શોધ / શનિ ગ્રહની પરિક્રમા કરી રહેલા ૨૦ નવા ચંદ્રની શોધ, હવે શનિ પાસે હશે સૌથી વધારે ચંદ્ર

• શનિ પાસે હશે કુલ 82 ચંદ્ર
• સંશોધકોએ શનિ પાસે 20 નવા ચંદ્રની કરી શોધ
• પહેલાં ગુરુ પાસે સૌથી વધુ 79 ચંદ્ર હતા

ત્રણ ચંદ્ર જે શનિની દિશામાં જ તેની પરિક્રમા કરી રહ્યા છે

સંશોધકોનું માનવું છે કે આ શોધ શનિની ઉત્પત્તિ અને વિકાસ પર વધુ પ્રકાશ પાડે છે. હવાઇમાં સ્થિત સુબારુ ટેલિસ્કોપની મદદથી આ ચંદ્રમાની શોધ કરનારા સંશોધકોમાં અમેરિકા સ્થિત કાર્નેગી ઇન્સ્ટિટ્યૂટ ફોર સાયન્સના સ્કોટ એસ. શેફર્ડ પણ સામેલ છે. સંશોધનના પ્રમુખ શેફર્ડે જણાવ્યું કે શોધેલા તમામ ચંદ્રમાનો વ્યાસ લગભગ પાંચ કિમી છે, તેમાંથી ત્રણ ચંદ્ર શનિની પોતાની ધરી પર પરિક્રમા કરી રહ્યા છે, જ્યારે ૧૭ વિપરીત દિશામાં છે. અભ્યાસના આધારે સંશોધકોએ જણાવ્યું કે ત્રણ ચંદ્ર જે શનિની દિશામાં જ તેની પરિક્રમા કરી રહ્યા છે તેમાંથી બે ત્રીજાની તુલનામાં આ ગ્રહની નજીક છે. આ બે ચંદ્રમાને શનિની પરિક્રમા કરવામાં બે વર્ષનો સમય લાગે છે, જ્યારે ત્રીજાને વધુ અંતરના કારણે ત્રણ વર્ષનો સમય લાગે છે. 

નાના નાના ચંદ્ર કોઇ મોટા ચંદ્રથી તૂટીને બન્યા હોય તેવું શક્ય છેઃ સંશોધન

શેફર્ડના જણાવ્યા મુજબ આ ચંદ્રમાઓની કક્ષાઓના અભ્યાસથી તેની ઉત્પત્તિની જાણ થાય છે, સાથે તેની ઉત્પત્તિના સમયે શનિની આસપાસની સ્થિતિ અંગે પણ જાણકારી મળી શકે છે, તેનાથી શનિની ઉત્પત્તિની સાથે તેમાં આવેલાં પરિવર્તનો ઉપરાંત અન્ય ગ્રહોની ઉત્પત્તિ અને વિકાસ અંગે પણ જાણી શકાય છે. સંશોધકોમાં શેફર્ડ ઉપરાંત યુનિવર્સિટી ઓફ કેલિફોર્નિયા લોસ એન્જલસના ડેવિડ જેવિટ અને હવાઇ યુનિવર્સિટીના જન ક્લેઇના પણ સામેલ છે. સંશોધકોએ એવી પણ શક્યતા વ્યક્ત કરી છે કે નાના નાના ચંદ્ર કોઇ મોટા ચંદ્રથી તૂટીને બન્યા હોય તેવું શક્ય છે. શેફર્ડ આ પહેલાં પણ આવી શોધ કરી ચૂક્યા છે. તેમણે ગુરુની પરિક્રમા કરી રહેલા ૧૨ ચંદ્રની શોધ કરી હતી.