અમદાવાદ / ભૂજની જેલમાં રહીને ખંડણી ચલાવતા ગોવા રબારીના નેટવર્કનો પર્દાફાશ

• ગોવા રબારીનો સાગરિત ઝડપાયો
• ખંડણીખોર ફુલજી ઉર્ફે ફુલો રબારીની ધરપકડ 
• જમીન દલાલ પાસે માગી હતી 1 કરોડની ખંડણી

કુખ્યાત ગુનેગાર ગોવા રબારીનો આતંક ફરી એકવાર સામે આવ્યો છે. ક્રાઈમ બ્રાંચે ભૂજની જેલમાં રહીને ખંડણી ચલાવતા ગોવા રબારીના નેટવર્કનો પર્દાફાશ કર્યો છે. અમદાવાદમાં જમીન દલાલના અપહરણ મામલે ક્રાઈમ બ્રાંચે ગોવા રબારીના સાગરિત ફુલજી ઉર્ફે ફુલો મોતીભાઈ રબારીની ધરપકડ કરી છે. અને ગુનામાં સંડોવાયેલા મહેશ રબારી, નાગજી રબારી, અલ્પેશ હિરવાણી અને કરણ મરાઠી સહિત 9 આરોપી ફરાર છે જેને ઝડપી લેવા કાર્યવાહી હાથ ધરી છે. સાથે જ આરોપીએ ફરિયાદી પાસેથી લૂંટેલી સોનાની ચેન પોલીસે ગોવા રબારીના ઘરેથી કબ્જે કરી છે. 

તેમજ ગોવા રબારી ખંડણીનું નેટવર્ક કેવી રીતે ચલાવે છે તેની તપાસ હાથ ધરી છે. આપને જણાવી દઈએ કે, અમદાવાદના જમીન દલાલ કરણ ભટ્ટનું અપહરણ 10 જેટલા શખ્સોએ કર્યું હતું અને રૂપિયા 1 કરોડની ખંડણી માગી હતી. જેને લઈને પોલીસે તપાસ કરતા ખંડણી ગેંગમાં મુખ્ય સુત્રધાર તરીકે ગોવા રબારીનું નામ સામે આવ્યુ છે.

આરોપીએ જમીન દલાલ પાસેથી 1 કરોડ વસુલવા માટે 14 લાખની સોનાની ચેઈન લૂંટી લીધી હતી અને બાકીના રૂપિયા માટે તેને અને તેના મિત્રની હત્યાની ધમકી પણ આપી હતી.