સજા / વધુ એક હવસખોર દંડાયો: સગીરા સાથે દુષ્કર્મ કેસમાં ધોરાજી સેસન્સ કોર્ટે આપી કડક સજા, જાણો કેસ

• ધોરાજી દુષ્કર્મના કેસમાં આરોપી સંજયને 10 વર્ષની સજા
• ધોરાજી સેશન કોર્ટે સગીરા સાથે દુષ્કર્મ કેસમાં કર્યો હુકમ
• આરોપી સંજયને 10 વર્ષની સખત સજા અને 10 હજારનો દંડ ફટકાર્યો

રાજકોટના ધોરાજીમાં 2020માં સગીરા સાથે દુષ્કર્મની ઘટના પ્રકાશમાં આવી હતી. ત્યારબાદ આ કેસ અદાલતમાં ચાલી જતા અદાલતે આકરા પાણીએ થઇ દુષ્કર્મના કેસમાં સંડોવાયેલ આરોપીને 10 વર્ષની કડક સજા સંભળાવી છે. ધોરાજીના દુષ્કર્મના કેસમાં આરોપી સંજય ઉર્ફે ચંદુને 10 વર્ષની સજા અને રૂા. 10 હજારનો દંડ સ્પેશ્યલ કોર્ટ દ્વારા ફટકારવામાં આવેલ છે તેમજ ભોગ બનનારને રૂા. 4 લાખનું વળતર ચુકવવાનો હુકમ કરેલ છે.

2020માં સગીરા સુરતથી ધોરાજી પોતાના સબંધીને ત્યાં આવી હતી

કેસની વિગત અનુસાર 2020માં સગીરા સુરતથી ધોરાજી પોતાના સબંધીને ત્યાં આવી હતી. ત્યારબાદ જન્માષ્ટમી 2020ના રોજ સગીરા આરોપી સાથે ભાગી ગઈ હતી. આ દરમિયાન સોમનાથ અને દ્વારકા સહિતના શહેરોમાં રહ્યા હતાં. આ દરમિયાન આરોપીએ ભોગ બનનાર સાથે સંબંધ બાંધેલો હતો. ભોગ બનનાર ઘરેથી ભાગી ગયેલ ત્યારે તેની ઉંમર 17 વર્ષ 11 માસ અને અમુક દિવસો હતી. 

ચાર લાખ વિકટીમ કોમ્પનેશન સ્કીમ હેઠળ ચૂકવવા આદેશ

આ કેસમાં તપાસમાં ભોગ બનનાર સાથે 18 વર્ષની ઉંમરમાં ચાર દિવસ ઘટતા હતા ત્યારે આરોપીએ તેની સાથે શરીર સંભોગ કર્યો હોવાનું સામે આવતા સરકારી મારફતે દલીલ કરાઈ હતી  કે આરોપીએ 18 વર્ષથી નાની વયની દીકરી સાથે શરીર સંબંધ બાંધેલો છે. આ દલીલને ધ્યાને લઈ અને ધોરાજીના એડિશનલ ડિસ્ટ્રિક્ટ એન્ડ સેશન્સ જજ રાહુલકુમાર એમ શર્માએ આરોપી સંજય ઉર્ફે ચંદુને ભારતીય દંડ સંહિતાની કલમ 376 (1) તથા પોક્સો એક્ટની કલમ ચાર મુજબ આરોપી ઠેરવી 10 વર્ષની સખત સજા તથા રૂપિયા 10,000 દંડ અને ભોગ બનનારને ડીસ્ટ્રીક લીગલ સર્વીસ ઓથોરિટી તરફથી રૂપિયા ચાર લાખ વિકટીમ કોમ્પનેશન સ્કીમ હેઠળ ચૂકવવા માટેનો આદેશ કર્યો હતો.