ટેકનોલોજી / ગૂગલની અનોખી જાહેરાત! Pixel ફોન હેક કરો અને મેળવો આટલા કરોડનું ઈનામ

તમે ટેકનોલોજીમાં એકસપર્ટ છો?  મોબાઇલમાં બગ કે ટેકનિકલ ખામી શોધી શકો છો?તો તમારી પાસે 10 કરોડ રુપિયા કમાવાની તક છે.ગૂગલે તેના પિક્સેલ સીરીઝના સ્માર્ટફોનમાં ભૂલ શોધનારને કે તેને હેક કરનારને 1 મિલિયન ડોલરનું ઇનામ આપવાની જાહેરાત કરી છે. આ ઉપરાંત એન્ડ્રોઇડ વર્ઝનમાં ખામી 50 ટકા વધારાનું બોનસ પણ આપવામાં આવશે. 

બગ બાઉન્ટી પ્રોગ્રામનુ  કુલ ઇનામ 1.5 મિલિયન ડોલર છે. જે આશરે 10,75,72,350 રૂપિયા છે.ગૂગલ બગ બાઉન્ટી પ્રોગ્રામમાં ટોપનું  ઇનામ Google ના ટાઇટન એમ સિક્યોર એલિમેન્ટને તોડવામાં સફળ થનારને આપવામાં આવશે. 

કેમ ઈનામ રાખવામાં આવ્યું છે?

પિક્સેલ સિરીઝના ફોનને સિકયોર બનાવવા તેમાં ખાસ ટાઇટન ચીપ મુકવામાં આવી છે. ગુગલે ઈનામ વિશે કહ્યું છે કે આ ઇનામ એટલા માટે આપવામાં આવે છે કે જેથી ખામીઓને દૂર કરીને ફોન અને ઓપરેટિંગ સિસ્ટમને વધુને વધુ સિકયોર બનાવી શકાય. પિક્સેલ ફોનમાં કોઈ ખામી શોધવા સિવાય, જો એન્ડ્રોઇડ વર્ઝનમાં કોઈ ખામી શોધી બતાવે કે તેને હેક કરે  તેમને પણ ઇનામ મળશે. ગૂગલે આ માટે એક બ્લોગ પોસ્ટમાં લખ્યું છે કે એન્ડ્રોઇડના પ્રિવ્યુ વર્ઝન માટે એક ખાસ પ્રોગ્રામ લોન્ચ કરવામાં આવી રહ્યો છે. જેમાં ખામી શોધનારને  50 ટકા વધારાનું બોનસ આપવામાં આવશે. 

ગૂગલે અગાઉ પણ  એન્ડ્રોઇડ માટે બગ બાઉન્ટી પ્રોગ્રામ સૌ પ્રથમ 2015માં શરૂ કર્યો હતો. આ અંતર્ગત, અત્યાર સુધીમાં લગભગ 4 મિલિયનનું ડોલરના ઇનામ આપવામાં આવ્યા છે. છેલ્લા એક વર્ષમાં ગૂગલની કોઈપણ સિસ્ટમ અથવા સોફટવેરમાં ખામી શોધવા બદલ 1.5 મિલિયન ડોલરના ઇનામ આપવામાં આવ્યા છે.ઉલ્લેખનીય છે કે એપલ,સેમસંગ અને માઇક્રોસોફટ જેવી ટોચની કંપનીઓ પણ ટેકનિકલ ખામી કે બગ શોધનારને લાખો રુપિયાના ઇનામ આપતા હોય છે.