વિજય માલ્યાને બ્રિટનની હાઇ કોર્ટે 13 ભારતીય બેંકોને કાયદાકીય ખર્ચ પેટે લઘુતમ બે લાખ પાઉન્ડ ચૂકવવાનો આદેશ આપ્યો છે.13 ભારતીય બેંકો વિજય માલ્યા પાસેથી પોતાના બાકી લેણા વસૂલવા માલ્યા સામે કાયદાકીય લડત લડી રહ્યાં છે. ગયા મહિને જજ એન્ડ્રૂ હેનશોેએ માલ્યાની સંપત્તિ જપ્ત કરવાના આદેશને બદલવાનો ઇનકાર કર્યો હતો.
તેમણે સ્ટેટ બેંક ઓફ ઇન્ડિયાના નેતૃત્ત્વમાં 13 ભારતીય બેંકો માલ્યા પાસેથી1.145 અબજ પાઉન્ડ વસૂલ કરવાના પણ હકદાર છે તેવા ભારતીય કોર્ટના ચુકાદાને પણ યોગ્ય ગણાવ્યો હતો. બ્રિટનની હાઇ કોર્ટે માલ્યાને સંપત્તિ જપ્ત કરવાના આદેશની રજિસ્ટ્રેશન ફી ચૂકવવાનો પણ આદેશ આપ્યો છે.
આ કેસ સાથે સંકળાયેલા એક કાયદાકીય નિષ્ણાતે જણાવ્યું છે કે કોર્ટે માલ્યાને બેંકનો ખર્ચ ચૂકવવાનો આદેશ આપ્યો છે. જો બંને પક્ષકારો ખર્ચની રકમ અંગે સંમત નહીં થાય તો કોર્ટ ખર્ચની રકમ નકકી કરશે.
જોકે કોર્ટે સ્પષ્ટ શબ્દોમાં જણાવ્યું છે કે માલ્યાએ બેંકોને કાયદાકીય ખર્ચ પેટે બે લાખ પાઉન્ડ ચૂકવવા જ પડશે. ઉલ્લેખનીય છે કે માલ્યા પાસેથી બાકી રકમ વસૂલ કરવા કાયદાકીય લડત ચલાવનારી 13 બેંકોમાં સ્ટેટ બેંક ઓફ ઇન્ડિયા બેંક ઓફ બરોડા કોર્પોરેશન બેંક ફેડરલ બેંક આઇડીબીઆઇ બેંક ઇન્ડિયન ઓવરસીઝ બેંક જમ્મુ એન્ડ કાશ્મીર બેંક પંજાબ એન્ડ સિંધ બેંક પંજાબ નેશનલ બેંક સ્ટેટ બેંક ઓફ મૈસૂર યુકો બેંક યુનાઇટેડ બેંક ઓફ ઇન્ડિયા અને જેએમ ફાઇનાન્સિયલ એસેટ રિકન્સ્ટ્રકશન કંપની પ્રાઇવેટ લિમિટેડનો સમાવેશ થાય છે.