કોરોના વાયરસની મહામારીને જોતાં ગૂગલે પોતાના કર્મચારીઓને ઘરેથી કામ કરવાનો સમય જુલાઈ 2021 સુધી વધારી દીધો છે. ટેક્નોલોજી ક્ષેત્રની આ દિગ્ગજ કંપનીએ સોમવારે એક નિવેદનમાં કહ્યું છે કે તેમના કર્મચારીઓ જુલાઈ 2021 સુધી વર્ક ફ્રોમ હોમ કરી શકશે. આ સંબંધમાં ગૂગલની પેરન્ટ કંપની અલ્ફાબેટ ઈંકના મુખ્ય કાર્યકારી અધિકારી સુંદર પિચાઈએ કર્મચારીઓને એક ઈમેલ પણ મોકલ્યો છે.
કોરોના સંકટમાં મોટી રાહત
ગૂગલે કર્મચારીઓના વર્ક ફોર્મ હોમની સમય મર્યાદા વધારી
કંપનીના કર્મચારીઓ જુલાઈ 2021 સુધી કરી શકશે વર્ક ફ્રોમ હોમ
ઇમેલમાં સુંદર પિચાઈએ જણાવ્યું છે કે કર્મચારીઓને આગળના પ્લાનિંગ કરવા માટે અમે વૈશ્વિક સ્તરે વર્ક ફ્રોમ હોમની સુવિધાનો વિકલ્પ 30 જુલાઈ 2021 સુધી વધારી રહ્યા છે. આ એ વ્યક્તિઓ માટે છે જેમને માટે ઓફિસથી કામ કરવું જરૂરી નથી. એક અમેરિકી રિપોર્ટમાં કહેવાયું છે કે સુંદર પિચાઈએ આ નિર્ણય ગૂગલના કેટલાક પ્રમુખ અધિકારીઓના સૂચનના આધારે પોતે લીધો છે.
કોરોના મહામારીમાં કર્મચારીઓ માટે સતર્ક બની કંપની
ગૂગલની આ જાહેરાત વિશે સૌ પહેલાં જાણકારી આપતાં કહેવાયું છે કે તેનાથી આખી દુનિયામાં ગૂગલના 2 લાખથી વધુ કર્મચારીઓ અને કોન્ટ્રાક્ટર્સને લાભ થશે. આ પહેલાં ગૂગલના વર્ક ફ્રોમ હોમનો વિકલ્પ જાન્યુઆરી સુધી હતો. ગૂગલના આ નિર્ણય બાદ આશા છે કે અન્ય ટેક્નોલોજી કંપનીઓ પણ કર્મચારીઓની વર્ક ફ્રોમ હોમનો સમય વધારે. કોરોના મહામારી વધી રહી છે ત્યારે કંપનીઓ પોતાના કર્મચારીઓ માટે સતર્ક બની છે.
ટ્વિટરે પણ કરી જાહેરાત
આ સાથે જ કેટલીક ટેક્નોલોજી કંપનીઓ સતર્કતા સાથે ઓફિસ ખોલવાનું વિચારી રહી છે. સોશ્યિલ મીડિયા કંપની ટ્વિટરે જાહેરાત કરી છે કે તેમના કર્મચારીઓ અનિશ્ચિત સમય સુધી વર્ક ફ્રોમ હોમ કરી શકે છે. ફેસબુકના સંસ્થાપક માર્ક ઝકરબર્ગે પણ કહ્યું કે તેમને આશા છે કે સોશ્યિલ મીડિયા કંપનીના લગભગ અડધા કર્મચારીઓ આવનારા સમયમાં ઘરેથી કામ કરશે.