રાહત / મૂશળધાર વરસાદ પગલે રાજ્યના ડેમ છલકાયા 

રાજ્યમાં સિઝનના સારા વરસાદને પગલે અને મધ્યપ્રદેશમાં વરસી રહેલા અનરાધાર વરસાદને પગલે ગુજરાતમાં પાણીની આવક સારી થઈ છે ત્યારે સુરેન્દ્રનગરનો નાયકા ડેમ ઓવરફ્લો થયો છે અને નર્મદા ડેમની સપાટી 136.38 મીટરે પહોંચી ગઈ છે. કેવડિયાના ગોરા બ્રિજ ઉપર પાણી ફરી વળતા બ્રિજ બંધ કરી દેવામાં આવ્યો છે. જ્યારે ઉકાઈ ડેમની સપાટી પણ 103.60 મીટરે પહોંચી.

નર્મદા ડેમની સપાટી 136.38 મીટરે 

નર્મદા ડેમની સપાટી 136.38 મીટરે પહોંચી છે. નર્મદા ડેમમાં હાલ 6 લાખ 67 હજાર ક્યુસેક પાણીની આવક થઇ છે જેને લઇ નર્મદા ડેમમાં 23 દરવાજા ખોલવામાં આવ્યા છે. ડેમમાંથી 6 લાખ 36 ક્યુસેક પાણી નર્મદા નદીમાં છોડવામાં આવી રહ્યું છે. જેને લઇ કેવડિયાનો ગોરા બ્રિજ ફરી બંધ કરી દેવાયો છે.

નર્મદા ડેમમાંથી નર્મદા નદીમાં સતત પાણી છોડવામાં આવી રહ્યું છે. જેના કારણે નર્મદા નદીની જળસપાટીમાં વધારો થઈ રહ્યો છે. ભરૂચ પાસે ગોલ્ડન બ્રિજ નજીક નર્મદા નદીની જળસપાટી 28.5 ફૂટે પહોંચી ગઈ છે.નર્મદા નદીએ ભયજનક 24 ફૂટની જળસપાટી વટાવી દીધી છે. ભયજનક સપાટી વટાવ્યા બાદ નર્મદા નદી 4.5 ફૂટ ઉપરથી વહી રહી છે. જેના કારણે નદી કિનારાના ગામને અલર્ટ કરી દેવામાં આવ્યા છે. સાથે જ અસરગ્રસ્ત ગામડાઓમાં લોકોને સ્થળાંતર કરવામાં આવી રહ્યા છે. સાથે જ ફુરજા રોડ અને ચાર રસ્તા નજીક પાણી આવવાની શરૂઆત થઈ ગઈ છે. જેના કારણે વાહનવ્યવહાર પર અસર થઈ રહી છે.

સુરેન્દ્રનગરનો નાયકા ડેમ થયો ઓવરફ્લો

સુરેન્દ્ર નગરના નાયકા ડેમ ઓવરફ્લો થતા ડેમના 5 દરવાજા 2 ફુટ ખોલવામાં આવ્યા. નીચાણવાળા ગામોને એલર્ટ કરવામાં આવ્યા. જેમાં કુકડા.ગૌતમગઢ. ગોદાવરી અને શેખપર ગામને ખાસ એલર્ટ અપાયા. જો કે તંત્ર અહીં ખાસ નજર રાખીને નિર્માણ થનારી પરિસ્થિતિને પહોંચી વળવા તૈયાર બેઠુ છે. 

ઉકાઈ ડેમની સપાટી 103.60 મીટર

ઉકાઈ ડેમની સપાટી 103.60 મીટર પહોંચી છે. ઉપરવાસમાંથી સતત પાણીની આવક થઇ રહી છે. હાલ ઉકાઇ ડેમમાં 1 લાખ 81 હજાર ક્યુસેક પાણીની આવક છે. જેને લઇ ડેમના 7 ગેટ 4 ફૂટ ખોલાયા છે અને 1 ગેટ 5 ફૂટ ખોલાયો છે. ઉકાઇ ડેમ ભયજનક સપાટીથી માત્ર 5 ફૂટ દૂર છે. ઉકાઇ ડેમમાંથી પાણી છોડવામાં આવતા તાપી નદી બે કાંઠે વહી રહી છે.

દાહોદનો અદલવાડા ડેમ ઓવરફ્લો

દાહોદમાં સતત ધોધમાર વરસાદ વરસી રહ્યો છે.. ભારે વરસાદ થતા અદલવાડા ડેમમાં પાણીની આવક થઈ છે. પાણીની આવક થતા અદલવાડા ડેમ ઓવરફ્લો થયો છે. ડેમમા પાણીની આવક થતા જળસપાટી વધીને 237.30 મીટરે પહોંચી છે. ડેમાંથી પાણી છોડાતા નદીમાં પૂરની સ્થિતિ સર્જાઈ છે. ડેમમાં પાણીની આવક થતા લોકોમાં ખુશીનો માહોલ જોવા મળી રહ્યો છે.

પંચમહાલના દેવ ડેમની જળસપાટી ઉંચી આવે

પંચમહાલના દેવ ડેમની જળસપાટીમાં વધારો થયો છે. ઉપરવાસના વરસાદથી ડેમમાં પાણીની આવક થઇ છે. દેવ ડેમની સપાટી 89.22 મીટરે પહોંચી ગઇ છે. ત્યારે વરસાદ વધુ પડશે તો ડેમમાંથી પાણી છોડવામાં આવશે. 

નર્મદાનો કરજણ ડેમ ઓવરફ્લો

નર્મદામાં સતત વરસાદ વરસી રહ્યો છે. ભારે વરસાદ થતા કરજણ ડેમ ઓવરફ્લો થયો છે.. હાલમાં ડેમમાં 1 લાખ 10 હજાર ક્યુસેક પાણીની આવક થઈ રહી છે. પાણીની આવક થતા ડેમની સપાટી વધીને 114.58 મીટરે પહોંચી છે. ડેમમાંથી પાણી છોડાતા નદી બે કાંઠે વહેતી થઈ છે.. નદી બે કાઠે વહેતા 8 ગામને એલર્ટ કરાયા છે. રાજપીપલા શહેરના નદી કાંઠે વિસ્તારમાં પાણી ભરાતા 20 મકાનમાં રહેતા લોકોનું સ્થળાંતર કરાયું છે.