મંગળવારે કર્ણાટક અને પંજાબ અને તામિલનાડુ અને હિમાચલ પ્રદેશ વચ્ચે રમાશે મેચ
બુધવારે હરિયાણા-બરોડા અને બિહાર-રાજસ્થાનની મેચો રમાશે
મોટેરાની પીચ કેવી હશે તેનાં પર સૌની નજર
સૈયદ મુશ્તાક અલી ટ્રોફીની નોકઆઉટ મેચ સરદાર પટેલ મોટેરા સ્ટેડિયમમાં રમાનાર છે. જેમાં નવા પ્રકારની તૈયારીઓ કરવામાં આવી છે. જેનો નજારો વધારે રસપ્રદ રહેશે સાથે સાથે તેની પીચ કેવી રહેશે તેનાં પર પણ નજર રાખવામાં આવશે. કેમકે ભારત-ઈંગ્લેન્ડ વચ્ચે એક ડે નાઈટ ટેસ્ટ મેચ આ સ્ટેડિયમમાં રમાનાર છે.
દિનેશ કાર્તિકે કહ્યું નવુ સ્ટેડિયમ શાનદાર
દિનેશ કાર્તિકે તેનાં ટ્વિટર એકાઉન્ટ પર મોટેરા સ્ટેડિયમની અમુક તસવીરો શેર કરી છે. જેમાં તેણે કેપ્શન લખ્યું છે કે, નવું સ્ટેડિયમ શાનદાર લાગી રહ્યું છે. મને ખાતરી છે કે અહીં રમાનારી આંતરરાષ્ટ્રીય મેચો મજેદાર રહેશે અને ટૂંક સમયમાં આ સ્ટેડિયમ આઈપીએલ વેન્યૂ પણ બની જશે.
1.10લાખની કેપેસિટી ધરાવે છે મોટેરા સ્ટેડિયમ
અમદાવાદનું મોટેરા સ્ટેડિયમ વિશ્વનું સૌથી મોટુ સ્ટેડિયમ છે. 63 એકરમાં ફેલાયેલા આ સ્ટેડિયમને ફરી બનાવવામાં આશરે 750 કરોડનો ખર્ચ કરવામાં આવ્યો છે. આ સ્ટેડિયમ મેલબર્ન ક્રિકેટ ગ્રાઉન્ડથી પણ મોટું છે. જ્યાં 1 લાખ 10 હજાર દર્શકોની બેઠક ક્ષમતા છે.
મેદાનમાં છે 11 પ્રકારની વિવિધ પીચો
મોટેરાનાં મેદાનમાં 11 પ્રકારનાં વિવિધ પીચો છે, ત્રણ પ્રેક્ટિસ ગ્રાઉન્ડ અને એક ઈન્ડોર ક્રિકેટ એકેડેમી છે. સૌથી ખાસ બાબત એ છે કે આ મેદાનમાં વરસાદ આવવા છતાં ત્યાં વધારે મુશ્કેલી પડશે નહીં. વરસાદનું પાણી સ્ટેડિયમમાંથી નીકાળવા માટે અહીં આધુનિક સિસ્ટમ લગાવવામાં આવી છે જે એક કલાકમાં મેદાનમાંથી પાણી બહાર કાઢીને મેદાનને ફરી રમવા લાયક બનાવી દે છે.
મંગળ અને બુધવારે ચાર મેચો રમાશે
મોટેરા સ્ટેડિયમમાં કર્ણાટક અને પંજાબ વચ્ચે સૈયદ મુશ્તાક અલી ટ્રોફીની ક્વોર્ટર ફાઇનલ મેચ મંગળવારે શરૃ થશે અને ત્યારબાદ તામિલનાડુ અને હિમાચલ પ્રદેશ વચ્ચે મેચ રમાશે. ઉપરાંત હરિયાણા-બરોડા અને બિહાર-રાજસ્થાનની અન્ય બે ક્વોર્ટર ફાઇનલ બુધવારે રમાશે.