નિર્ણય / અમદાવાદમાં કોરોના રેકોર્ડબ્રેક કેસો સામે આવતાં તંત્ર એક્શનમાં, રાજ્યના આરોગ્યમંત્રીએ તાબડતોબ બોલાવી બેઠક

• અમદાવાદમાં કોરોના બેકાબૂ થતા તંત્ર એક્શનમાં
• આરોગ્ય મંત્રી ઋષિકેશ પટેલે તાબડતોબ કરશે બેઠક
• બેઠકમાં ટાસ્ક ફોર્સના તબીબો, AMC કમિશનર ઉપસ્થિત રહેશે

અમદાવાદમાં કોરોનાને લઈને સ્થિતી કથળતાં તંત્ર એક્શન મોડ પર 

અમદાવાદમાં કોરોના સંક્રમણની સ્પીડમાં રોકેટ ગતિએ વધારો થઈ રહ્યો છે.મંગળવારે કોરોનાના રેકોર્ડબ્રેક કેસો નોંધાવાની સાથે ત્રણ કોરોના સંક્રમિત દર્દીના મોત થવા પામ્યા હતા. આમ શહેરમાં કોરોનાની સ્થિતી કથળતાં તંત્ર એક્શન મોડમાં આવી ગયું છે. રાજ્યના આરોગ્યમંત્રી ઋષિકેષ પટેલની અધ્યક્ષતામાં એક બેઠક યોજાશે. જેમાં ટાસ્કફોર્સના તબીબો, AMC કમિશ્નર, કલેકટર સહિતના અધિકારીઓ ઉપસ્થિત રહી અમદાવાદમાં વધતું કોરોનાનું સંક્રમણ અટકાવવા માટેની ચર્ચા કરવામાં આવશે. ઉલ્લેખનીય છે કે, મંગળવારે છેલ્લા 24 કલાક દરમિયાન અમદાવાદમાં રેકોર્ડબ્રેક એટલે કે, 5998 કેસો નોધાયા હતાં 

અમદાવાદમાં પોઝિટિવીટી રેશિયો 30 ટકા કરતા વધુ

બીજી તરફ અમદાવાદ મ્યુનિસિપલ કોર્પોરેશન દ્વારા શહેરમાં કોરોના ટેસ્ટ માટે RTPCR અને રેપીડ એન્ટિજન ટેસ્ટની સંખ્યામાં વધારો કરવામાં આવતા RTPCR આર.ટેસ્ટમાં પોઝિટિવીટી રેટ 30 ટકા સુધી અને રેપીડ એન્ટીજન ટેસ્ટમાં પોઝિટિવિટી રેટ 10 ટકા સુધી પહોંચ્યો છે. આ કારણથી મંગળવારે શહેરમાં કોરોનાના 5998 નવા કેસ નોંધાયા હતાં. ઉલ્લેખનીય છે કે, ઉત્તરાયણ પર્વ બાદ મ્યુનિસિપલ કોર્પોરેશન દ્વારા કોરોના અંગે RTPCR ઉપરાંત રેપીડ એન્ટિજન ટેસ્ટની સંખ્યામાં વધારો કરવામાં આવતા શહેરમાં કોરોનાના કેસ વધવાની સાથે પોઝિટિવિટી રેટમાં પણ વધારો થયો હોવાનું સત્તાવાર સૂત્રોમાંથી જાણવા મળે છે.