આદેશ / મહેસાણાના 1778 કર્મચારીઓની નોકરી સળંગ ગણવા હુકમ, એક જ દિવસે સૌપ્રથમ વાર રાજ્યની 269 શાળાઓને ઓર્ડર

• મહેસાણામાં ફિક્સ પગાર અને ક્લાર્કની નોકરી સળંગ કરવાનો હુકમ 
• 1 હજાર 778 કર્મીઓની નોકરી સળંગ કરવા હુકમ કરાયો
• મહેસાણા જિલ્લામાં એક જ દિવસે શાળાઓને આદેશ અપાયા 

ગ્રાન્ટેડ અને સરકારી માધ્યમિક અને ઉચ્ચત્તર માધ્યમિક શાળાઓના કુલ 1778 કર્મચારીઓનો ફીક્સ પગારનો 5 વર્ષનો સમયગાળો સળંગ ગણવાનો આદેશ જિલ્લા શિક્ષણાધિકારીએ આપ્યો છે. રાજ્યમાં સૌપ્રથમ મહેસાણા જિલ્લામાં એક જ દિવસે 269 શાળાઓને ઓર્ડર અપાયા છે.

1778 કર્મચારીઓનો ફીક્સ પગારનો 5 વર્ષનો સમયગાળો સળંગ ગણાશે
જિલ્લાની અનુદાનિત માધ્યમિક અને ઉચ્ચત્તર માધ્યમિક 254 શાળાઓ અને સરકારી 15 શાળાઓમાં અગાઉ 5 વર્ષ ફીક્સ પગારની નોકરીમાં નિમણૂંક પામેલા શિક્ષણ સહાયક, વહીવટી સહાયક, સાથી સહાયક મળી કુલ 1778 કર્મચારીઓનો ફીક્સ પગારનો 5 વર્ષનો સમયગાળો સળંગ ગણાશે. આ મામલે જિલ્લા શિક્ષણાધિકારી દ્વારા આદેશ કરાયો છે. મંગળવારે કર્મચારીઓના સળંગ નોકરીના ઓર્ડર શાળાઓને એનાયત કરવામાં આવ્યા હતા.

શિક્ષક સંઘ દ્વારા કરાઈ હતી માંગણી
મહેસાણા જિલ્લા શિક્ષણાધિકારી ર્ડા. એ.કે.મોઢે જણાવ્યું કે, ગ્રાન્ટેડ અને સરકારી માધ્યમિક અને ઉચ્ચત્તર માધ્યમિક શાળાઓના વર્ષ 1999 પછી ફિક્સ પગારથી 5 વર્ષ નોકરી કરનાર શિક્ષકો, ક્લાર્ક, પટાવાળાની નોકરીનો સમયગાળો સળંગ ગણવા શિક્ષક સંઘ દ્વારા માંગણીઓ કરવામાં આવી હતી અને સરકારની સ્વિકૃતિ પછી અમલમાં આવી છે.

1778 શિક્ષકો અને ક્લાર્કની નોકરી સળંગ ગણવાના હુકમો
તેઓએ જણાવ્યું કે, ફીક્સ નોકરીનો સમયગાળો હવે ઉચ્ચ પગાર, બઢતી અને નિવૃત્તિ વિષયક લાભોમાં ગણવામાં આવશે.  ગ્રાન્ટેડ શાળાના 1722 કર્મચારીઓ અને સરકારી શાળાઓના 56 કર્મચારીઓના સળંગ નોકરીના ઓર્ડર શાળાઓને એનાયત કરવામાં આવ્યા છે. માધ્યમિક શિક્ષક સંઘના સુધીર પટેલે જણાવ્યું કે, એક જ દિવસે સળંગ નોકરીના શાળાઓને આદેશ આપવામાં મહેસાણા રાજ્યમાં પ્રથમ જિલ્લો બન્યો છે.