અમરેલીઃ રાજ્યભરમાં ગરમીના પારામાં વધારો થઈ રહ્યો છે. ત્યારે હવે સિંહોનો એક વીડિયો વાયરલ થઈ રહ્યો છે. આ વીડિયોમાં 11 સિંહો એક સાથે પાણી પીતા જોવા મળી રહ્યાં છે.આ વીડિયો ગીર પૂર્વનો હોય તેવું અનુમાન લગાવવામાં આવી રહ્યું છે. મહત્વનું છે કે વન વિભાગ દ્વારા સિંહોને પુરતું પાણી મળી રહે તે માટે અલગ-અલગ પાણીનાં પોઈન્ટ બનાવવામાં આવ્યાં છે.
ત્યારે હવે સિંહોનું ટોળું પાણી પી રહ્યું હોય તેવો એક વીડિયો હાલ વાયરલ થઈ રહ્યો છે.મહત્વનું છે કે હાલમાં ઉનાળાની ઋતુ શરૂ થઇ ગઇ છે. ઉનાળાનો માહોલ જામ્યો છે અને તાપમાન ઘટવાને બદલે દિવસે-દિવસે ગરમીમાં તાપમાનનો પારો ઊંચકાયો છે ત્યારે માનવીની સાથે વન્ય જીવોને પણ અસહ્ય ગરમીનો સામનો કરવો પડે છે.
પાણીની જરૂયાત સંતોષવા વન્યજીવો સતત રઝળપાટ કરતા હોય છે તેને ધ્યાનમાં રાખીને તંત્ર દ્વારા પણ પાણીના કુંડ મુકવા જેવી વ્યવસ્થા કરવામાં આવે છે ત્યારે તાજેતરમાં ગીરના જંગલમાં સાવજોનું ટોળું પાણીની શોધ કરતું પાણીના પોઇન્સ સુધી આવી પહોંચ્યું હતું. જો કે આ ઘટના સ્થાનિક કોઇ વ્યક્તિ દ્વારા કચકડે કેદ થઇ જતા તે સોશિયલ માધ્યમોમાં વાયરલ થયું હતું.
ઉલ્લેખનીય છે કે આ થોડા દિવસ પહેલા જ ગીરના જંગલમાં સિંહણનો વધુ એક વીડિયો વાયરલ થયો હતો. જેમાં સિંહણ તેના 4 સિંહ બાળ સાથે છાંયડામાં પ્રેમ કરતી જોવા મળે છે. વીડિયોમાં સિંહણ તેના સિંહ બાળ સાથે પ્રેમ કરતી જોવા મળી રહી છે.
આ ચાર સિંહબાળ 1 મહિનાના હોય તેવું લાગી રહ્યું હતું.આપને જણાવી દઇએ કે આ પહેલા પણ ગીરના જંગલમાંથી સિંહ રસ્તા પર લટાર મારવા નીકળ્યા હોય તેવા દ્રશ્યો જોવા મળ્યા હતા તે ક્યાં સિંહણ પાટા ઓળંગતી હોય તેવો VIDEO પણ માધ્યમોમાં વાયરલ થયો હતો.