બેદરકારી / ભાવનગર મનપાના પાપે અક્વાડા લેકની ટ્રેનમાં કરંટ લાગતા બાળકીનું મોત: પરિજનોના આક્ષેપ, શિક્ષણમંત્રી એક્શનમાં

• ટ્રેનમાં કરંટ લાગતા બાળકીનું મોત
• શિક્ષણમંત્રી જીતુ વાઘાણીએ કમિશનરને આપી સૂચન 
• સમગ્ર મામલે બનાવાઇ તપાસ કમિટી

ભાવનગર મનપા દ્વારા 11 કરોડનો ખર્ચે કરી અક્વાડા લેક બનાવવામાં આવ્યું છે.  જ્યાં ફરવા ગયેલા પરિવારની લાડક્વાયી દીકરીને ટ્રેનમાં કરંટ લાગતા તેનું કમકમાટીભર્યું મોત નીપજ્યું હતું.  બીજી તરફ આ મામલે શિક્ષણમંત્રી જીતુ વાઘાણીએ પણ નોધ લઇને કમિશનરને તાબડતોબ સૂચન આપી દેવામાં આવી છે અને ,જવાબદાર સામે કડક પગલાં લેવા તાકીદ કરવામાં આવી છે. 

મેર પરિવારની બાળકીના મોતથી અરેરાટી
ભાવનગર મનપા દ્વારા 11 કરોડના ખર્ચે અક્વાડા નજીક અક્વાડા લેક બનાવવામાં આવ્યું છે. પરતું ત્યા સલામતીના નામે મીંડું હોય તેવો ઘાટ સર્જાયો છે. ભાવનગર શહેર નજીક આવેલું અકવાડા લેક લોકોને અકર્ષતું હોવાથી મોટી સંખ્યામાં લોકો અહી ફરવા જઈ રહ્યા છે. જયા કરુણાંતિકા સામે આવી હતી.  તાજેતરમાં  કુંભારવાડા અક્ષયપાર્ક ખાતે રહેતા રામભાઈ મેર તેમના પરિવાર સાથે અકવાડા લેક ગાર્ડન ખાતે ફરવા ગયા હતા. જ્યાં તેમની આઠ વર્ષની માસૂમ દીકરી જાનવીને ગાર્ડનની અંદર આવેલી ઈલેક્ટ્રીક રેલગાડીના પાટા ઉપર જોરદાર ઈલેક્ટ્રીક શોટ લાગ્યો હતો.જે અંગે જાણ થતાં મોટી સંખ્યામાં લોકોના ટોળેટોળા એકઠા થઇ ગયા હતા.

મહાનગરપાલિકાની ઘોર બેદરકારીને લઈને આ બનાવ બન્યો : પરિવારજનો
ત્યારબાદ બાળકીને તાત્કાલિક સિવિલ હોસ્પિટલ ખાતે ખસેડવામાં આવી હતી. જ્યાં ફરજ પરના તબીબે આઠ વર્ષની બાળા જાનવીને મૃત જાહેર કરી હતી જ્યારે આ બનાવને લઈને તેમના પરિવારમાં શોખનું વાતાવરણ છવાઈ ગયું હતું. મહાનગરપાલિકાની ઘોર બેદરકારીને લઈને આ બનાવ બન્યો હોય તેવા બાળકીના પરિજનોએ આક્ષેપ કર્યા હતા. આ મામલે કોંગ્રેસ નેતાઑએ પણ આરોપ લગાવ્યા હતા. વધુમાં શિક્ષણમંત્રી જીતુ વાઘાણીની સૂચનાને લઈને સ્થળ તપાસ અને આ કેસ મામલે કમિટી બનાવવામાં આવી છે. જેના દ્વારા તપાસ ચલાવાઇ રહી હોવાનું જાણવા મળી રહ્યું છે.