લોકસભા પહેલા પૂર્વ ભાજપના MLA જોડાશે કોંગ્રેસમાં કરી શકે છે મોટા ખુલાસા

લોકસભાની ચૂંટણી પહેલા ભાજપના પૂર્વ ધારાસભ્ય બિમલ શાહ કોંગ્રેસમાં જોડાશે. કોંગ્રેસ પ્રદેશ પ્રભારી રાજીવ સાતવ અને પ્રદેશ પ્રમુખ અમિત ચાવડાની હાજરીમાં બિમલ શાહ કોંગ્રેસમાં જોડાશે. મહત્વનુ છે કે ગુજરાત વિધાનસભાની ચૂંટણીમાં બિમલ શાહે ભાજપ પાસેથી ટિકિટની માગ કરી હતી. ટિકિટ ન મળતા બિમલ શાહ અપક્ષ તરફથી ચૂંટણી લડ્યા હતા. જેના કારણે બિમલ શાહ નારાજ પણ હતા. અપક્ષમાંથી ચૂંટણી લડતા બિમલ શાહને ભાજપમાંથી સસ્પેન્ડ પણ કરવામાં આવ્યા હતા. ત્યારે હવે બિમલ શાહ કોંગ્રેસમાં જોડાશે. બિમલ શાહ આગામી લોકસભાની ચૂંટણી કોંગ્રેસમાંથી લડી શકે છે.

ભાજપના પૂર્વ મંત્રી અને સસ્પેંડેડ કદાવર નેતા બિમલભાઇ શાહે આવતીકાલે કોંગ્રેસમાં જોડાવાની જાહેરાત કરતાં ખેડા જિલ્લાના રાજકારણમાં ગરમાવો આવી ગયો છે. ત્યારે ભાજપના જ પૂર્વ મંત્રી કોંગ્રેસમાંથી લોકસભા લડે તેવી શક્યતા જોતાં ભાજપ માટે આગામી લોકસભાની ચૂંટણીમાં ખેડા લોકસભા બેઠકમાં કપરા ચઢાણ સાબિત થાય તો નવાઈ નહીં.

બિમલ શાહ ગુજરાત પ્રદેશ કોંગ્રેસ કાર્યાલય અમદાવાદ ખાતે કોંગ્રેસના ગુજરાત પ્રભારી રાજીવ સતાવ અને પ્રદેશ પ્રમુખ અમિત ચાવડાની હાજરીમાં પોતાના કાર્યકરો સમર્થકો સાથે કોંગ્રેસનો ખેસ ધારણ કરશે. કોંગ્રેસમાં પોતે જોડાવાની જાહેરાત બાદ બિમલ શાહના સમર્થકોએ કપડવંજ કાર્યાલય ખાતે પહોંચી અભિનંદન પાઠવ્યા હતા.

જોકે ક્ષત્રિય પ્રભુત્વ ધરાવતી ખેડા લોકસભા બેઠક ઉપર ક્ષત્રિયોની અવગણના કરી બિમલ શાહને ટિકિટ આપવાનું જોખમ કોંગ્રેસ લે છે કે કેમ તે જોવું રહ્યું પણ હાલ તો બિમલ શાહના સમથકોમાં ભારે ઉત્સાહ છે.