- કોંગ્રેસના દિગ્ગજ નેતા કેસી વેણુગોપાલનું નિવેદન
- કોંગ્રેસ અધ્યક્ષ સોનિયા ગાંધી રાજસ્થાનના સીએમનો નિર્ણય લેશે
- 2 દિવસમાં સોનિયા ગાંધી જાહેર કરશે નિર્ણય
- અશોક ગેહલોતનો અધ્યક્ષની ચૂંટણી લડવાનો ઈન્કાર
રાજસ્થાનના નવા સીએમની જાહેરાત પહેલા જ ધારાસભ્યના બળવાના સૂત્રધાર ગણાતા અશોક ગેહલોત કોંગ્રેસ અધ્યક્ષનું પદ ગુમાવી ચૂક્યાં છે અને હવે તેમની સીએમની ખુરશી પર પણ ખતરો મંડરાઈ રહ્યો છે. સોનિયા ગાંધી સાથેની મુલાકાત બાદ અશોક ગેહલોત અધ્યક્ષની ચૂંટણી ન લડવાની જાહેરાત કરી ચૂક્યા છે અને હવે કોંગ્રેસના સિનિયર નેતા કેસી વેણુગોપાલે એક મોટું નિવેદન આપતાં એવું કહ્યું કે સોનિયા ગાંધી એક કે બે દિવસમાં રાજસ્થાનના સીએમ પર નિર્ણય લેશે.
વેણુગોપાલે કહ્યું કે આવતીકાલે સાંજ સુધી રાહ જુઓ, અંતિમ નામોની યાદી તમારી સામે હશે. કોંગ્રેસના સૂત્રોનું માનવું છે કે, ગેહલોત સમર્થકોના વર્તનથી હાઇકમાન્ડ નારાજ છે.
અશોક ગેહલોત કોંગ્રેસ અધ્યક્ષની ચૂંટણી નહીં લડે
અશોક ગેહલોતે કોંગ્રેસ અધ્યક્ષની ચૂંટણી ન લડવાનું એલાન કરી દીધું છે. છેલ્લી ઘડીએ અધ્યક્ષની ચૂંટણી ન લડવાના ગેહલોતોના નિર્ણયને કારણે રાજકીય વર્તુળોમાં મોટી ચર્ચા જાગી છે. હકીકતમાં અશોક ગેહલોતે કોંગ્રેસ અધ્યક્ષ સોનિયા ગાંધીની મુલાકાત બાદ આવો નિર્ણય જાહેર કર્યો હતો અત્યાર સુધી તો તેઓ ચૂંટણી લડી રહ્યાં છે તેવું પણ કહેવામાં આવતું હતું. ખુદ ગેહલોતે કહી ચૂક્યા છે કે તેઓ ચૂંટણી લડવાના છે પરંતુ હવે અચાનક તેમણે સામે આવીને ચૂંટણી ન લડવાની જાહેરાત કરી દીધી છે.
જે બન્યું તેનાથી આત્મા કકળી ઉઠ્યો, એટલે નહીં લડું ચૂંટણી- ગેહલોત
રાજસ્થાનમાં ચાલી રહેલા રાજકીય સંકટ વચ્ચે અશોક ગેહલોતે કોંગ્રેસ અધ્યક્ષ સોનિયા ગાંધી સાથે મુલાકાત કરી હતી. બેઠક બાદ તેમણે કહ્યું કે જે રીતે 50 વર્ષમાં હું ઈન્દિરા ગાંધીના સમયથી કોંગ્રેસ પાર્ટીનો અધ્યક્ષ હતો, મારી પર હંમેશા વિશ્વાસ રાખીને જવાબદારી સોંપવામાં આવી હતી. રાહુલ ગાંધીએ નક્કી કરીને મને જવાબદારી સોંપી હતી પરંતુ પછીથી જે બન્યું તે જાણીને મારો આત્મા કકળી ઉઠ્યો હતો અને આખા દેશમાં ખોટો મેસેજ ગયો કે હું મુખ્યમંત્રી તરીકે પણ ચાલુ રહેવા માગું છે. આ માટે મેં સોનિયા ગાંધીની માફી માંગી છે. હું કોંગ્રેસનો વફાદાર છું.
