કોરોના સંકટ / ચેતી જજો! સોશિયલ મીડિયામાં કોરોનાની ખોટી વેક્સિનનો વેપાર થયો શરૂ, કરોડોના કૌભાંડની આશંકા

• મહામારીમાં કમાવવા નીકળ્યા ધૂતારા
• ખોટી વેક્સિનના આવી રહ્યા છે મેસેજ
• સોશિયલ મીડિયા પર શરૂ થયો વેપાર

કોરોના મહામારીમાં એક તરફ માનવતાની મહેક ફેલાવતા અનેક દ્રશ્યો સામે આવ્યા હતા. બીજી તરફ હવે જ્યારે વેક્સિનની તૈયારીઓ છે, ત્યારે કાર્ડ વેબ પર હેકર્સ કોરોના વેક્સિનના નામે ખોટી જાહેરાતો આપી લોકો સાથે મોટી છેતરપિંડી કરી રહ્યા છે. તબીબો, મેડિકલ સ્ટોર માલિક, દવાનો જથ્થો રાખનારા વેપારીઓને લોભામણાં મેઈલ કરી રહ્યા છે. હેકર્સ ઈ-મેઈલ પર વેક્સિનના ફોટા મોકલી 20 ml ડોઝના 10 ડોલર કિંમત બતાવી રહ્યા છે. ઓછામાં ઓછા 100 વેક્સિનની ખરીદી કરવાનું કહી 1 હજાર ડોલરની માંગણી લોકો પાસેથી કરી રહ્યા છે. જેમાં લોકો છેતરાઈ પણ રહ્યા છે. પરંતુ આ બધુ આંતરરાષ્ટ્રીય કારસ્તાન હોવાનું સાઈબર એક્સપર્ટ કહી રહ્યા છે. 500 મિલિયન ડૉલરના કૌભાંડની આશંકા વ્યક્ત કરવામાં આવી છે.

ડાર્કવેબ પર હેકર્સ વેક્સિનની એવી લોભામણી ઓફર કરે છે કે કોઈને પણ વિશ્વાસ આવી જાય. અમેરિકાના પૂર્વ રાષ્ટ્રપતિ ડોનાલ્ડ ટ્રમ્પ જે ફાર્મા કંપનીની વેક્સિનથી સારા થયા તે વેક્સિન, અનેક લોકોને જેણે બચાવ્યા તે ઈઝરાયેલની વેક્સિન આવી જાહેરાતો મુકે છે. આ વેક્સિનના એક ડોઝના 2500 ડોલર પડાવે છે. એટલું જ નહીં એવું પણ લખાણ લખે છે કે મૃત્યુથી બચવા કોરોના વેક્સિન એકમાત્ર ઉપાય છે. ડોઝ બીટકોઇનમાં જ મળશે તેવી ઓફર કરી રહ્યા છે. પરંતુ આ તમામ ઓફર માત્રને માત્ર બોગસ હોવાનું નિષ્ણાંતો કહી રહ્યા છે. મહત્વની વાત છે કે કેરલ અને ગુજરાત પોલીસે પણ સોશીયલ મીડિયામાં પોસ્ટ કરી આવી લોભામણી જાહેરાતોથી સચેત રહેવા લોકોને અપીલ કરી છે, સાથે જ આવી ઓફર આવે તો પોલીસનો સંપર્ક સાધવા પણ કહ્યું છે.

કોરોના વેક્સિન હજુ સુધી માર્કેટમાં આવી નથી. ન તો હજુ સુધી તેને સંપૂર્ણ મંજૂરી મળી. પરંતુ હેકર્સ અને ધૂતારા મહામારીમાં કમાવવા માટે નીકળી પડ્યા છે અને લોકોને છેતરી રહ્યા છે. સરકારે આ બાબતે કોઈ કાર્યવાહી કરવાની જરૂરિયાત છે.