નારાજગી / ઘઉંના નિકાસ પર પ્રતિબંધથી ખેડૂત સમાજ નારાજ, PM મોદીને પત્ર લખી ઠાલવી વ્યથા

• ઘઉં નિકાસ પ્રતિબંધથી ખેડૂતો નારાજ
• દ.ગુજરાતના ખેડૂતોનો PMને પત્ર
• ઘઉં નિકાસ પ્રતિબંધ પરત લેવા માંગ

વધતી મોંઘવારી વચ્ચે સામાન્ય લોકો માટે એક સારા સમાચાર છે.  સરકારે ઘઉંના સ્ટોક અને તેના ભાવને લઈને મોટો નિર્ણય લીધો છે. ઘઉંની નિકાસ પર કેન્દ્રના પ્રતિબંધ બાદ એક અઠવાડિયામાં ભારતમાં ઘઉંના ભાવ ઘટવા લાગશે. હાલમાં મણ દીઠ 550-600 રુપિયાના ભાવે ઘઉં વેચાઈ રહ્યાં છે જે આગામી અઠવાડિયમાં ઘટીને 450 રુપિયાની આજુબાજુ આવી શકે છે. 

દક્ષિણ ગુજરાતના ખેડૂત સમાજે PM મોદીને પત્ર લખ્યો
તો આ તરફ ઘઉંની નિકાસ પર પ્રતિબંધથી ખેડૂત સમાજ નારાજ દેખાઈ રહ્યો છે. દક્ષિણ ગુજરાતના ખેડૂત સમાજે PM મોદીને પત્ર લખ્યો છે જેમાં ઘઉંના નિકાસનો પ્રતિબંધ પાછો ખેંચવાની માંગ કરવામાં આવી છે. કારણ કે ઘઉંના નિકાસ પ્રતિબંધથી ખેડૂતોને મોટા પાયે નુકસાનની ભીતિ સેવાઇ રહી છે. ઘઉંનો MSP ક્વિન્ટલ દીઠ 3000 રૂપિયા કરવાની માંગ છે તેમજ ડીઝલ પર 50 ટકા સબસિડી આપવા અને ખેત વપરાશના સાધનો પર GST નાબૂદ કરવાની માંગ પણ સાથોસાથ રાખવામાં આવી છે.

એક સપ્તાહમાં ઘઉંના ભાવ ઘટવા લાગશે
કેન્દ્રીય ખાદ્ય સચિવ સુધાંશુ પાંડેએ  પ્રેસ કોન્ફરન્સ કરીને કહ્યું હતું કે, એક સપ્તાહમાં ઘઉંના ભાવ ઘટવા લાગશે. ઘઉં સસ્તા થવાથી લોટના ભાવ પણ ઘટશે. સુધાંશુ પાંડેએ એવી પણ માહિતી આપી હતી કે, દેશમાં ઘઉંનો જથ્થો જળવાઈ રહે તે માટે ઘઉંની નિકાસનો આદેશ જારી કરવામાં આવ્યો છે અને કોઈ પણ સંજોગોમાં ઘઉંનો સ્ટોક ઘટશે નહીં.ખાદ્ય તેલ સસ્તુ થવા લાગ્યું છે. ટૂંક સમયમાં જ ઇન્ડોનેશિયા તેની સમીક્ષા કરશે, ત્યારબાદ તેલની કિંમતમાં વધુ ઘટાડો થશે. વાસ્તવમાં ઇન્ડોનેશિયામાં વિશ્વમાં સૌથી વધુ પામ ઓઇલ છે. પરંતુ આ સમયે ઇન્ડોનેશિયાએ તેલની નિકાસ બંધ કરી દીધી છે. જોકે ઇન્ડોનેશિયા આટલું પામ ઓઇલનો વપરાશ કરવામાં અસમર્થ છે, પરંતુ તે ચોક્કસપણે પામ ઓઇલની નિકાસ કરશે.