ગાઝિયાબાદમાં ખૂનની હોળી / 'અહીંયા આવું ન કરો,' સ્કૂટી પર રોમાન્સમાં ખલેલ પાડનાર યુવાનને કપલે બાઈકના સાઈલેન્સરથી મારી નાખ્યો

• ગાઝિયાબાદની હૃદય કંપાવતી ઘટના
• કપલ બધાની સામે કરવા લાગ્યું સ્કૂટી પર રોમાન્સ
• બાજુમાંથી પસાર થનાર યુવાન તેમને વઢવા લાગ્યો
• ઉશ્કેરાયેલા યુવાને મિત્રો સાથે મળીને તેને પીટાઈ કરીને મારી નાખ્યો 

ગાઝિયાબાદમાં હૃદય કંપાવી દે તેવી ઘટના સામે આવી છે. અહીં સ્કૂટી પર રોમાન્સ કરી રહેલા એક કપલને ટોકવામાં આવતાં તેમણે એક યુવાનને લાઠી-ડંડા વડે એટલો માર માર્યો કે હોસ્પિટલમાં તેનું મોત થયું હતું. આ ઘટના મંગળવારે બપોરે ગાઝિયાબાદની એલ આર કોલેજ નજીક બની હતી. આ દરમિયાન ત્યાંથી પસાર થઇ રહેલા બંટીએ બધુ જોઇ આ મામલે ફરિયાદ નોંધાવી હતી. 

ગાઝિયાબાદની એલઆર કોલેજ પાસે બની ઘટના 
મંગળવારે ગાઝિયાબાદની સાહિબાબાદની એલઆર કોલેજ પાસે એક સ્કૂટી પર એક કપલ રોમાન્સ કરી રહ્યું હતું. સ્કૂટી પર સામસામા બેસીને કપલ અશ્લિલ હરકતો કરવા લાગ્યું હતું. એકબીજાને કિસ પણ કરવા લાગ્યાં હતા. બાજુમાંથી પસાર થનાર યુવાન વિરાટ મિશ્રાને કપલનું જાહેરમાં આવું કરવું અશોભનીય લાગ્યું તેથી તેણે તેમને રહેણાંક વિસ્તારમાં આવું ન કરવા જણાવ્યું હતું, અને આ બધું બીજે ક્યાંક કરવાનું કહ્યું હતું. વિરાટની આવી વાત યુવકને ખટકી હતી અને તેણે ફોન કરીને તેના મિત્રોને બોલાવી લીધાં અને બધાએ ભેગા મળીને તેને લાઠી-ડંડા વડે માર માર્યો હતો. વિરાટને મારી મારીને અધમૂઓ કરીને બધા ત્યાંથી ફરાર થઈ ગયા હતા. વિરાટને તાત્કાલિક હોસ્પિટલમાં લઈ જવામાં આવ્યો હતો જ્યાં મોડી રાત્રે તેનું મોત નીપજ્યું હતું. આ મામલે ત્યાંથી પસાર થઇ રહેલા બંટીએ બધુ જોઇ આરોપી વિરુદ્ધ પોલીસ સ્ટેશનમાં ફરિયાદ નોંધાવી હતી. બંટીએ ફરિયાદમાં જણાવ્યું હતું કે વિરાટને મારનાર આરોપી મનીષ કુમાર છે. રોમાન્સ દરમિયાન જ્યારે તેણે વિક્ષેપ પાડ્યો તો તેણે મિત્રો સાથે મળીને વિરાટને ખરાબ રીતે માર માર્યો અને ત્યાંથી ભાગી ગયો. ઘાયલ હાલતમાં વિરાટને હોસ્પિટલ ખસેડવામાં આવ્યો હતો પરંતુ તેને બચાવી શકાયો નહોતો.

આરોપીઓએ યુવાનને માથે બાઈકનું સાઈલેન્સર ફટકાર્યું 
યુવાનના મરણતોલ હુમલાનો ભોગ બનેલો વિરાટ ઘરમાં એકલો કમાનાર હતો. મૃતક વિરાટના પિતા સુદામા મિશ્રાએ જણાવ્યું હતું કે, "મારો પુત્ર પરિવારમાં એકમાત્ર કમાતો સભ્ય હતો. તેઓએ મારા પુત્રને ઢોરમાર માર્યો, એટલું જ નહીં પરંતુ આરોપીઓએ બાઈકનું સાઈલેન્સર કાઢીને મારા પુત્રને માથે ફટકાર્યું તેને કારણે કે તેને ગંભીર ઈજા પહોંચી હતી અને હોસ્પિટલમાં તેનું મોત થયું હતું.