ભારત સરકાર એક મલ્ટિમીડિયા મેસેજિંગ એપ્લિકેશનનું પરીક્ષણ કરી રહી છે જે અનેક રીતે વોટ્સએપ અને ટેલિગ્રામ જેવી હશે. આ એપ્લિકેશનનું કોડ નામ GIMs એટલે કે ગવર્ન્મેન્ટ ઇન્સ્ટન્ટ મેસેજિંગ સિસ્ટમ છે. તેનું પરીક્ષણ હાલમાં ઓડિશામાં થઈ રહ્યું છે અને જીઆઈએમનો ઉપયોગ સૌ પ્રથમ ટ્રાયલ બેઝ પર ભારતીય નૌકાદળ દ્વારા કરવામાં આવશે.
જીઆઈએમએસ એપ્લિકેશનને નેશનલ ઇન્ફર્મેશન સેન્ટર, કેરળ યુનિટ દ્વારા ડિઝાઇન કરવામાં આવી છે અને આ એપ આ જ સેન્ટર દ્વારા તૈયાર કરવામાં આવી રહી છે.આ એપ્લિકેશનનો ઉપયોગ સરકારી કર્મચારીઓ અને સરકારી એજન્સીઓ સત્તાવાર સંદેશાવ્યવહાર માટે કરશે. ગત સપ્ટેમ્બરની શરૂઆતમાં એપલની આઇઓએસ 11 ઓપરેટિંગ સિસ્ટમ માટેનું વર્ઝન જારી કરાયું હતું. અત્યારે તેના એન્ડ્રોઇડ વર્ઝન પર પણ કામ ચાલી રહ્યું છે.
અહેવાલો મુજબ હાલ ઓડિશા સરકારનો નાણાં વિભાગ પાયલોટ પ્રોજેક્ટ હેઠળ આ એપ્લિકેશનનું પરીક્ષણ કરી રહ્યો છે. તમામ કર્મચારીઓના ફોનમાં એપ્લિકેશન ઇન્સ્ટોલ કરવા પણ કહેવામાં આવ્યું છે. ફેસબુક અને વ્હોટ્સએપ જેવી વિદેશી એપ્સના કારણે ડેટાની સુરક્ષા પર વધી રહેલા ખતરાના લીધે આ એપને લોન્ચ કરવાનો નિર્ણય લેવામાં આવ્યો છે.
જીઆઈએમએસ એપ્લિકેશનને એન્ડ-ટુ-એન્ડ એન્ક્રિપ્ટ કરવામાં આવશે એટલે કે એકદમ સિકયોર હશે.જોકે તે ફક્ત વ્યકિતગત ચેટિંગ માટે હશે, ગ્રુપ ચેટિંગ માટે નહીં.આ એપ લોકો માટે પણ લોન્ચ કરાશે કે કેમ તેની કોઇ માહિતી હજુ બહાર આવી નથી. હાલ તો માત્ર સરકારી વિભાગો માટે આ એપ ડેવલપ કરાઇ હોય તેમ લાગી રહ્યું છે.
ઉલ્લેખનીય છે કે, થોડા મહિના પહેલા,ભારતના સામાજિક કાર્યકરો,પત્રકારો સહિત વિશ્વના ઘણા લોકોના વોટ્સએપ એકાઉન્ટ્સની જાસૂસી કરવામાં આવી હતી.વોટ્સએપએ કહ્યું હતું કે પીગાસસ સોફ્ટવેર દ્વારા લોકોની જાસૂસી કરવામાં આવી હતી.