BIG NEWS / Twitterમાં સૌથી મોટાં હિસ્સેદાર એલન મસ્કનો આ પદે બેસવાનો ઇનકાર, ખુદ CEOએ કર્યો ધડાકો

• એલન મસ્ક સોશિયલ નેટવર્ક ટ્વિટરના બોર્ડમાં નહીં જોડાય
• ટ્વિટરના સીઈઓ પરાગ અગ્રવાલે આપી જાણકારી
• ટ્વિટરનાં સૌથી મોટા શેરહોલ્ડર છે એલન મસ્ક

ટેસ્લા (Tesla) અને સ્પેસ એક્સ (SpaceX) નાં સીઈઓ એલન મસ્ક સોશિયલ નેટવર્ક ટ્વિટરના બોર્ડમાં નહીં જોડાય. ટ્વિટરના સીઈઓ પરાગ અગ્રવાલે સાર્વજનિક રીતે જાહેરાત કરી હતી કે, એલન મસ્ક ટ્વિટરના સૌથી મોટા શેરહોલ્ડર છે અને કંપની તેમના ઇનપુટ માટે ઓપન રહેશે.

ટ્વિટરનાં સૌથી મોટા શેરહોલ્ડર છે એલન મસ્ક

ટ્વિટરનાં સીઈઓ પરાગ અગ્રવાલે જણાવ્યું હતું કે, એલન મસ્કે માઈક્રોબ્લોગિંગ સાઈટના બોર્ડમાં ન જોડાવાનો નિર્ણય કર્યો છે. થોડાં દિવસો પહેલાં એલન મસ્કે ટ્વિટરમાં 9.2 ટકા હિસ્સો ખરીદ્યો હતો કે જેનાથી તેઓ કંપનીના સૌથી મોટા શેરહોલ્ડર બન્યા હતા.

ટ્વિટરના સીઈઓએ ટ્વિટ કરીને કહ્યું કે, 'બોર્ડ અને મે પોતે બોર્ડમાં સામેલ થવા વિશે એલન મસ્ક સાથે સીધી વાત કરી છે. અમે સહયોગ કરવા માટે ઉત્સાહિત હતા અને જોખમો વિશે પણ સ્પષ્ટ હતા. બોર્ડે તેઓને જોડાવાની ઓફર પણ કરી હતી.'

Elon has decided not to join our board. I sent a brief note to the company, sharing with you all here. pic.twitter.com/lfrXACavvk

— Parag Agrawal (@paraga) April 11, 2022

ટ્વિટરના CEOએ વધુમાં જણાવ્યું કે, 'અમે મંગળવારે જાહેરાત કરી હતી કે, એલન બોર્ડમાં જોડાશે. બોર્ડમાં સત્તાવાર રીતે એલોન મસ્કની 4/9 નાં રોજ નિમણૂંક થવાની હતી, પરંતુ એલને એ જ સવારે કહ્યું હતું કે, તેઓ બોર્ડમાં નહીં જોડાય.

મને આશા છે કે તેઓએ આ નિર્ણય વધુ સારા માટે લીધો હશે : પરાગ અગ્રવાલ

મને આશા છે કે તેઓએ આ નિર્ણય વધુ સારા માટે લીધો હશે. અમે હંમેશા અને હંમેશા અમારા શેરહોલ્ડરોના ઇનપુટની કદર કરીએ છીએ, પછી ભલે તે અમારા બોર્ડમાં હોય કે ન હોય. એલન મસ્ક અમારા સૌથી મોટા શેરહોલ્ડર છે અને અમે હંમેશા તેમના ઇનપુટ માટે ખુલ્લા રહીશું.

અમારા લક્ષ્યો અને પ્રાથમિકતાઓમાં કોઈ જ ફેરફાર નહીં થાય. આપણે કયા નિર્ણયો લઈએ છીએ અને તેનો અમલ કેવી રીતે કરીએ છીએ તે આપણા નિયંત્રણમાં રહેશે, બીજા કોઈના નહીં. લોકોની વાતોને અવગણીને અમે કામ પર લાગી જઇએ છીએ.'