તમે ન છેતરાતા / અમદાવાદના અમિતાબહેનને આ એક ભૂલ કરીને ટુકડે ટુકડે 1.23 લાખ રૂપિયા ખાતામાંથી થઇ ગયા ગાયબ

• ગઠિયાએ એસબીઆઈમાં કેવાયસી અપડેટ કરવાને બહાને લિંક મોકલી આબાદ છેતર્યાં
• બેન્કની વિગતો મેળવી લીધા બાદ છેતરપિંડી કરી હતી
• અમિતાબહેને કાર્ડ બ્લોક કરાવી દીધું પણ પૈસા તો પહેલા જ કપાઈ ગયા

અમદાવાદના સાઉથ બોપલમાં આવેલા ગાલા ગ્લોરીયામાં રહેતાં અને વોલન્ટ એક્સિલન્સ એજ્યુકેશન નામે ટ્યૂશન ક્લાસીસ ચલાવતાં અમિતાબહેન સંઘવીએ ગઠિયા વિરુદ્ધ ફરિયાદ નોંધાવી છે. થોડા દિવસ પહેલાં અમિતાબહેનના મોબાઈલ પર અજાણ્યા નંબર પરથી મેસેજ આવ્યો હતો કે તમારું એસબીઆઇનું કેવાયસી અપડેટ કરવું પડશે. નહીં તો બેન્કનું તમારું એકાઉન્ટ બ્લોક થઇ જશે. થોડી વાર બાદ અમિતાબહેન પર મેસેજ આવતાં તેમણે આવેલ લિન્કમાં તમામ વિગતો ભરી દીધી હતી.

મેસેજમાં આવેલી લિંકમાં ભરી દીધી તમામ વિગતો

અમિતાબહેન લિંકમાં તમામ વિગતો ભરી દીધા બાદ ઓટીપી આવ્યો હતો. આ ઓટીપી નંબર પણ લિન્કમાં અપડેટ કર્યો હતો. અમિતાબહેને જેવો ઓટીપી અપડેટ કર્યો કે તરત તેમના ખાતામાંથી ટુકડે ટુકડે ૧.૨૩ લાખ રૂપિયા અન્ય બેન્ક એકાઉન્ટમાં ટ્રાન્સફર થઇ ગયા હતા.

અમિતાબહેને કાર્ડ બ્લોક કરાવી દીધું પણ પૈસા તો પહેલા જ કપાઈ ગયા

અમિતાબહેનના મોબાઈલમાં રૂપિયા ડેબિટ થયાનો મેસેજ આવતાં તે ચોંકી ગયાં હતાં. અમિતાબહેને તરત જ તેમનું કાર્ડ પણ બ્લોક કરાવી દીધું હતું. અમિતાબહેને અજાણ્યા ગઠિયા વિરુદ્ધ સાયબર ક્રાઇમ ગ્રામ્ય   પોલીસ સ્ટેશનમાં ફરિયાદ નોંધાવતાં પોલીસે ગુનો નોંધી વધુ તપાસ હાથ ધરી છે.

કેવી રીતે ગઠિયાઓ કરે છે છેતરપિંડી?

ગઠિયાઓ લોકોને એવા વિશ્વાસમાં લે છે કે યુઝર આઇડી પાસવર્ડથી કોઇ નુકસાન નહીં થાય અને બેન્કમાં ગયા વગર કેવાયસીની પ્રોસેસ થઇ જશે. ગઠિયાઓ ઘણી વાર ફોન કરે છે અને તમને તમારા એકાઉન્ટના કેવાયસીને પૂર્ણ કરવા કહે છે. ત્યારબાદ તેઓ તમારી વિગતો લઇ છેતરપિંડી કરે છે. તેથી જો તમને આવા કોલ આવે તો સૌપ્રથમ કસ્ટમર કેરમાં જાણ કરવી જોઈએ. આ સિવાય જો તમે કેવાયસી કરાવવા માગતા હો તો તમે બેન્કમાં જઇને અપડેટ કરી શકો છો અથવા તમે બેન્કના એક્ઝિક્યુટિવને કોલ કરી શકો છો. આમ, થોડી સાવધાની રાખીને ઓનલાઈન પેમેન્ટ એપનો ઉપયોગ કરશો તો ક્યારેય છેતરાશો નહીં.