કંડલાના સિરવા કેમ્પ વિસ્તારમાં આગ લાગતા અફરાતફરી, કોઇ જાનહાની નહીં

કચ્છ: કંડલાના સિરવા કેમ્પ વિસ્તારમાં આગ લાગી છે. રહેણાંક વિસ્તારમાં એક મકાનમાં આગ લાગી છે. આ આગના કારણે ઘર વખરી બળીને ખાખ થઇ ગઇ છે. ફાયર વિભાગે આગ પર કાબૂ મેળવ્યો છે.



આ મામલે મળતી વિગત મુજબ, કંડલાના સિરવા કેમ્પ વિસ્તારમાં આવેલ ઘરમાં આજરોજ આગ લાગવાની ઘટના બની હતી. આગ લાગવાને પગલે આસપાસના વિસ્તારમાં અફરાતફરીનો માહોલ સર્જાયો હતો. 

જો કે, આ બનાવ અંગેની જાણ નજીકના ફાયર વિભાગને કરવામાં આવતા ફાયર વિભાગનો કાફલો ઘટના સ્થળે ધસી આવ્યો હતો અને પાણીન સતત મારો ચલાવતા આગ પર કાબૂ મેળવવામાં સફળતા મળી હતી. 



આગ ભયંકર હોવાને કારણે ઘર વખરી બળીને ખાખ થઇ ગઇ હતી. જો કે, આગમાં કોઇ જાનહાનિ થયાના સમાચાર પ્રાપ્ત થયાં નથી. આ સાથે જ આગ ક્યાં કારણોસર લાગી તે કારણ પણ હજી સુધી જાણી શકાયું નથી.