- અરવલ્લીમાં ભારે વરસાદે સર્જી તારાજી
- ખેતરોમાં ભરાયા પાણી
- નદીઓના પાણી ફરી વળ્યા રોડ પણ ધોવાઇ ગયા
અરવલ્લી જિલ્લામાં ધોધમાર વરસાદને કારણે નદીઓ ગાંડીતૂર બની. નીચાણવાળા વિસ્તારો પાણીમાં ગરકાવ થયા તો બીજી તરફ ખેડૂતોની મહેનત પર પણ પાણી ફરી વળ્યુ. ભારે વરસાદને કારણે ખેતરોમાં વ્યાપક નુકસાન થવા પામ્યુ છે. હાલ તો અરવલ્લીમાં વરસાદે વિરામ લીધો પરંતુ ગઇકાલે 4 ઇંચ વરસાદ થતા ખેતરો પાણી પાણી થયા હતા. ત્યારે આવો જાણીએ હાલમાં ક્યાં કેવી છે સ્થિતિ..
ખેતરો થયા પાણીમાં ગરકાવ
અરવલ્લીના ભિલોડા તાલુકાના ખેતરોમાં વ્યાપક નુકસાન થવા પામ્યું છે. નવા પાલ્લા,ટોરડા તેમજ કિશનગઢ વિસ્તારમાં ભારે વરસાદને કારણે ખેતરો પાણીમાં ગરકાવ થયા છે. મગફળી,કપાસ,મકાઈ સહીતના ખરીફ વાવેતરમાં પાણી ફેરવાતા ખેડૂતોએ માથે હાથ દઇને રોવાનો વારો આવ્યો છે. મહત્વનું છે કે શામળાજી વિસ્તારમાં ગઈકાલ 4 ઈંચ વરસાદ પડ્યો હતો. જે વાતને 24 કલાક થવા છતાં પણ ખેતરોમાં જળબંબાકારની સ્થિતિ જોવા મળી રહી છે.
ખેતરોમાં 2 ફૂટ ઊંડા ખાડા પડ્યા
તો આ તરફ ભિલોડાના ધુલેટા-ધંધાસણમાં ખેતરોમાં ભયંકર તારાજી સર્જાઇ છે. ભારે વરસાદને કારણે નદીઓમાં આવેલા પૂરના પાણીમાં ખેતરો ધોવાઇ ગયા છે. ખેતરોમાં બે-બે ફૂટના ખાડા પ઼ડી જવા પામ્યા છે. આટલુ ઓછુ હોય તેમ 300 મીટરનો આરસીસીનો રસ્તો પણ ધોવાઇ ગયો. નદીએ રૌદ્ર સ્વરૂપ ધારણ કર્યુ હોય તેમ નદીના પાણી ખેતરો- રસ્તા પર ફરી વળ્યા હતા. ખેડૂતોની એક જ માંગ છે કે નુકસાનીનો સરવે કરીને સત્વરે સહાય ચૂકવવામાં આવે.
ક્યા પાકોને થયુ નુકસાન
- વરિયાળી
- મકાઇ
- સોયાબીન
- મગફળી
- કપાસ
ગુજરાતમાં સામાન્ય વરસાદની આગાહી
ગુજરાતમાં હાલ વરસાદ સામાન્ય આગાહી કરવામાં આવી છે. પણ વરસાદી સિસ્ટમ એક્ટિવ થવાનું શરૂ થતાં હવામાનમાં અચાનક પલટો આવ્યો છે. આગામી 24 કલાકમાં મહેસાણા, બનાસકાંઠા, પાટણ, સાબરકાંઠા અને છોટાઉદેપુરમાં અતિભારે વરસાદની સંભાવના વેધર વોચ કમિટીની બેઠકમાં કરવામાં આવી છે.
હવામાનના વરતારા
વરસાદને લઇ હવામાન વિભાગ દ્વારા આગાહી કરતાં જણાવાયું છે કે આજે રાજ્યના કેટલાક વિસ્તારમાં છુટોછવાયો વરસાદ થશે. 24 કલાક બાદ સાર્વત્રિક ભારે વરસાદના સંકેત પણ આપવામાં આવ્યા છે. ખાસ કરીને ઉત્તર ગુજરાત અને મધ્ય ગુજરાત મેઘો ધમાકેદાર બેટિંગ કરી શકે છે. વરસાદી સિસ્ટમ સક્રિય થતા 22 જુલાઈથી ગુજરાતમાં ફરી વરસાદ જામશે. 23 અને 24 જુલાઈએ રાજ્યમાં અતિભારે વરસાદ રહેશે.20 અને 21 ના રોજ બનાસકાંઠા, સાબરકાંઠા, અરવલ્લી, મોડાસા, ગાંધીનગર, અમદાવાદ, વડોદરામાં મેઘરાજા બઘડાટી બોલાવી શકે છે.
