નિવેદન / આંદોલનની વચ્ચે સરકારને શરદ પવારની ચેતવણી, ખેડૂતોની સહનશીલતાની કસોટી ન લો નહીંતર...

• ખેડૂત આંદોલનનો 16મો દિવસ 
• શરદ પવારે સરકારને ફરીવાર આપી ચેતવણી 
• ખેડૂતોની સહનશીલતાની પરીક્ષા ન કરવા મોદી સરકારને કહ્યું

પત્રકારો સાથે વાત કરતા પૂર્વ કેન્દ્રીય કૃષિ મંત્રીએ એમ પણ કહ્યું હતું કે, જો સરકાર ખેડૂતોની માંગણીઓ અંગે સમયસર નિર્ણય નહીં લે તો દિલ્હીની સરહદો પર પ્રદર્શન અન્યત્ર ફેલાઈ શકે છે.

તેમણે કહ્યું હતું કે વિરોધી પક્ષો દ્વારા વિગતવાર ચર્ચા કરવાની માંગ છતાં, સંબંધિત કૃષિ બિલને ઉતાવળમાં સંસદમાં પસાર કરવામાં આવ્યા હતા. આ કૃષિ કાયદાને રદ કરવાની માંગ માટે વિવિધ રાજ્યોના ખેડુતો લગભગ બે અઠવાડિયાથી દિલ્હીના સિંઘુ, ટીકરી, ગાઝીપુર અને ચિલા બોર્ડર્સ પર પ્રદર્શન કરી રહ્યાં છે. ખેડૂતોનું કહેવું છે કે આ કાયદાઓથી મીનીમમ સપોર્ટ પ્રાઈસ (MSP) એટલે કે ટેકાના ભાવની સુરક્ષા કવચનો અંત આણી દેશે. અને તેમની આવક સુનિશ્ચિત કરનારી મંડીઓ પણ હટી જશે. પરંતુ સરકારના મતે, MSP સિસ્ટમ ચાલુ રહેશે અને નવા કાયદાથી ખેડૂતોને તેમની પેદાશો વેચવા માટે વધુ વિકલ્પો પૂરા પાડવામાં આવશે.

પવારની ચેતવણી

પવારે કહ્યું, 'આજે ખેડૂતોએ કાયદાને પાછો ખેંચવાની પ્રબળ માંગ કરી છે અને કહ્યું છે કે આ મુદ્દા પર પછીથી ચર્ચા થઈ શકે છે. પરંતુ આ અંગે કેન્દ્રનું વલણ અનુકૂળ લાગતું નથી. તેથી એવા સંકેત મળી રહ્યા છે કે થોડા દિવસો સુધી ગતિરોધ ચાલુ થઈ શકે છે. ' વરિષ્ઠ નેતાએ કહ્યું કે શુક્રવારે સવારે લગભગ 700 ટ્રેકટરોથી વધુ લોકો આ વિરોધમાં જોડાવા માટે દિલ્હી સરહદ પહોંચ્યા હતા. તેમણે કહ્યું, 'આ પ્રદર્શન દિલ્હીની સરહદો સુધી મર્યાદિત છે. પરંતુ તે નકારી શકાય નહીં કે જો સમયસર નિર્ણય લેવામાં નહીં આવે તો તે અન્યત્ર ફેલાઈ શકે છે.

એનસીપી નેતાએ કહ્યું કે, અમે ભારત સરકારને વિનંતી કરીએ છીએ કે ખેડૂત દેશનો અન્નદાતા છે અને તેની સહનશીલતાની કસોટી ન થવી જોઈએ. પવારે ગુરુવારે મીડિયામાં થયેલી અટકળોને નકારી કાઢી હતી કે તેઓ UPAના અધ્યક્ષ બની શકે છે. તેમણે કહ્યું, 'આ ખોટા સમાચાર છે. આવા ખોટા સમાચારો ન ચલાવો. '

કેન્દ્રીય મંત્રી રાવસાહેબ દાનવે દ્વારા ખેડૂત આંદોલન પાછળ ચીન અને પાકિસ્તાનનો નિવેદન આપેલ નિવેદન પર તેમણે પ્રતિક્રિયા આપી હતી કે, "કેટલાક લોકો એવા છે કે તેઓને ક્યાં અને કેવી રીતે બોલવું તે સમજાતું નથી." અગાઉ પણ તેમણે આવા નિવેદનો આપ્યા હતા.