પર્દાફાશ / જો જો કોઇ તમને ખાલી ગેસ સિલિન્ડર ન પધરાવી દે, અમદાવાદમાં જુઓ કેવી રીતે થાય છે ગોલમાલ

• ગેસ બોટલમાં મોટી ગોલમાલ
• અમદાવાદમાં ડિલિવરી બોયે પધરાવી દીધો સીલ બંધ ખાલી ગેસ સિલિન્ડર
• સંબધિત એજન્સીમાં જાણ કરી તો કર્યા હાથ અધ્ધર 

જો તમારા ઘરે ગેસ સિલિન્ડર કનેક્શન હોય તો જરા વજન કરી ને ગેસ સિલિન્ડર લેજો. કેમ કે અત્યાર સુધી તમે ગેસ સિલિન્ડર માં કેટલાક પ્રમાણમાં ગેસ ઓછો આવતા હોવાનું સાંભળ્યું કે જોયું હશે. પણ શહેરમાં એક કિસ્સો એવો સામે આવ્યો કે જેમાં પુરે પૂરો સિલિન્ડર ખાલી ગ્રાહકને પધરાવી દીધો.

અમદાવાદના દિલ્હી દરવાજાના પરિવાર સાથે થઈ છેતરામણ
જી હા. આ વાત કહેવા કોઈ અતિશયોક્તિ નથી કે હાલમાં કોઈ નાગરિક પરેશાન નથી. પણ જ્યારે તેની સાથે આંખોદેખી રીતે છેતરપિંડી થાય તો. આવો જ એક કિસ્સો દિલ્હી દરવાજા પાસે ભોંય વાળામાં રહેતા એક પરિવાર સાથે બન્યો છે. સાગરભાઈ નામની વ્યક્તિએ પોતાના ઘરે ગેસ સિલિન્ડર પુરો થવા આવતા સિલિન્ડર નોંધાવ્યો. જે નોંધાયેલ સિલિન્ડર તેમના ઘરે ડિલિવરી મેન આપવા પહોંચ્યો. પણ સીલ પેક ખાલી સિલિન્ડર કર્મચારી આપીને પધરાવી જતો રહ્યો. જે સિલિન્ડર ખાલી હોવાની જાણ થતાં ગ્રાહકે એજન્સીમાં ફરિયાદ કરી. પણ ત્યાં યોગ્ય જવાબ નહિ મળતા ગ્રાહક સાગરભાઈએ ગ્રાહક સુરક્ષા અને પગલાં સમિતિના દરવાજા ખખડાવ્યા છે.

ગેસના બાટલાની ખરાઈ કરવી જરૂરી
આમ તો ગેસનો બોટલમાં ગેસ સાથે 30 કિલોની આસપાસ વજન હોય છે,ગ્રાહકો વજન ચેક કરીને લેવાનો આગ્રહ રાખવાનો હોય છે. પરંતુ ગ્રાહકો ગેસ બાટલો મેળવે ત્યારે વજન ચેક કરતા નથી અને છેતરાય છે. બાટલાનો વજન આશરે 15.3 કિલો હોય છે. જ્યારે તેમાં 14.2 કિલો જ ગેસ ભરેલો હોય છે.

આ રીતે કુલ વજન 29.5 કિલો થાય છે. જોકે, જુદી જુદી કંપનીના સિલિન્ડરનો વજન જુદો જુદો હોઈ શકે છે. ગ્રાહકની જવાબદારી એ બને છે કે સીલ બંધ કન્ડિશનમાં ગેસ સિલિન્ડર મળ્યું છે કે કેમ તેમજ જો થોડોક પણ શક જાય તેની ખરાઈ કરવી જરૂરી છે. 

આ પ્રકારની ફરિયાદ કરવા પર 501 રૂપિયા ઇનામ 
ગ્રાહક સુરક્ષા અને પગલાં સમિતિમાં ગ્રાહક સાગરભાઈએ ફરિયાદ કરતા ગ્રાહક સુરક્ષા અને પગલાં સમિતિએ ગેસ એજન્સીને નોટિસ મોકલી ઘટના મામલે જવાબ માંગ્યો. તેમજ અત્યાર સુધી ગેસ સિલિન્ડરમાં ઓછા ગેસ મળતો હોવાની ફરિયાદ અનેક મળતી પણ આ પ્રકારની ફરિયાદ કે જેમાં પૂરો ગેસ સિલિન્ડર ખાલી હોય તે આપ્યા હોવાની પહેલી ફરિયાદ મળી હોવાનું ગ્રાહક સુરક્ષા અને પગલાં સમિતિના પ્રમુખ મુકેશ પરીખે જણાવ્યું છે. જે અંગે તેઓએ  અન્ય લોકોને પણ આ પ્રકારનો ફરિયાદ કરવા પર 501 રૂપિયા ઇનામ આપવાની જાહેરાત કરી ને ગ્રાહક જાગૃત બને અને તે છેતરાય નહિ તેમ જણાવ્યું છે. 

કડક પગલાં ક્યારે?
હાલમાં તહેવારનો સમય ચાલી રહ્યો છે. અને સાથે મોંઘવારી. જે સમયે આવી ઘટના બને તો ગેસ સિલિન્ડર પૂરો થવા પર અને કાયદાકીય પ્રક્રિયાને લઈને નવો સિલિન્ડર ન મળે ત્યાં સુધી ઘરમાં રાંધવું શુ તે પ્રશ્ન સર્જાય છે. તેમાં પણ ઇંધણના ભાવમાં વધારા સાથે ગેસ સિલિન્ડરના ભાવ પણ આસમાને છે. જે આસમાને પહોંચેલા ભાવ આપવા છતાં પણ તેની સામે ગ્રાહકને પૂરતી સર્વિસ ન મળે ત્યારે ગ્રાહક સાથે સીધી છેતરપિંડી થાય અને ગ્રાહકે હેરાન થવાનો વારો આવી જાય છે ત્યારે જરૂરી છે કે વિવિધ એજન્સીઓ સામે અને છેતરામણ કરતાં ડિલિવરી બોય સામે કડક પગલાં લેવાની જરૂર છે.