મુકાયા છે.

30 જુલાઈથી ઓનલાઇન અને 17 ઓગસ્ટથી ઓફલાઇન પરીક્ષા યોજાશે

GTUએ આગામી પરીક્ષાની તારીખો જાહેર કરી હતી. આ પરીક્ષા 30 જુલાઇથી ઓનલાઇન શરૂ થશે. તો 17 ઓગસ્ટથી ઓફલાઇન પરીક્ષા શરૂ થશે. વિશેષ પરીક્ષા સપ્ટેમ્બર મહિનામાં યોજાશે.