વાસ્તવિકતા / અધિકારીઓને મામુ બનાવતા કિરણ પટેલની આ વેપારીએ વર્ષ પહેલા ખોલી હતી પોલ, મહાઠગના મરી ગયા હતા મોતિયા

• કિરણ પટેલના ઝાંસામાં ધવલભાઈ રાવલે આવ્યા ન હતા
• અગાઉ જ ધવલભાઈ કિરણ પટેલનો કાળો ચિઠ્ઠો ખોલી ચૂક્યા છે
• સોશિયલ મીડિયા મારફતે કિરણ પટેલની વાસ્વિકતા લોકોને જણાવી હતી

PMOના ઉચ્ચ અધિકારીની ઓળખ બતાવી અનેક સાથે છેતરપિંડી આચરનાર મહાઠગ કિરણ પટેલ મામલે એક બાદ એક ખુલાસા થઈ રહ્યાં છે. જમ્મુ કાશ્મીરમાં PMOના ઉચ્ચ અધિકારી ગણાવી બુલેટપ્રૂફ વાહનમાં ફરતા અમદાવાદના મહાઠગ કિરણ પટેલની ધરપકડ કરી દેવાઈ છે. પરંતુ મહાઠગ કિરણ પટેલે સમગ્ર દેશને મામુ બનાવ્યો પરંતુ ધવલભાઈ રાવલે તેના ઝાંસામાં આવ્યા ન હતા અને તેનું  ઘટસ્ફોટ કરી દીધો હતો. અધિકારીઓને મામુ બનાવતા કિરણ પટેલની આ વેપારીએ વર્ષ પહેલા પોલ ખોલી હતી. 

કિરણ પટેલે ધવલભાઈને પણ ધમકાવ્યા હતા
ધવલભાઈ રાવલે જણાવ્યું કે, કિરણ પટેલ મારી પાસે ઘણાબધા લોકોના નંબર માગતા હતા મેં એમને ના પાડી તો એ મને સારી ભાષામાં ધમકાવવા લાગ્યા અને કહેવા લાગ્યા કે, હું PMO ઓફિસમાં છું અને મારે મોદી સાહેબ જોડે દિવસમાં બે ત્રણ વાર વાત થાય છે અને જો તમે સીધી રીતે નંબર નહી આપો તો હું સાયબર ક્રાઈમમાંથી લઈ લઈશ પણ તમારા કેરિયર ખરાબ થઈ જશે.

લોકોને ટ્વીટ મારફતે કિરણ પટેલ વિશે માહિતી આપી હતી: ધવલભાઈ રાવલે
ધવલભાઈ રાવલે કહ્યું કે, કિરણ પટેલને હું પગથી માથા સુધી જાણું છું, મારી પાસે તેણે વિગતો માગી ત્યારે મેં ગુગલ અને યુ ટ્યુબના માધ્યમથી જાણી લીધું હતું કે, એવું કોઈ નથી આ ફેકું છે. તેમણે કહ્યું કે, મને જે રીતે કિરણ પટેલની વાસ્વિકતાની માહિતી મળતી ગઈ તે રીતે આ વ્યક્તિ વિશે હું ટ્વીટ કરતો ગયો અને આ ટ્વીટ કરવાનો હેતુ એટલો હતો કે, લોકોમાં અવરનેશ આવે. મારા પાસે કિરણ પટેલની એક બાદ એક માહિતી આવતી ગઈ તેમ તેમ મેં સોશિયલ મીડિયાના મારફતથી જણાવતો ગયો. .

અનેક જગ્યાએ છેતરપિંડી આચરી ચૂક્યો છે
કિરણ પટેલે વડોદરામાં 2018માં ગરબા મહોત્સવનું આયોજન કર્યું હતું. જેમાં તેણે અમદાવાદના ડેકોરેશનના ધંધાર્થીઓને ચૂનો ચોપડ્યો હતો. કિરણ પટેલે જૈન ડેકોરેટર્સ એન્ડ કેટરર્સ સાથે 1 કરોડથી વધુની છેતરપિંડી આચરી હતી. જેથી કિરણ પટેલ વિરુદ્ધ રાવપુરા પોલીસ સ્ટેશનમાં ફરિયાદ દાખલ કરવામાં આવી હતી. 

G 20 અંતર્ગત યોજી હતી કોન્ફરન્સ 
મહાઠગ કિરણ પટેલ અને તેની પત્ની રાષ્ટ્રપ્રથમ નામનું સંગઠન ચલાવે છે. તાજેતરમાં જ રાષ્ટ્રપ્રથમના બેનર હેઠળ કિરણ પટેલે અમદાવાદમાં G 20 અંતર્ગત કોન્ફરન્સ યોજી હતી. ગત 29 જાન્યુઆરીના હોટેલ હયાતમાં કોન્ફરન્સ યોજાયેલી G-20 કોન્ફરન્સમાં સચિવો અને રિટાયર્ડ સચિવોને આમંત્રણ અપાયુ હોવાનો ખુલાસો થયો છે.

પોતાને ગણાવતા હતો PMO ઓફિસર
જમ્મુ અને કાશ્મીર પોલીસે શ્રીનગરમાં એક મોટી કાર્યવાહી કરી છે. એક હાઈપ્રોફાઈલ કેસમાં અમદાવાદના કિરણ પટેલની ધરપકડ કરવામાં આવી છે. માહિતી મુજબ ધરપકડ કરાયેલ કિરણ પટેલ નામના વ્યક્તિએ બનાવટી દસ્તાવેજોના આધારે સત્તાવાર પ્રોટોકોલ મેળવ્યો હતો. ધરપકડ કરાયેલ વ્યક્તિ પોતાની ઓળખ વડાપ્રધાન કાર્યાલય, નવી દિલ્હીમાં એડિશનલ ડાયરેક્ટર (સ્ટ્રેટેજી એન્ડ કેમ્પેન્સ) તરીકે આપતો હતો. જમ્મુ-કાશ્મીર પોલીસને મળેલી ગુપ્ત માહિતી બાદ પોલીસે આ કાર્યવાહી કરી હતી. શ્રીનગરની એક સ્થાનિક કોર્ટે ગુરુવારે (16 માર્ચ) કિરણને ન્યાયિક કસ્ટડીમાં મોકલી દીધો. આ વ્યક્તિ પોતાને પીએમઓ ઓફિસર ગણાવતો હતો.