મોટો નિર્ણય / કેટલાંક રેસ્ટોરન્ટ માલિકો સરકારને ઉલ્લુ બનાવતા હતા, કાઉન્સિલે નક્કી કર્યું હવે ફૂડ ડિલિવરી કંપની વસુલશે GST

• આજે GST કાઉન્સિલની મળી બેઠક 
• દવાઓ અને ઓનલાઈન ફૂડ ઓર્ડર પર લેવાયો મોટો નિર્ણય 
• કોઈ નવો ટેક્સ નહીં પરંતુ પેટર્ન બદલાઈ 

ઓનલાઈન ફૂડ ઓર્ડર મામલે લેવાયો મોટો નિર્ણય 
આજે GST કાઉન્સિલની બેઠકમાં કેટલાય મોટા નિર્ણયો લેવામાં આવ્યા છે જેમા કોરોનાની દવાઓ પર રાહત આપવામાં આવી છે ત્યારે ફૂડ ડિલિવરી એપને લઈને પણ એક મોટો નિર્ણય કરવામાં આવ્યો છે. કેન્દ્રીય નાણામંત્રી નિર્મલા સીતારમણે એલાન કરતાં કહ્યું કે હવે ડિલિવરી એપ GST વસૂલ કરશે. તેમણે કહ્યું કે રેસ્ટોરન્ટની જગ્યાએ હવે ફૂડ ડિલિવરી એપને GST ભરવું પડશે. તેમણે કહ્યું કે વર્તમાનમાં આ એપ Tax Collected at Sourceનાં રૂપમાં નોંધાયેલી છે. 

કોઈ નવો ટેક્સ નથી, માત્ર રેસ્ટોરન્ટની જગ્યાએ જે તે App ટેક્સ ભરશે 
નોંધનીય છે કે સમગ્ર મામલે કેન્દ્રનાં મોટા અધિકારીએ સ્પષ્ટતા પણ કરીને કોઈ નવા ટેક્સની જાહેરાત કરવામાં આવી નથી. તેમણે કહ્યું કે જ્યારે ગ્રાહક ભોજન મંગાવે છે ત્યારે આ ટ્રાન્ઝેક્શનમાં રેસ્ટોરન્ટ ટેક્સ આપી રહ્યો છે પરંતુ સરકારને જાણવા મળ્યું કે કેટલાક રેસ્ટોરન્ટ ટેક્સ આપી રહ્યા નથી. તેથી હવે નિર્ણય કરવામાં આવ્યો છે કે જો તમે કોઈ ઓર્ડર આપો છો તો જે તે એપ GST વસૂલ કરશે અને ભરશે. તેમણે કહ્યું કે કેટલાક રેસ્ટોરન્ટમાં ટેક્સ ચોરીની ઘટનાઓ સામે આવી છે. 

મિડલ ક્લાસને મોંઘવારીમાં કોઈ રાહત નહીં, પેટ્રોલ મોંઘું જ રહેશે
કોરોના વાયરસ મહામારીની સાથે સાથે દેશ અત્યારે મોંઘવારીનો માર સહન કરી રહ્યો છે. દેશભરમાં પેટ્રોલ અને ડીઝલનાં ભાવ વધવાના કારણે જીવન જરરઉઈય જરૂરિયાતની વસ્તુઓનાં ભાવમાં વધારો આવ્યો છે. એવામાં મોદી સરકાર પાસેથી આશા હતી કે આજે પેટ્રોલ ડીઝલની કિંમતો પર કોઈ નિર્ણય લેવામાં આવશે. છેલ્લા ઘણા દિવસથી અટકળો હતી કે આજે GSTની કાઉન્સિલની બેઠકમાં પેટ્રોલ અને ડીઝલને GSTનાં દાયરામાં લઈને અવાય તેવો નિર્ણય લેવામાં આવશે જોકે નાગરિકોને હાલ તો કોઈ જ રાહત મળવાની નથી. બેઠક બાદ દેશનાં નાણામંત્રી નિર્મલા સીતારમણે એલાન કરતાં કહ્યું કે પેટ્રોલ અને ડીઝલને અત્યારે GSTમાં લાવવા પર વિચાર કરવાનો આ યોગ્ય સમય નથી.  આવકથી જોડાયેલા કેટલાય મુદ્દાઓ પર વિચાર કરવો પડશે. બેઠકમાં આજે પેટ્રોલ અને ડિઝલ મુદ્દે કોઈ ચર્ચા કરવામાં આવી નથી. 

દવાઓ પર મોટું એલાન 
જોકે દવાઓને લઈને આજે નાગરિકોને મોટી રાહત મળી છે. સરકારે એલાન કર્યું છે કે Zologensma અને Viltetso જેવી મોંઘી ઈમ્પોર્ટેડ દવાઓ પર GSTમાં છૂટ આપવામાં આવશે નહીં. નાણામંત્રીએ કહ્યું કે કોરોના વાયરસની સારવાર માટે જે દવાઓ પર છૂટ આપવામાં આવી છે તે દવાઓ પર ટેક્સની છૂટ હવે 31 ડિસેમ્બર સુધી લાગુ રાખવામાં આવશે. નોંધનીય છે કે રેમડેસીવીર જેવી દવાઓમાં જીએસટીની છૂટ આપવામાં આવી છે, જોકે મેડિકલ ઉપકરણોમાં કોઇ છૂટછાટ આપવામાં આવી નથી.