શિયાળાની શરૂઆત થતાની સાથે જ બનાસકાંઠા જિલ્લામાં બટાકાના વાવેતરનો પ્રારંભ થઈ ચૂક્યો છે. છેલ્લા પાંચ વર્ષથી મંદીના કારણે આ વખતે વાવેતર ઘટ્યું હતું. આ વર્ષે બિયારણના ભાવ વધતા ખેડૂતોએ બટાકાનું વાવેતર ઓછું કર્યું છે. પરંતુ ફરી એકવાર આ વખતે ખેડૂતોને સારા ભાવ મળવાની આશાએ બટાકાના વાવેતરની શરૂઆત કરી છે.
બટાકા હબ તરીકે જાણીતા ડીસામાં ખુશી
ફરી એકવાર ખેડૂતોને સારા ભાવની આશા
બટાકાના વાવેતરની શરૂઆત કરી
બનાસકાંઠા જિલ્લાનો ડીસા પંથક સમગ્ર ભારતમાં બટાકાના હબ તરીકે પ્રસિદ્ધ છે, ત્યારે આ વર્ષે બટાકાનું વાવેતર ફરી શરૂ થઈ ગયું છે. દર વર્ષે ડીસા પંથકમાં બટાકાનું મોટા પ્રમાણમાં વાવેતર થાય છે. પરંતુ છેલ્લા પાંચ વર્ષથી બટાકાના ભાવ ઓછા મળવાના કારણે આ વાવેતર ઓછું થયું હતું. ત્યારે હાલમાં બનાસકાંઠા જિલ્લામાં છેલ્લા એક મહિનાથી બટાકાના ભાવમાં ભારે ઉછાળો આવ્યો છે. જે બટાકા કોઈ 5 રૂપિયે કિલો લેવા કોઈ તૈયાર ન હતા, તે બટાકા હાલમાં 45 રૂપિયે કિલો વેચાઈ રહ્યા છે.
સૌ પ્રથમવાર બટાકાના ભાવમાં ઐતિહાસિક ઉછાળો
સૌ પ્રથમ વાર બટાકાના ભાવમાં ઐતિહાસિક ઉછાળો આવતા ખેડૂતો અને વેપારીઓમાં ખુશી જોવા મળી રહી છે. ત્યારે સતત પાંચ વર્ષથી બટાકાની ખેતીમાં નુકશાન વેઠવતા ખેડૂતોએ ફરી એકવાર આ વર્ષે બટાકાનું વાવેતર શરૂ કર્યું છે અને આશા છે કે ગત વર્ષમાં જે નુકશાન થયું તે આ વર્ષે ભરપાઈ થશે અને બટાકાના સારા ભાવ મળશે. ચાલુ વર્ષે બનાસકાંઠા જિલ્લામાં ખેડૂતોએ બટાકાના વાવેતરની શરૂઆત કરી છે. ગત વર્ષે જે બટાકાનું બિયારણ 600 રૂપિયે મણ મળતું હતું તે બિયારણનો ભાવ આ વર્ષે 2200 રૂપિયા થયો છે. જેના કારણે બટાકાની ખેતીમાં ઘટાડો થયો છે.
આ વર્ષે મંદીના કારણે નાના ખેડૂતો પાસે પૈસા ના હોવાથી વાવેતર ઘટવાની સંભાવનાઃ ખેડૂતો
ખેડૂતોનું માનવું છે કે સતત મંદીના કારણે ખેડૂતોએ મોટું નુકસાન વેઠવાનો વારો આવ્યો હતો. આ વર્ષે પણ શરૂઆતમાં જ બટાકાના બિયારણના ભાવમાં વધારો હોવાના કારણે દર વર્ષે જે ખેડૂતો 6 હેક્ટરમાં બટાકાનું વાવેતર કરતા હતા તે ખેડૂતોએ આ વર્ષે 3 હેક્ટરમાં જ વાવેતર કર્યું છે. અન્ય જમીનમાં ખેડૂતો શાકભાજીના વાવેતર તરફ વળ્યા છે. આ વર્ષે મંદીના કારણે નાના ખેડૂતો પાસે ખાતર, દવાઓ અને ખેડાણના પૈસા જોડે ના હોવાના કારણે વાવેતર ઘટવાની પણ સંભાવના છે. ખેડૂતોએ છેલ્લા પાંચ વર્ષથી જે બટાકામાં મંદી ભોગવવાનો વારો આવ્યો છે, જેના કારણે વેપારી અને ખેડૂતો બંને કંગાળ થઈ ગયા છે માટે બનાસકાંઠા અને ડીસાની આજુબાજુના વિસ્તારમાં જે મોટા પ્રમાણમાં વાવેતર થાય છે ત્યાં વાવેતરમાં ઘટાડો કર્યો છે.
ગત વર્ષે બનાસકાંઠામાં મોટા પ્રમાણમાં વાવેતર થયું હતું પરંતુ ભાવ મળ્યા ન હતા
ડીસા અને તેની આજુબાજુના પંથકમાં બટાકાનું મોટા પ્રમાણમાં વાવેતર થાય છે. સામાન્ય ઠંડીની શરૃઆત થતાંની સાથે જ ડીસા અને તેની આજુબાજુના પંથકમાં બટાકાનું વાવેતર શરૂ થઈ જાય છે. જો કે આ વર્ષે મોડે સુધી ગરમી રહી હોવાથી વાવેતર 10થી 15 દિવસ જેટલું લેટ છે. બનાસકાંઠા જિલ્લામાં ગત વર્ષે બટાકાનું 66,000 હેક્ટરથી વધુ જમીનમાં મોટા પ્રમાણમાં વાવેતર થયુ હતું અને મોટા પ્રમાણમાં તેનું ઉત્પાદન પણ થયુ હતું. જોકે ખેડતોને પૂરતા ભાવ મળ્યા ન હતા તેમજ છેલ્લા પાંચ વર્ષથી મંદી હોવાથી ખેડૂતો, વ્યાપારીઓ અને કોલ્ડ સ્ટોરેજ સંચાલકોને ભારે નુકશાન વેઠવાનો વારો આવ્યો છે. ત્યારે આ વર્ષે પણ ખેડૂતોએ ફરી બટાકાની વાવણી શરૂ કરી છે. પરંતુ આ વર્ષે બિયારણના ભાવ વધારે હોવાના કારણે ખેડૂતોએ બટાટાનું વાવેતર ઓછું કર્યું છે. ગત વર્ષે બટાકાના પાકમાં મોટું નુકસાન ખેડૂતોએ વેઠવાનો વારો આવ્યો હતો જેનું કારણ હતું બિયારણ ખરાબ. ત્યારે આ વર્ષે બટાટાના બિયારણના ભાવ વધારે હોવાના કારણે બટાટાના બિયારણમાં ડુપ્લીકેટ થવાની શક્યતાઓ છે, જેના કારણે ખેડૂતોએ યોગ્ય પેઢી પરથી જ બિયારણની ખરીદી કરવી જેનાથી બટાટાના વાવેતરમાં નુકશાન આવે નહીં.
ડીસામાં અત્યાધુનિક સાધનો અને વૈજ્ઞાનિક પદ્ધતિથી થાય છે બટાકાની ખેતી
ડીસા પંથકમાં થતી બટાકાની ખેતી અત્યાધુનિક સાધનો અને વૈજ્ઞાનિક પદ્ધતિથી કરવામાં આવે છે. ખેડૂતો પાક સારો થાય અને સારુ ઉત્પાદન મેળવી રહે તે માટે પૂરતા પ્રમાણમાં ખાતર અને મશીનથી બટાકાનું વાવેતર કરી સમગ્ર દેશમાં હેક્ટર દીઠ સૌથી વધુ ઉત્પાદન મેળવે છે. સાથે સાથે ડીસાના બટાકાની ગુણવત્તા લાંબો સમય સુધી ટાકવાની હોવાથી ડીસાના બટાકા વિદેશ સુધી મોકલવામાં આવે છે. જોકે છેલ્લા પાંચ વર્ષથી ડીસામાં બટાકાના ભાવ ન મળતા ખેડૂતો અને વેપારીઓને મોટું નુકશાન વેઠવાનો વારો આવ્યો હતો. ત્યારે હાલમાં ડીસા અને તેની આજુબાજુના વિસ્તારમાં ઠંડીનું પ્રમાણ વધી રહ્યું છે અને ખેડૂતોએ બટાકાની વાવણીના શ્રી ગણેશ કર્યા છે ત્યારે ખેડૂતોને આશા છે કે આ વર્ષે બટાકામાં સારી આવક થશે.