ચૂંટણી પરિણામ / ભાજપના વંટોળ વચ્ચે વાવ બેઠક પર કોનો વાયરો? જુઓ ગેનીબેનની બેઠકનું શું આવ્યું પરિણામ

• વાવ વિધાનસભા બેઠક પર ગેનીબેન ઠાકોરની જીત 
• ચૂંટણીમાં ભાજપ કરતાં કોંગ્રેસનો હાથ રહ્યો છે ભારે 

બનાસકાંઠા જિલ્લાની હાઈપ્રોફાઈલ બેઠક એટલે વાવ વિધાનસભા બેઠક પર કોંગ્રસ ઉમેદવાર ગેનીબેન ઠાકોરે જીત દર્જ કરાવી છે. 

બનાસકાંઠા જિલ્લાની તમામ વિધાનસભા બેઠકોનું મતદાન બીજા તબક્કામાં એટલે કે 5 ડિસેમ્બરના રોજ યોજાયું હતું. બનાસકાંઠા જિલ્લાની હાઈપ્રોફાઈલ બેઠક એટલે વાવ વિધાનસભા બેઠક. અહીં હંમેશા કાંટાની ટક્કર જેવી રાજનીતિ રહી છે. ઉત્તર ગુજરાતના બનાસકાંઠાની હાઈપ્રોફાઈલ વાવ બેઠક પર ભારતીય જનતા પાર્ટીએ સ્વરુપજી ઠાકોર પર પસંદગીનો કળશ ઢોળ્યો હતો. જ્યારે કોંગ્રસે ગેનીબેન ઠાકોરને રિપીટ કર્યા હતા. તો આમ આદમી પાર્ટીએ ડો.ભીમ પટેલને ટિકિટ આપીને મેદાન-એ-જંગમાં ઉમેદવાર તરીકે ઉતાર્યાં હતા.

ચૂંટણીમાં ભાજપ કરતાં કોંગ્રેસનો હાથ રહ્યો છે ભારે 
ગુજરાત વિધાનસભાની 182 બેઠકોમાંની સાતમી બેઠક અને બનાસકાંઠા જિલ્લામાં અતિ મહત્વની ગણાતી એટલે વાવ બેઠકમાં વાવ તાલુકો, ભાભર તાલુકો, સાંતલપુર તાલુકો (પાટણના કેસરગઢ) અને સુઈગામ તાલુકાનો સમાવેશ થાય છે. વાવ બેઠકની વાત કરીએ તો વિધાનસભા ચૂંટણીમાં ભાજપ કરતાં કોંગ્રેસનો હાથ ભારે રહ્યો છે. જીતના સિકંદરની વાત કરીએ તો અહીંના ઠાકોર અને ચૌધરી સમાજ કિંગ મેકર જેવી ભૂમિકામાં છે. આ બે મોટા સમુદાય જે બાજુ ઢળે એ બાજુ જીતનું પલ્લુ નમે છે.   

1998થી 2017 સુધી યોજાયેલી વિધાનસભાની ચૂંટણીના પરિણામ વિશે વાત કરીએ તો 1998માં કોંગ્રેસના ઉમેદવાર હેમાજી રાજપૂત જીત્યા હતા. તો   વર્ષ 2002માં પણ કોંગ્રેસ તેમને રિપીટ કરતા હેમાજી રાજપૂતએ ફરી જીતનો પરચમ લહેરાવ્યો હતો. જોકે, વર્ષ 2007માં ભાજપે કોંગ્રેસની આ બેઠક છીનવી લીધી હતી. 2007માં ભાજપના ઉમેદવાર પરબત પટેલનો અને 2012માં ભાજપના શંકર ચૌધરીનો વિજય થયો હતો. તો ગત વિધાનસભાની ચૂંટણીમાં એટલે કે 2017માં કોંગ્રેસના ઉમેદવાર ગેનીબેન ઠાકોરનો વિજય થયો હતો. કોંગ્રેસે આ વખતે પણ તેમને રિપીટ કર્યા હતા. 

જાતિગત સમીકરણો
આ બેઠક પર ઠાકોર સમાજના 27.4 ટકા, ચૌધરી પટેલ 16.3 ટકા, દલિત 11.9 ટકા, બ્રાહ્મણ 9.1 ટકા, રબારી 9.1 ટકા મતદારો છે. કોંગ્રેસનો ગઢ ગણાતી આ બેઠક પર આ ચૂંટણી ભારે રસાકસીનો જંગ જોવા મળ્યો છે.