અધિકાર યાત્રા / હવે દિવ્યાંગ શિક્ષકોએ સરકાર સામે બાંયો ચડાવી!, ચોટીલાથી પગપાળા પહોંચ્યા ગાંધીનગર, જાણો શું કરી છે માંગ

• દિવ્યાંગ શિક્ષક અધિકાર યાત્રા પહોંચી ગાંધીનગર
• 3 મુખ્ય માંગણીઓને લઈને કરશે રજૂઆત
• સેક્ટર-13 ખાતે સભા કરી સરકારને કરશે રજૂઆત

ગુજરાતમાં છેલ્લા કેટલાય સમયથી કોઇને કોઇ કર્મચારીઓ પોતપોતાની માંગણીઓને લઇને આંદોલન કરી રહ્યાં છે. ત્યારે આજે રાજ્યના દિવ્યાંગ શિક્ષકોની અધિકાર યાત્રા પોતાની માંગણીઓને લઇને ગાંધીનગર ખાતે પહોંચી છે. ચોટીલાથી પગપાળા યાત્રા કરી શિક્ષક અધિકાર યાત્રા આજે ગાંધીનગર સેક્ટર-13 ખાતે પહોંચી છે. સેક્ટર-13 ખાતે સભા કરીને આ દિવ્યાંગ શિક્ષકો પોતાની માંગણીઓની રજૂઆત કરશે. તમને જણાવી દઇએ કે, મુખ્ય 3 માંગણીઓને લઈને દિવ્યાંગ શિક્ષકો પોતાની રજૂઆત કરવા ગાંધીનગર પહોંચ્યા છે.

જાણો દિવ્યાંગ શિક્ષકોની કઇ-કઇ છે મુખ્ય માંગ?

• દિવ્યાંગ બાળકો માટે સ્પેશિયલ એજ્યુકેટરની કાયમી ભરતી કરવામાં આવે 
• દિવ્યાંગ શિક્ષણ અને પુનર્વસન માટે કાર્યરત 1084 એજ્યુકેટર સહિત RCIમાં દર્શાવેલ પે ગ્રેડ મુજબ સળંગ સેવા ગણવી
• 21 પ્રકારની દિવ્યતા ધરાવતા બાળકોને માસિક 3 હજાર સહાય આપવી
• નીરાધાર અને એકવાલી વાળા દિવ્યાંગ બાળકને માસિક 5 હજાર સહાય આપવા માંગ

તમને જણાવી દઇએ કે, છેલ્લા કેટલાક દિવસથી ચાલતી દિવ્યાંગ બાળકો કે દિવ્યાંગ બાળકોના શિક્ષણ અને પુનર્વસન માટે કાર્યરત સ્પેશિયલ એજ્યુકેશન અને આઈડી કોર્ડીનેટર અને દિવ્યાંગોના હક અને અધિકારો માટે વિશિષ્ટ શિક્ષક સંઘ દ્વારા દિવ્યાંગ અધિકાર યાત્રાનું આયોજન કરાયું છે. લખધીરભાઈ મેર દ્વારા ગાંધી ચિંધ્યા માર્ગે દિવ્યાંગ શિક્ષણ સંવાદ અને પદયાત્રાનું આયોજન 6 ઓક્ટોબરથી 10 ઓક્ટોબર સુધી ચોટીલાથી ગાંધીનગર સુધી કરવામાં આવ્યું છે જેમાં ત્રણ મુખ્ય માંગણીઓનો સમાવેશ કરાયો છે.

TB વિભાગના કરાર આધારિત કર્મીઓ પણ આવતીકાલે કેન્ડલ માર્ચ કરશે

વધુમાં TB વિભાગના કરાર આધારિત કર્મચારીઓ પણ આવતીકાલે કેન્ડલ માર્ચ કરશે. વિવિધ પડતર પ્રશ્નોને લઇને આ કર્મચારીઓ આવતીકાલે કેન્ડલ માર્ચ કરશે. જેમાં પગાર વધારો, પેટ્રોલ એલાઉન્સ અને સેવા મુક્તિ સમયે યોગ્ય વળતરની તેઓ માંગ કરશે. જો માગ નહીં સ્વીકારવામાં આવે તો તેઓ ધરણા પર બેસશે અને તેમને વિરોધ પ્રદર્શનની પણ ચીમકી આપી છે.