ભારતના ક્રિકેટ મહાકુંભ IPLનું ગત રવિવારે હૈદરાબાદમાં સમાપન થયું. દુનિયાની સૌથી મોટી ક્રિકેટ લીગમાંથી દર વર્ષે ઘણા યુવા પ્રતિભાશાળી ખેલાડી સામે આવે છે, જેઓ પોતાના શાનદાર પ્રદર્શનથી ક્રિકેટની દુનિયામાં પોતાનું નામ ઉજાગર કરે છે. કેટલાક એવા ખેલાડી પણ છે, જેઓએ મોટું નામ બનાવ્યું હોવા છતાં પોતાના નામ પ્રમાણેની ગેમ દેખાડી શકતા નથી. આવા ખેલાડીઓને IPLના ટોપ નહીં, બલકે ફ્લોપ ખેલાડી કહેવા પડે છે.
આજે અહીં IPL-૨૦૧૯ની આવી જ ફ્લોપ ઈલેવન પર નજર કરીએ. જેમાં ચાર ફ્લોપ વિદેશી ખેલાડીઓ સાથે એક વિકેટકીપર પણ સામેલ છે.
1 અંબાતી રાયડુ: ચેન્નઈ સુપર કિંગ્સ તરફથી ૨૦૧૮માં રનનો વરસાદ વરસાવનારા અંબાતી રાયડુ માટે ૨૦૧૯ની IPL બહુ ખાસ ના રહી. આ સિઝનમાં તેના બેટમાં જાણે કે કાટ લાગી ગયો, જેના કારણે તે રન બનાવી શક્યો નહીં. આ જ કારણે વિશ્વકપ માટેની ભારતીય ટીમમાં પસંદગી ના થઈ. રાયડુએ ચેન્નઈ તરફથી ૧૬ મેચમાં રમતા માત્ર ૨૮૧ રન બનાવ્યા, જેમાં ફક્ત એક જ અર્ધસદી સામેલ હતી. આ જ કારણે રાયડુને IPLનો ફ્લોપ ફ્લોપ ઓપનર કહી શકાય.
2 રોબિન ઉથપ્પા: કોલકાતા નાઇટ રાઇડર્સનો બેટિંગ સ્તંભ કહેવાતા ઉથપ્પાની વર્તમાન સિઝન બહુ ખાસ ના રહી એટલું જ નહીં, કેકેઆરની નિર્ણાયક મેચમાં ઉથપ્પાએ એક રન બનાવવા માટે ૨૪ બોલ રમવા પડ્યા. આ જ કારણથી ચાહકો દ્વારા સોશિયલમાં તેને જબરદસ્ત રીતે ટ્રોલ કરવામાં આવ્યો હતો. ઉથપ્પા ૨૦૧૯ની IPLમાં ૧૨ મેચ રમ્યો, જેમાં તેણે ૨૮૨ રન બનાવ્યા. આ દરમિયાન તેની સરેરાશ ૩૧ રનની રહી અને ફક્ત એક જ અર્ધસદી ફટકારી શક્યો.
3 કોલિન ઇન્ગ્રામઃ દિલ્હી કેપિટલ્સ ટીમ તરફથી રમતા કોલિન ઇન્ગ્રામે પણ આ સિઝનમાં પોતાની કંગાળ બેટિંગથી નિરાશ કર્યા. ૧૨ મેચમાં તેના નામે ફક્ત ૧૮૪ રન નોંધાયા, જેમાં તેનો સર્વોચ્ચ સ્કોર માત્ર ૪૭ રનનો રહ્યો. ઇન્ગ્રામની બેટિંગ સરેરાશ માત્ર ૧૮ રનની રહી. આવા શરમજનક પ્રદર્શનને કારણે જ તેને ફ્લોપ ઈલેવનનો હિસ્સો બનાવવામાં આવ્યો છે.
4 ડેવિડ મિલરઃ દક્ષિણ આફ્રિકાના ખતરનાક કિલર મિલરની પંજાબ કિંગ્સ ઈલેવન તરફથી ૨૦૧૯ની સિઝન સાવ નિરાશાજનક રહી, જેનું નુકસાન તેની ટીમને પણ ભોગવવું પડ્યું. મિલરે ૧૦ મેચમાં લગભગ ૨૬ની સરેરાશથી ૨૧૬ રન બનાવ્યા, જેમાં ૫૭ રનની તેની સર્વોચ્ચ ઇનિંગ્સ હતી. જે વિસ્ફોટક બેટિંગ માટે કિલર દુનિયાભરમાં જાણીતો છે એવી બેટિંગ વર્તમાન સિઝનમાં જોવા મળી નહીં.
5 બેન સ્ટોક્સઃ ઈંગ્લેન્ડના ઓલરાઉન્ડર અને રાજસ્થાન રોયલ્સથી રમનારા IPLના મોંઘા ખેલાડીઓમાં સામેલ બેન સ્ટોક્સનું બેટ એકદમ શાંત જ રહ્યું. બેટિંગની સાથે-સાથે સ્ટોક્સ બોલિંગમાં પણ કંઈ ઉકાળી શક્યો નહીં. સ્ટોક્સે નવ મેચમાં ૧૨૩ રન બનાવ્યા અને માત્ર છ જ વિકેટ ઝડપી.
6 નિકોલસ પૂરનઃ કિંગ્સ ઈલેવન પંજાબે કેરેબિયન ખેલાડી પૂરનને જે આશાથી ખરીદ્યો હતો તેના પર તે બિલકુલ પણ ખરો ઊતરી શક્યો નહીં. પૂરને ભલે કેટલીક મેચમાં ઠીકઠાક બેટિંગ કરી હોય, પરંતુ તે પોતાની ટીમને જીત અપાવવા માટે પૂરતી નહોતી. પૂરને સાત મેચમાં ૨૮ની સરેરાશથી ૧૪૮ રન બનાવ્યા, જેમાં ૪૮ રનની તેની ઇનિંગ્સ સર્વોચ્ચ રહી એટલું જ નહીં, વિકેટકિપિંગમાં પણ તે ખાસ કોઈ કમાલ દેખાડી શક્યો નહીં, જેના કારણે તેને IPLની ફ્લોપ ટીમનો ફ્લોપ વિકેટકીપર કહી શકાય.
7 કૃષ્ણપ્પા ગૌતમઃ ગત સિઝનમાં રાજસ્થાન રોયલ્સ તરફથી પોતાની બોલિંગથી કમાલ દેખાડનારા કૃષ્ણપ્પા વર્તમાન સિઝનમાં પોતાની છાપ છોડવામાં તદ્દન નિષ્ફળ રહ્યો, જેનું નુકસાન રાજસ્થાન રોયલ્સે ભોગવવું પડ્યું. કૃષ્ણપ્પાએ ૨૦૧૯ની સિઝનમાં સાત મેચ રમીને માત્ર એક વિકેટ ઝડપી.
8 કુલદીપ યાદવઃ ટીમ ઇન્ડિયાને અનેક મેચમાં વિજય અપાવનારા ચાઇનામેન બોલ કુલદીપ યાદવ માટે ૨૦૧૯ની IPL બહુ જ ખરાબ રહી, જેના કારણે કેકેઆરના કેપ્ટન દિનેશ કાર્તિકે તેને મેદાનની બહાર બેસાડી રાખવો પડ્યો. બેટ્સમેનોએ કુલદીપની ઘણી ધોલાઈ કરી. નવ મેચમાં રમેલા કુલદીપે ૨૮૬ રન લૂંટાવીને માત્ર ચાર વિકેટ ઝડપી.
9 મોહંમદ સિરાઝઃ ઘરેલુ ક્રિકેટમાં પોતાની શાનદાર ફાસ્ટ બોલિંગથી જાણીતા બનેલા મોહંમદ સિરાઝને ૨૦૧૯ની IPLમાં બેટ્સમેનોના હાથે જબરદસ્ત માર ખાવો પડ્યો. સિરાઝની બોલિંગમાં ના તો સ્વિંગ જોવા મળી કે ના તો સચોટ લાઇન-લેન્થ. ૨૦૧૯માં રમેલી નવ મેચમાં સિરાઝ માત્ર સાત વિકેટ ઝડપી શક્યો અને તેના માટે તેણે ૨૬૯ રન ખર્ચી નાખ્યા.
10 ઉમેશ યાદવઃ ટીમ ઇન્ડિયાના એક સમયના મુખ્ય ફાસ્ટ બોલર કહેવાતા ઉમેશ યાદવ માટે ૨૦૧૯ની સિઝન સાવ ફિક્કી રહી. આરસીબી તરફથી ૧૧ મેચ રમનારા ઉમેશ માત્ર ૧૧ વિકેટ ઝડપી શક્યો, જેના માટે તેણે ૩૭૧ રન લૂંટાવી દીધા. ઉમેશના આ પ્રદર્શનનું નુકસાન વિરાટ કોહલીની ટીમને પોઇન્ટ ટેબલમાં છેલ્લા નંબરે રહીને ચૂકવવું પડ્યું.
11 જયદેવ ઉનડકટઃ IPL ૨૦૧૮ની સિઝનમાં સૌથ મોંઘા ભાવે ભારતીય બોલરના રૂપમાં વેચાયેલા જયદેવ ઉનડકટ ત્યાર બાદથી રંગમાં નજરે પડ્યો નથી. ગત વર્ષથી સતત ઉનડકટ પોતાની બોલિંગમાં લય હાંસલ કરી શક્યો નથી. રાજસ્થાન રોયલ્સ તરફથી ૨૦૧૯માં જયદેવ ૧૧ મેચમાં માત્ર ૧૦ વિકેટ જ હાંસલ કરી શક્યો. આના માટે તેણે ૩૯૮ રન ખર્ચી નાખ્યા.