ધોળકા વિધાનસભા બેઠક / કોંગ્રેસી નેતા અમિત ચાવડા અને પરેશ ધાનાણી વિધાનસભા અધ્યક્ષ પાસે કરી આવી માગ

• ધોળકા વિધાનસભાની બેઠકનો મામલો ગરમાયો 
• કોંગ્રેસ પ્રદેશ પ્રમુખ અમિત ચાવડાએ સ્પીકરને લખ્યો પત્ર
• વિપક્ષ નેતા પરેશ ધાનાણીનો વિધાનસભા સ્પીકરને પત્ર લખી બેઠક ખાલી જાહેર કરવા કરી માગ

ઉલ્લેખનીય છે કે, આ તરફ કોંગ્રેસ પ્રદેશ પ્રમુખ અમિત ચાવડાએ વિધાનસભા અધ્યક્ષની કામગીરી સામે સવાલ ઉઠાવતા કહ્યું કે કોંગ્રેસ MLAની બેઠક અધ્યક્ષ રાતોરાત ખાલી જાહેર કરે છે. તો ભાજપના નેતાની કેમ નહીં. આ સાથે જ કહ્યું કે ભુપેન્દ્રસિંહ કોઇ હોદ્દો ન ભોગવે તે જવાબદારી અધ્યક્ષની છે. 

ભવિષ્યની પેઢીમાં દાખલો બેસે તે માટે શિક્ષણમંત્રીનું પદ ખાલી કરાવવામાં આવે. આ સાથે જ માગ કરી કે અધ્યક્ષ પક્ષાપક્ષીથી દૂર રહી પોતાની ફરજ બજાવે અને તાત્કાલિક ધોળકા બેઠક ખાલી જાહેર કરે. 

પરેશ ધાનાણીએ પણ લખ્યો પત્ર 

ધોળકા વિધાનસભા મામલે રાજકારણ ગરમાયું છે ત્યારે વિપક્ષ નેતા પરેશ ધાનાણીએ પણ વિધાનસભા સ્પીકરને પત્ર લખ્યો છે અને તાત્કાલિક અસરથી ધોળકા વિધાનસભાની બેઠક ખાલી જાહેર કરવા કરી માગ કરી છે. ધાનાણીએ પોતાના પત્રની સાથે હાઇકોર્ટના ઓર્ડરની કોપી સાથે જોડી છે.

રાજ્યના શિક્ષણમંત્રીને મોટો ઝટકો મળ્યો 

રાજ્યના શિક્ષણ મંત્રી અને ભાજપના પીઢ નેતા ભૂપેન્દ્ર સિંહ ચુડાસમાને એક જ દિવસમાં હાઇકોર્ટ દ્વારા બે ઝટકા લાગ્યા છે. વર્ષ 2017ની ધોળકા બેઠકની ચૂંટણી રદ કરવા હાઈકોર્ટે આદેશ આપ્યો છે. ગુજરાત વિધાનસભાની 2017ની ચૂંટણીમાં ભુપેન્દ્રસિંહ ચુડાસમાની જીતને હાઈકોર્ટમાં પડકારવામાં આવી હતી. જેને લઈને ગુજરાત હાઈકોર્ટે ભુપેન્દ્રસિંહ ચુડાસમાની વિરૂધ્ધમાં ચુકાદો આપ્યો હતો. 

આ સમગ્ર મામલે શિક્ષણમંત્રી ભુપેન્દ્રસિંહ ચુડાસમા વકીલોની સલાહ બાદ ગુજરાત હાઇકોર્ટે આપેલા ચુકાદાને સુપ્રીમ કોર્ટમાં પડકારશે. આપને જણાવી દઈએ કે,કોંગ્રેસના ઉમેદવાર અશ્વિન કુમાર દ્વારા ભુપેન્દ્રસિંહ ચુડાસમાના વિજયને હાઇકોર્ટમાં પડકારવામાં આવ્યો હતો. તેમણે 2018માં હાઇકોર્ટમાં ઇલેક્શન પીટિશન દાખલ કરી હતી. ત્યારબાદ તબક્કવાર આ કેસ અંગે અનેક વિવાદો ઉભા થયા અને સુનાવણી ચાલતી રહી. જો કે હાઈકોર્ટે આ કેસમાં મહત્વપૂર્ણ ચૂકાદો આપ્યો છે અને 2017ની ધોળકા બેઠકની ચૂંટણી રદ્દ કરવાનો આદેશ કર્યો છે.