વિરોધ / ગુજરાત સરકારનું વધશે ટેન્શન! બનાસકાંઠામાં ખેડૂતો આકરા પાણીએ, ટ્રેક્ટર રેલી બાદ કરી આ માંગ

• ગુજરાતમાં ખેડૂતો પોતાની માંગોને લઇને રોષે
•  સુરતમાં રેલવે લાઇનનો નોંધાવ્યો વિરોધ
• બનાસકાંઠામાં પાણીની માગ સાથે ટ્રેક્ટર રેલી યોજી 

રાજ્યમાં ખેડૂતોની સમસ્યાનો ખબર નહી ક્યારે અંત આવશે. ક્યારેક કુદરતનો માર તો ક્યારેક પાકવીમો ન મળતા ખેડૂતોની સ્થિતિ કપરી બને છે.  ખેતીમાં નુકસાન થઇ રહ્યું હોય તે જાણે ઓછું હોય તેમ હવે જમીન સંપાદન મામલે પણ ખેડૂતો વિરોધ નોંધાવી રહ્યા છે . એક બાજુ પાકમાં નુકસાનીની ચિંતા તો બીજી તરફ જમીન બચાવવી. ખેડૂતોના માથેથી મુસીબતનો પહાડ કોણ જાણે ક્યારે હટશે અને હવે તો ઉનાળો શરુ થતા સિંચાઇ માટે પાણીની ચિંતા.  ત્યારે સુરત અને બનાસકાંઠામાં પણ ખેડૂતો પોતાના હક અને પાણીની માગને લઇને રસ્તા પર ઉતરી આવ્યા. 

રેલવે લાઇનનો વિરોધ

સુરતના હજીરા-ગોથાણ રેલવે લાઇનને લઇને ખેડૂતોએ વિરોધ નોંધાવ્યો. રેલવે લાઇન બનાવવામાં 14 કરતા વધારે ગામની ખેતીલાયક જમીનને અસર થતી હોવાનુ ખેડૂતો જણાવી રહ્યા છે. આ અંગે યોજાયેલી બેઠકમાં ખેડૂતોએ રેલવે લાઇન માટે જમીન ન આપવાનો નિર્ણય કર્યો છે. ગુજરાત ખેડૂત સમાજના નેજા હેઠળ બેઠક મળી હતી તેમાં આ નિર્ણય લેવાયો હતો. આ મામલે ખેડૂતોમાં ઉગ્ર વિરોધ નોંધાવશે. કોઇ પણ ભોગે જમીન ન આપવા માટે ખેડૂતો મક્કમ જણાઇ રહ્યા હતા. આ મામલે 11 માર્ચે મહારેલી કાઢીને ખેડૂતો ઉગ્ર વિરોધ નોંધાવશે.

ખેડૂતોની ટ્રેક્ટર રેલી

ઉનાળાની શરુઆત થતા જ પાણીની પારાયણ શરુ થઇ ગઇ છે. ખેડૂતોને સિંચાઇ માટે પાણી ન મળતા મુશ્કેલી પડી રહી છે. ત્યારે સરકાર દ્વારા સિંચાઇ માટે પાણીની વ્યવસ્થા કરવામાં આવે તેવી માગ સાથે બનાસકાંઠાના ખેડૂતોએ ટ્રેક્ટર રેલી યોજી. પાલનપુર- આબુ હાઇવે રોડ પર ખેડૂતોએ ટ્રેક્ટર રેલી યોજીને સિંચાઇ માટે પાણીની માગ કરી છે.  તેઓ મલાના તળાવ ખાતે મહાઆરતી પણ કરશે. 

3 હજાર ખેડૂતો રેલીમાં જોડાયા 

પાલનપુર, વડગામ, દાંતીવાડા વિસ્તારમાં પાણીની ગંભીર સમસ્યા છે.  આ ઉપરાંત ધાનેરા અને અમીરગઢમાં પણ સિંચાઇનુ પાણી મળતુ નથી અને હવે તો ઉનાળાની શરુઆત થતા ખેડૂતોએ પાક લેવો કેવી રીતે તે એક સવાલ છે. ખેડૂતોની માગ છે કે મલાના તળાવમાં પાણી ભરવામાં આવે અને દરેક ખેડૂતોને સિંચાઇ માટે પાણી મળી રહે. મલાના તળાવથી 3 હજાર ખેડૂતોની ટ્રેક્ટર રેલી યોજાઇ જેમાં અંદાજે 200 જેટલા ટ્રેક્ટર રેલીમાં જોવા મળ્યા.  મોટી સંખ્યામાં એકઠા થયેલા ખેડૂતો કલેક્ટરને આવેદન પત્ર આપીને રજૂઆત કરશે.