વડોદરા / ગરબામાં 'દમ મારો દમ': સંસ્કારી નગરીને શર્મસાર કરતો કિસ્સો, માના ચાચર ચોકમાં યુવતી 'ઇ-સિગારેટ' પીને ગરબે ઘૂમતા રોષ

• વડોદરાના ગરબામાં યુવતીએ ફૂંકી ઇ-સિગારેટ
• ઇ-સિગારેટ ફૂંકી ઘુમાડા કાઢતો વીડિયો વાયરલ
• વીડિયો વાયરલ થતા લોકોમાં રોષ જોવા મળ્યો

વડોદરાની વર્લ્ડ ફેમસ નવરાત્રીમાં સંસ્કારી નગરીને શર્મસાર કરે તેવો એક કિસ્સો સામે આવ્યો છે. શહેરના જાણીતા ગરબા ગ્રાઉન્ડમાં ચાલુ ગરબાએ ગરબા રમતા-રમતા ઇ-સિગારેટના ધુમાડા કાઢતી એક યુવતીનો વીડિયો વાઇરલ થયો છે. જેને હાલ ભારે ચર્ચા જગાવી છે.

વડોદરાના ગરબામાં યુવતીએ પીધી ઈ-સિગારેટ#ecigrate #vadodara pic.twitter.com/Mr3ijspmla

— VTV Gujarati News and Beyond (@VtvGujarati) October 3, 2022

યુવતીના વીડિયોએ લોકોની ધાર્મિક ભાવનાને પણ ઠેસ પહોંચાડી

સંસ્કારી નગરીને લજવતો કિસ્સો સામે આવતા લોકો યુવતી પર ફિટકાર વરસાવી રહ્યાં છે. માતાજીની ભક્તિ અને શ્રદ્ધા સાથે જોડાયેલા નવરાત્રીના પર્વમાં માતાજીના ચાચરચોકમાં આ રીતે ખુલ્લેઆમ ઈ-સિગારેટના ધુમાડા કાઢતી યુવતીના વીડિયોએ લોકોની ધાર્મિક ભાવનાને પણ ઠેસ પહોંચાડી છે.

ચાલુ ગરબે યુવતીએ ઈ-સિગારેટના ધુમાડા કાઢીને ગરબા રમ્યા હતા. ત્યારે અન્ય ખેલૈયાઓએ આ યુવતીનો ઇ-સિગારેટ પીતો વીડિયો બનાવીને સોશિયલ મીડિયામાં વાયરલ કર્યો હતો. અન્ય ખેલૈયાઓએ આ યુવતીને પાઠ ભણાવવા વીડિયો બનાવીને તેને સોશિયલ મીડિયા પર શેર કર્યો છે.

આ પ્રકારની પ્રવૃત્તિ ગરબા ગ્રાઉન્ડમાં ચલાવી ન લેવાય

તમને વધુમાં જણાવી દઇએ કે, સોશિયલ મીડિયા પર આ વીડિયો મૂકનારે જણાવ્યું હતું કે 'આ છોકરી વડોદરાની જ છે. અમે તેનું નામ જાહેર કરવા નથી માંગતા. પરંતુ આ પ્રકારની પ્રવૃત્તિ ગરબા ગ્રાઉન્ડમાં ચલાવી ન લેવાય. એનો વિરોધ કરીને આ વીડિયો સોશિયલ મીડિયા પર મૂક્યો છે.' ગરબા-આયોજકોએ પણ પગલાં લેવા પ્રતિબદ્ધતા બતાવી હતી.

મહત્વનું છે કે, વડોદરા પોલીસ કમિશનર ડો. શમશેરસિંહે જણાવ્યું હતું કે 'આવો વીડિયો જો વાઇરલ થયો હોય તો ખરેખર ખોટું છે. સાદા વેશમાં ફરતી શી ટીમને અમે સૂચના આપીશું. તેઓ રોમિયો સાથે હવે આવી મહિલાઓ સામે પણ કાર્યવાહી કરશે.' જ્યારે યુનાઇટેડ વેના આયોજકે જણાવ્યું હતું કે 'અમે સિક્યોરિટીને સૂચના આપીશું. આવા લોકોને ગ્રાઉન્ડમાંથી શોધીને બહાર કાઢે. આવા લોકો મળશે તો કાર્યવાહી કરાશે.'