- સુરતમાં એકસાથે 4 દીકરીઓ ગુમ થતા પોલીસ દોડતી થઇ ગઇ હતી
- સ્કૂલે જવાનું કહીને ઘરેથી 4 દીકરીઓ દિલ્હી જવા રવાના થઇ હતી
- ગણતરીના કલાકોમાં પોલીસને ચારેય બાળકીઓ પાલેજથી મળી આવી
મહત્વનું છે કે, અમરોલી પોલીસ સ્ટેશનમાં 4 બાળકી ગુમ થયાની ફરિયાદ નોંધાઈ હતી. જેથી પોલીસ પણ આ ઘટનાને લઇને ચોંકી ઉઠી હતી. આ રીતે એકાએક 4 બાળકીઓ ગુમ થતા પોલીસ તંત્રની ઊંઘ હરામ થઇ ગઇ હતી. સ્કૂલે જવાનું કહીને ઘરેથી નીકળેલી 4 બાળકીઓ ગુમ થઇ જતા પોલીસે આ બાળકીઓને શોધવા આકાશ-પાતાળ એક કરી નાખ્યા. જો કે, બાદમાં ગણતરીના જ કલાકોમાં 4 બાળકીઓને પોલીસે શોધી કાઢી હતી.
બાળકીઓ ડાન્સનું ઓડીસન આપવા દિલ્હી જવા નીકળી પડી હતી
વધુમાં જણાવી દઇએ કે, ગુમ થનારી આ બાળકીઓ BTS આર્મી ગ્રુપમાં ભાગ લેવા નીકળી હતી. આ બાળકીઓ ડાન્સનું ઓડીસન આપવા માટે ટ્રાવેલ્સની બસમાં બેસી દિલ્હી જવા નીકળી પડી હતી. જો કે, બાદમાં ચારેય બાળકીઓ ગુમ થયાની ફરિયાદ નોંધાતા પોલીસે શોધખોળ હાથ ધરતા આ ચારેય બાળકીઓ ભરૂચ નજીકના પાલેજથી મળી આવી હતી.
દીકરીઓ ઘરે નહીં આવતાં પરિવારે પોલીસ ફરિયાદ કરી
આપણે સૌ કોઇ જાણીએ છીએ કે, ટીવી અને સોશિયલ મીડિયામાં બોલિવુડના ગ્લેમરસની આ દુનિયાને જોઇ અત્યારના બાળકો વધારે આકર્ષાઇ જાય છે. ત્યારે સુરતના કોસાડ આવાસ ખાતે આવેલી એક જ બિલ્ડિંગમાં રહેતી 12 વર્ષીય, 13 વર્ષીય અને 14 વર્ષીય એમ કુલ ચાર બહેનપણીઓ અલગ-અલગ સ્કૂલમાં અભ્યાસ કરે છે. જે ચારેય દીકરીઓ સ્કૂલે જવા માટેનું કહીને પોતાના ઘરેથી નીકળી હતી. પરંતુ સ્કૂલ છૂટ્યા બાદ પણ પોતાના ઘરે પરત ન હોતી આવી. આથી, દીકરીઓ ઘરે નહીં આવતાં પરિવારે શોધખોળ હાથ ધરી હતી. પરંતુ તેમ છતાં દીકરીઓ નહીં મળતા પરિવારે અમરોલી પોલીસને જાણ કરી હતી.
એકસાથે ચાર દીકરીઓ ગાયબ થતાં તેમના પરિવારજનો અને પોલીસ પણ દોડતી થઈ હતી. આથી, પોલીસે તુરંત રેલવે સ્ટેશન, બસ સ્ટેશન અને ખાનગી બસ સંચાલકોને આ અંગેની માહિતી આપી હતી. સોશિયલ મીડિયામાં તેમના ફોટો અને વિગતો પોલીસે વાયરલ કરી હતી. દરમિયાન આ ચારેય લક્ઝરી બસમાં બેસીને દિલ્હી જવા રવાના થયા હોવાની માહિતી પોલીસને મળી હતી. આથી ભરૂચ નજીકના પાલેજથી પોલીસને આ બાળકીઓ મળી આવી. આ ચારેય કિશોરીઓ સરદાર માર્કેટની સામેથી બસમાં દિલ્હીમાં જવા નીકળી હતી. જેઓ દિલ્હીમાં ડાન્સિંગ સ્ટાર બનવા માટે ઓડિશન આપવા જઈ રહી હતી.
